လုပ်ငန်းခွင်အတွင်းနဲ့ လုပ်ငန်းခွင်ပြင်ပတွေမှာ အမျိုးသမီးတွေ လိင်အမြတ်ထုတ်ခံနေကြရတယ်လို့ မတ် ၈ ရက်မှာ ကျရောက်တဲ့ အပြည်ပြည်ဆိုင်ရာ အမျိုးသမီးများနေ့အတွက် အလုပ်သမားအဖွဲ့ချုပ်တွေရဲ့ ကြေညာချက်မှာ အလေးပေး ဖော်ပြထားပါတယ်။
အမျိုးသမီးတွေအနေနဲ့ လုပ်ငန်းခွင်ထဲမှာ ကျား၊ မ ခွဲခြားဆက်ဆံခံရတာ၊ လုပ်ခလစာ မညီမျှတာ၊ မီးဖွားခွင့်ယူလို့ အလုပ်ထုတ်ခံရတာအပြင် လိင်ပိုင်းဆိုင်ရာ နှောင့်ယှက်ခံရတာတွေ ရင်ဆိုင်နေရတယ်လို့ မြန်မာနိုင်ငံ စက်မှုလက်မှုနှင့် ဝန်ဆောင်မှုလုပ်ငန်းပေါင်းစုံ အလုပ်သမားသမဂ္ဂများ အဖွဲ့ချုပ် (MICS-TUsF) ရဲ့ ကြေညာချက်မှာ ဖော်ပြထားပါတယ်။
ဒါ့အပြင် အာဏာသိမ်းစစ်တပ်က စစ်ကြောင်းထိုး ဝင်ရောက်တဲ့ ကျေးရွာတွေမှာ အမျိုးသမီးတွေကို ဖမ်းဆီးပြီး အဓမ္မကျင့်တဲ့ ဖြစ်ရပ်တွေ ရှိသလို စစ်ကောင်စီကို လက်နက်ကိုင် တော်လှန်နေတဲ့ အဖွဲ့တချို့က အမျိုးသမီးတွေအပေါ် လိင်ပိုင်းဆိုင်ရာ ပြုကျင့်မှုတွေ ရှိလာတာကြောင့် သက်ဆိုင်ရာအဖွဲ့တွေက ထိရောက်စွာအရေးယူဖို့ MICS-TUsF က တိုက်တွန်းထားပါတယ်။
မြန်မာနိုင်ငံလုံးဆိုင်ရာ အလုပ်သမားသမဂ္ဂများအဖွဲ့ချုပ် (CTUM) ကလည်း လုပ်ငန်းခွင်အတွင်းနဲ့ ပဋိပက္ခဖြစ်ပွားရာ ဒေသတွေမှာ အမျိုးသမီးတွေကို လိင်အမြတ်ထုတ်ခံရတာ၊ အဓမ္မပြုကျင့်တာ၊ လိင်ကျွန်ပြု ခိုင်းစားတာတွေ ရှိနေပြီး ကျူးလွန်သူတွေ အရေးယူခံရတာ နည်းပါးနေတယ်လို့ ကြေညာချက်မှာ ထည့်သွင်း ဖော်ပြထားပါတယ်။
“လိင်ပိုင်းဆိုင်ရာ အမြတ်ထုတ်မှုတွေ၊ လုပ်ငန်းခွင်အတွင်း လိင်ပိုင်းဆိုင်ရာ ထိပါးနှောင့်ယှက်တာ လုပ်တဲ့ ဘယ်အဖွဲ့အစည်း၊ ပုဂ္ဂိုလ်ကိုမဆို ပြစ်ဒဏ်ကင်းလွတ်ခွင့်မရစေဘဲ ကျူးလွန်ခံရသူအတွက် တရားမျှတမှု ပြန်လည်ရှာဖွေပေးရမှာဖြစ်ပါတယ်” လို့ CTUM က ကြေညာပါတယ်။
အလားတူ အမျိုးသမီးတွေ ကိုယ်ထိလက်ရောက် ကျူးလွန်ခံရမှုနဲ့ လိင်ပိုင်းဆိုင်ရာ နှောင့်ယှက်ခံရမူတွေအပေါ် လက်ခံနိုင်စရာမရှိဘူးလို့ သွေးစည်းညီညွတ်သောသမဂ္ဂများအဖွဲ့ချုပ် (STUM) ရဲ့ ကြေညာချက်မှာ ဖော်ပြထားပါတယ်။
အဲဒီလို ကိုယ်ထိလက်ရောက် ကျူးလွန်တာတွေအားလုံး ချက်ချင်းရပ်တန့်ဖို့နဲ့ ကျူးလွန်သူကို အရေးယူဖို့ STUM က တောင်းဆိုထားသလို အလုပ်သမားသမဂ္ဂတွေ၊ လူ့အခွင့်အရေးအဖွဲ့တွေနဲ့ ပူးပေါင်းပြီး လုပ်ငန်းခွင်အတွင်း အကြမ်းဖက်တွေနဲ့ ပတ်သက်ပြီး နိုင်ငံတကာကို တင်ပြသွားမယ်လို့လည်း ထုတ်ပြန်ထားပါတယ်။
