ပဲခူးတိုင်း ပန်းတောင်းမြို့နယ်မှာရှိတဲ့ စစ်ကောင်စီရဲ့ ယမ်းချက်စက်ရုံ ကပစ-၁၆ ကို အာရက္ခ တပ်တော် (AA) နဲ့ ပူးပေါင်းတပ်တွေက လက်နက်ကြီးတွေနဲ့ တိုက်ခိုက်ခဲ့တာကြောင့် စက်ရုံအတွင်း ကျရောက်ပေါက်ကွဲခဲ့ပြီး စစ်ကောင်စီကလည်း တော်လှန်ရေးအင်အားစုတွေ တပ်စွဲထားတဲ့ နေရာ တွေကို ဒရုန်းတွေနဲ့ တိုက်ခိုက်နေတယ်လို့ စစ်ရေးသတင်းရင်းမြစ်တွေက ပြောပါတယ်။

ကပစ-၁၆ နဲ့ ၃ မိုင်အကွာကို ရောက်ရှိလာတဲ့ တော်လှန်ရေး မဟာမိတ် အင်အားစုတပ်တွေဟာ မတ် ၁ ရက်က ကပစ-၁၆ စက်ရုံဝန်းကို လက်နက်ကြီးတွေနဲ့ ပစ်ခတ်တိုက်ခဲ့ကြတာဖြစ်ပြီး ကပစ-၁၆ မှာ လက်နက်ကြီးကျည် ၃ လုံး ကျရောက်ပေါက်ကွဲခဲ့တယ်လို့ စစ်ရေးသတင်းရင်းမြစ်တယောက်က ပြောပါတယ်။

“ကပစ-၁၆ ပတ်ဝန်းကျင်က နေ့တိုင်း တိုက်ပွဲတွေ ရှိနေတာဗျာ။ လက်ရှိတိုက်ပွဲက ကပစ-၁၆ ရဲ့ ရှေ့တန်းကာကင်းတွေအထိ ရောက်နေပြီ။ မတ်လ ၁ ရက်နေ့ကလည်း ကပစ-၁၆ စက်ရုံထဲကို လက်နက်ကြီးတွေနဲ့ ပစ်ခတ်တိုက်ခိုက်ခဲ့တာတွေ ရှိတယ်။ ကျနော်တို့သိသလောက် လက်နက်ကြီး ၃ လုံး ကျရောက်ပေါက်ကွဲခဲ့တာ ရှိတယ်လို့ သိရတယ်။ အထိအခိုက်တော့ စုံစမ်းနေတုန်းပဲ။ စစ်ကောင်စီကလည်း ဒရုန်းတွေကို အဓိကထားပြီး တန်ပြန်တိုက်ခိုက်နေတာရှိတယ်။”

လက်ရှိမှာ အာရက္ခတပ်တော်နဲ့ ပူးပေါင်းတပ်တွေဟာ ကပစ-၁၆ ရဲ့ ရှေ့တန်းကာကင်းတွေဖြစ်တဲ့ ပွိုင့်-၃၀၃ စခန်းကုန်းနဲ့ ပွိုင့်-၃၀၆ စခန်းပတ်ဝန်းကျင်မှာ နှစ်ဖက်တိုက်ပွဲတွေ ဖြစ်ပွားနေပြီး စစ်ကောင်စီကလည်း တပ်သားတချို့ ထွက်ပြေးမှုတွေ ရှိနေတယ်လို့ စစ်ရေး သတင်းရင်းမြစ် တွေက ပြောပါတယ်။

လက်ရှိမှာ စစ်ကောင်စီက ပကစ-၁၆ စက်ရုံပတ်ဝန်းကျင်နဲ့ လေလာတောင်၊ ညောင်ကျိုး ပတ်ဝန်းကျင်က တော်လှန်ရေးအင်အားစုတွေ ထိန်းချုပ်ထားတဲ့ နေရာတွေကို ဒရုန်းတွေ၊ ပါရာမော်တာနဲ့ ဂျက်ဖိုက်တာတွေ အသုံးပြုပြီး လေကြောင်းတိုက်ခိုက်နေတယ်လို့ သိရပါတယ်။

ကပစ-၁၆ စက်ရုံဟာ စစ်ကောင်စီက စစ်လက်နက်တွေမှာ သုံးတဲ့ ယမ်းချက်စက်ရုံဖြစ်ပြီး ဖေဖော်ဝါရီလကတည်းက စစ်ကောင်စီက ယမ်းထုတ်လုပ်မှုတွေကို လျှော့ချပြီး ခံစစ်အခိုင်အမာ လုပ်နေတာလို့ စစ်ရေးသတင်းရင်းမြစ်တွေက ပြောပါတယ်။

အာရက္ခတပ်တော်နဲ့ ပူးပေါင်းတပ်တွေဟာ ပဲခူးနဲ့ ရခိုင်အစပ်မှာ ကပစ-၁၆ နဲ့ ကပစ-၆ စက်ရုံတွေကို ဦးတည်ပြီး စစ်ရေးဖော်ဆောင်နေကြတာဖြစ်ပြီး စစ်ကောင်စီဘက်ကလည်း စကခ-၁၀၊ စကခ-၁၄ တပ်မတွေနဲ့ ဒေသတွင်း တပ်ရင်းတွေကို အသုံးပြုပြီး ခုခံကာကွယ်နေပါတယ်။

ပန်းတောင်းမြို့နယ်အတွင်းမှာ စစ်ကောင်စီက ကပစ စက်ရုံ ၅ ခုအထိ တည်ရှိနေတာကြောင့် စစ်ရေး အရ အလွန်အရေးပါတဲ့ ဒေသတခုလည်း ဖြစ်တယ်လို့ စစ်ရေးကျွမ်းကျင်သူတွေက သုံးသပ် ပါတယ်။

ပန်းတောင်းမြို့နယ်အတွင်းမှာ တော်လှန်ရေးအင်အားစုတွေက မိုးထိ၊ ညောင်ကျိုး၊ ပန်းဂံကွဲနဲ့ ပွိုင့်-၆၆၆ စခန်းကုန်းတွေအပါအဝင် ရိုးတောင်ဧရိယာ အများစုကို သိမ်းပိုက် ထိန်းချုပ်ထားပြီး စစ်ကောင်စီက ဆင်လမ်ရွာနဲ့ ကပစ-၁၆ အနီးမှာ ခံတပ်လုပ်ကာ ခုခံတိုက်ခိုက်နေပါတယ်။