အသက် ၄၁ နှစ်အရွယ်ရှိပြီဖြစ်တဲ့ ပေါ်တူဂီ ဝါရင့်တိုက်စစ်မှူး ခရစ်စတီယာနို ရော်နယ်ဒိုဟာ ဘောလုံးလောကကနေ အနားယူဖို့ ခြေလှမ်းသစ်အဖြစ် စပိန်ဒုတိယတန်းကလပ် အယ်လ်မာရီယာ အသင်းရဲ့ ရှယ်ယာ ၂၅ ရာခိုင်နှုန်းကို ဝယ်ယူကာ အသင်းပိုင်ရှင်ဘဝကို စတင်လိုက်ပြီ ဖြစ်ပါတယ်။
ပြီးခဲ့တဲ့ ၃ နှစ်ကတည်းက အသင်းပိုင်ရှင်ဖြစ်ချင်တယ်လို့ သူပြောခဲ့တဲ့ စကားအတိုင်း အကောင်အထည်ဖော်လိုက်တာဖြစ်ပြီး ဒါဟာ သူ့ရဲ့ ၂၄ နှစ်ကြာ ကစားသမားဘဝ အဆုံးသတ်တော့မဲ့ အသိသာဆုံး အရိပ်အယောင်လည်း ဖြစ်ပါတယ်။
လက်ရှိမှာ ပိုင်ဆိုင်မှု ပေါင် ၁ ဘီလီယံကျော်ရှိနေတဲ့ ရော်နယ်ဒိုဟာ နည်းပြ ဒါမှမဟုတ် ဘောလုံးဝေဖန်သုံးသပ်သူ အလုပ်တွေထက် အင်္ဂလန်အကျော်အမော် ဒေးဗစ်ဘက်ခမ်းလို အသင်းပိုင်ရှင်အဖြစ် လုပ်ကိုင်ဖို့ ရွေးချယ်ခဲ့တာပါ။
လာမဲ့ ၂၀၂၆ ကမ္ဘာ့ဖလားဟာ သူ့အတွက် နောက်ဆုံးပြိုင်ပွဲ ဖြစ်လာမှာဖြစ်သလို တဖက်မှာလည်း ပေါ်တူဂီမှာ ပေါင် ၂၈ သန်းတန် နန်းတော်သဖွယ် စံအိမ်ကြီးကို အပြီးသတ်ဆောက်လုပ်ရင်း ကစားသမားဘဝအလွန် ဇိမ်ခံဘဝအတွက် အားလုံးကို အစီအစဉ်တကျ ပြင်ဆင်ထားပြီး ဖြစ်ပါတယ်။
