ရခိုင်ပြည်နယ်၊ ကျောက်ဖြူမြို့နယ်မှာ အကျအဆုံးများနဲ့ နောက်ဆုတ်လာနေရတဲ့ စစ်ကောင်စီ စစ်ကြောင်းတွေရှိရာ တပ်စခန်းတွေကို အာရက္ခတပ်တော် (AA) က ဆက်လက်တိုက်ခိုက်နေတယ်လို့ စစ်ရေးနီးစပ်သူတွေထံက သိရပါတယ်။

မင်းပြင်၊ သိုင်းချောင်းမှာ တပ်စွဲထားတဲ့ စစ်ကောင်စီစခန်းတွေကို နောက်ဆုတ်လာရတဲ့ စစ်ကြောင်းတွေ ရောက်နေချိန် AA က လက်နက်ကြီး၊ ဒရုန်းတို့နဲ့ ဆက်လက်တိုက်ခိုက်နေတယ်လို့ ဒေသခံ စစ်ရေးသတင်းရင်းမြစ်တယောက်က ပြောပါတယ်။

“မြေပြင်တိုက်ပွဲတော့ မရှိဘူး၊ ဒဏ်ရာတွေနဲ့ နောက်ဆုတ်လာရတဲ့ စစ်ကြောင်းတွေ ပူးပေါင်းနေတဲ့ မင်းပြင်စခန်း၊ သိုင်းချောင်းစခန်းကို AA က လက်နက်ကြီး၊ ဒရုန်းတွေနဲ့ ဆက်တိုက်နေတယ်။”

အာရက္ခတပ်တော်ရဲ့ ဒရုန်း၊ လက်နက်ကြီးကျည်တွေဟာ မင်းပြင်၊ သိုင်းချောင်းစခန်းထဲ ကျရောက်ပေါက်ကွဲနေပြီး စစ်ကောင်စီဘက်က ထိခိုက်သေဆုံးမှု ရှိနိုင်တယ်လို့ သူက ဆက်ပြောပါတယ်။

အလားတူ ဒိုးမတောင်ပတ်ဝန်းကျင်မှာ လှုပ်ရှားနေတဲ့ စစ်ကောင်စီတပ် အင်အား ၁၀၀ ကျော်ပါ စစ်ကြောင်းလည်း အာရက္ခတပ်တော် (AA) က ဒရုန်းအပြင် စနိုက်ပါတို့နဲ့ ဆက်လက်တိုက်ခိုက်နေတယ်လို့ နောက်ထပ် စစ်ရေးသတင်းရင်းမြစ်တယောက်က ပြောပါတယ်။

“ဒိုးမတောင်ပတ်ဝန်းကျင်မှာ ရှိတဲ့ စကစ စစ်ကြောင်းလည်း ထွက်ပေါက်မရ တိုက်ခိုက်ခံနေရတယ်။ အဓိက ဒရုန်း၊ စနိုက်ပါ ထိနေတယ်။”

အခုလို စစ်ကောင်စီစစ်ကြောင်း အင်အား ၁၀၀ ကျော်ပါ စစ်ကြောင်း ၃ ကြောင်းဟာ မင်းပြင်ပတ်ဝန်းကျင်၊ သိုင်းချောင်းပတ်ဝန်းကျင်၊ ဒိုးမတောင်ပတ်ဝန်းကျင်တို့မှာ AA ထိန်းချုပ်နယ်မြေဘက် စစ်ကြောင်းထိုးနေစဉ် AA ဘက်က ချေမှုန်းတိုက်ခိုက်လိုက်တဲ့အတွက် မင်းပြင်ဘက် စစ်ကြောင်း၊ သိုင်းချောင်းဘက်စစ်ကြောင်း ပြိုကွဲပြီး နောက်ဆုတ်သွားရတယ်လို့ ဒေသခံ စစ်ရေးနီးစပ်သူတွေဆီက သိရပါတယ်။