တနင်္သာရီတိုင်း၊ သရက်ချောင်းမြို့နယ်၊ မင်းဒပ်ကျေးရွာမှာ နှစ်ပေါင်း ၃၀ ကျော် အခြေချ တပ်စွဲထားတဲ့ စစ်တပ်ရဲ့ ဝင်းဝတပ်စခန်းကို KNLA နဲ့ PDF တော်လှန်ရေးပူးပေါင်းတပ်ဖွဲ့တွေက မတ် ၁၁ ရက်မှာ တိုက်ခိုက်သိမ်းပိုက်လိုက်တယ်လို့ ကရင်အမျိုးသားအစည်းအရုံး (KNU) က ထုတ်ပြန်ပါတယ်။
ဝင်းဝတပ်စခန်းကို ကရင်အမျိုးသားလွတ်မြောက်ရေးတပ်မတော် (KNLA) နဲ့ ပြည်သူ့ကာကွယ်ရေးတပ်မတော် (PDF) တော်လှန်ရေးပူးပေါင်းတပ်ဖွဲ့တွေက ဖေဖော်ဝါရီ ၇ ရက်က စတင်တိုက်ခိုက်ခဲ့တာဖြစ်ပြီး တလကျော်အကြာ မတ် ၁၁ ရက် ညနေ ၄ နာရီလောက်မှာ အပြီးသိမ်းပိုက်နိုင်ခဲ့ကာ လက်နက်ခဲယမ်းတွေကိုလည်း သိမ်းဆည်းရရှိခဲ့တယ်လို့ ဆိုပါတယ်။
ပြီးခဲ့တဲ့ ၂၀၂၅ ခုနှစ် တနှစ်တာအတွင်း မြိတ်ထားဝယ်ခရိုင်၊ အမှတ် ၄ တပ်မဟာနယ်မြေအတွင်း ကရင်အမျိုးသားလွတ်မြောက်ရေးတပ်မတော်၊ ကရင်အမျိုးသားကာကွယ်ရေးတပ် ပူးပေါင်းတပ်ဖွဲ့နဲ့ စစ်အုပ်စုတို့အကြား တိုက်ပွဲ ၅၅ ကြိမ် ဖြစ်ပွားခဲ့ပါတယ်။
တိုက်ပွဲတွေမှာ စစ်အုပ်စုဘက်က ၁၇၃ ယောက် သေဆုံးကာ ၈၇ ယောက် ထိခိုက်ဒဏ်ရာ ရရှိခဲ့ကြောင်းနဲ့ တော်လှန်ရေးပူးပေါင်းတပ်တွေအနေနဲ့ စစ်အုပ်စုတပ်စခန်းတွေဖြစ်တဲ့ ထီးထာ၊ မယ်သမီခီး၊ အီးသာခေး၊ မောတောင်နဲ့ မောမစား တပ်စခန်းတို့ကို သိမ်းပိုက်ရရှိခဲ့တယ်လို့လည်း ထုတ်ပြန်ထားပါတယ်။
