ညောင်ဦးမြို့နယ်ထဲမှာ စစ်ကောင်စီရဲ့ ကင်းလှည့်လာတဲ့ကားကို တိုက်ခိုက်ခဲ့ပြီး စစ်ကောင်စီဘက်က ၄ ယောက်သေတယ်လို့ ပခုက္ကူမြို့နယ်၊ ပြည်သူ့ကာကွယ်ရေးတပ်ဖွဲ့က ဖေဖော်ဝါရီ ၂၈ ရက်မှာ ထုတ်ပြန်ပါတယ်။

ညောင်ဦးမြို့အခြေစိုက် ခမရ ၄၁၅ ကနေ ဖေဖော်ဝါရီ ၂၇ ရက် မနက်ပိုင်းမှာ ထွက်လာတဲ့ ပတ်ကင်းလှည့်တဲ့ကားကို တော်လှန်ရေးတပ်စိပ် ၂ စိပ်က ပုဂံညောင်ဦး-ကျောက်ပန်းတောင်း လမ်းပိုင်း ဝါးခင်းကြီးချောင်းနား အရောက်မှာ ပြောက်ကျားစနစ်နဲ့ ကြားဖြတ်တိုက်ခိုက်ခဲ့တာလို့ ဆိုပါတယ်။

နာရီဝက်ကြာလောက်တိုက်ပွဲအတွက် စစ်ကောင်စီဘက်က ၄ ယောက်သေဆုံးပြီး ​ MA 3 သေနတ် ၂ လက်၊ ကာဘိုင် ၂ လက်နဲ့ ကျည်အများအပြားကို သိမ်းဆည်းရမိခဲ့တယ်လို့ ဆိုပါတယ်။

တိုက်ခိုက်မှုကို Pakokku Special Task Force (ပခုက္ကူမြို့နယ် ပြည်သူ့ကာကွယ်ရေးတပ်ဖွဲ့  -ပကဖ)၊ Bagan Nyaung Oo Special Task Force နဲ့ မကွေးတိုင်း ပကဖ အမှတ် ၄ အထူးလှုပ်ရှားစစ်ကြောင်း တို့က ပြုလုပ်ခဲ့တာလို့ ထုတ်ပြန်ထားပါတယ်။