ဥရောပချန်ပီယံလိဂ်ပြိုင်ပွဲရဲ့ ၁၆ သင်းအဆင့် ပထမအကျော့ပွဲစဉ်တွေကို မတ် ၁၁ ရက်နဲ့ ၁၂ ရက် မနက်တွေမှာ ကစားခဲ့ရာ အင်္ဂလန်ကလပ်အသင်း တသင်းမှ နိုင်ပွဲမရခဲ့ပါဘူး။
ချန်ပီယံလိဂ် ၁၆ သင်းအဆင့်ကို အင်္ဂလန်ကလပ်အသင်း ၆ သင်းအထိ တက်လာခဲ့တာဖြစ်ပေမဲ့ တသင်းမှ နိုင်ပွဲမရခဲ့တာပါ။
မတ် ၁၁ ရက်က ကစားခဲ့တဲ့ ပွဲစဉ်တွေမှာ အင်္ဂလန်ကလပ် လီဗာပူးက တူရကီကလပ် ဂါလာတာစာရေးကို တဂိုး ဂိုးမရှိနဲ့ ရှုံးနိမ့်ခဲ့သလို စပါးအသင်းကလည်း အက်သလက်တီကို မက်ဒရစ်အသင်းကို ၅ ဂိုး ၂ ဂိုးနဲ့ ရှုံးနိမ့်ခဲ့ပါတယ်။ နယူးကာဆယ်အသင်းကတော့ ဘာစီလိုနာအသင်းကို တဂိုးစီ သရေကျခဲ့ပါတယ်။
ဒီနေ့မနက်အစောပိုင်းမှာ ကစားခဲ့တဲ့ ပွဲစဉ်တွေမှာတော့ အင်္ဂလန်ကလပ် မန်စီးတီးအသင်းက ရီးရဲလ်မက်ဒရစ်အသင်းကို ၃ ဂိုး ဂိုးမရှိနဲ့ ရှုံးနိမ့်ခဲ့ပြီး ချဲလ်ဆီးအသင်းကလည်း PSG အသင်းကို ၅ ဂိုး ၂ ဂိုးနဲ့ ရှုံးနိမ့်ခဲ့ပါတယ်။
အာဆင်နယ်အသင်းကတော့ လေဗာကူဆင်အသင်းကို တဂိုးစီ သရေကျခဲ့တာ ဖြစ်ပါတယ်။ ဒါကြောင့် အင်္ဂလန်ကလပ် ၆ သင်းမှာ ၃ သင်းက ပြိုင်ဘက်တွေကို ၃ ဂိုးပြတ်စီနဲ့ ရှုံးနိမ့်ထားပြီး နောက်တဆင့်တက်ဖို့ အခွင့်အလမ်းနည်းတဲ့ အနေအထား ဖြစ်သွားပါတယ်။
ချန်ပီယံလိဂ် ၁၆ သင်းအဆင့် ဒုတိယအကျော့ ပွဲစဉ်တွေကို လာမဲ့ မတ် ၁၈ ရက်နဲ့ ၁၉ ရက်မှာ ကစားကြမှာ ဖြစ်ပါတယ်။
