ကြံ့ခိုင်ရေးပါတီ မိုးထဲရေထဲရောက်ချိန်မှာ ဂူအောင်းနေပြီး ရွေးကောက်ပွဲအနိုင်ရမှ တပ်ကိုယ်စားလှယ်တချို့က စစ်တက္ကသိုလ် အပတ်စဥ် ပြောပြီး ရာထူးနေရာတွေ တောင်းတာဟာ ရှက်စရာကောင်းတယ်လို့ ကြံ့ခိုင်ရေးပါတီ ပုဗ္ဗသီရိမြို့နယ် ပြည်သူ့လွှတ်တော်ကိုယ်စားလှယ်လောင်း ဘူးလက်လှဆွေက ဝေဖန်ပြောဆိုပါတယ်။

ပုဗ္ဗသီရိမြို့နယ် ပြည်သူ့လွှတ်တော်ကိုယ်စားလှယ်လောင်း ဘူးလက်လှဆွေက သူအသုံးပြုနေတဲ့ Tiktok အကောင့်ကနေ ဖေဖော်ဝါရီ ၂၄ ရက်မှာ ပါတီအတွင်း ရာထူးနေရာ တောင်းဆိုမှုတွေနဲ့ ပတ်သက်ပြီး Live လွှင့် ပြောဆိုခဲ့တာ ဖြစ်ပါတယ်။

“တချို့က အခုမှဝင်လာတယ်ဗျ။ ကျနော်တို့ ရှေ့တန်းမှာ ရွပ်ရွပ်ချွံချွံ လုပ်နေတုန်းက ဒီလူတွေက ဂူအောင်းနေတယ်။ အခုမှ ဝင်လာပြီးတော့ ကျနော်က ဘယ်သူနဲ့ တပတ်စဥ်တည်းပါ၊ ကျနော့်ကို ဘာရာထူးပေးပါ လာပြောတော့ ရယ်ရတယ်။ ဦးလှဆွေကြီး ဘာရာထူးယူမလဲဆိုတော့ ကျနော်က တပ်သားအဆင့်ပဲ ထားပါလို့ အစကတည်းက ပြောထားတာ။ ကျနော်တို့ ရှေ့တန်းမှာ ရွပ်ရွပ်ချွံချွံ တိုက်နေတုန်းက ဂူအောင်းနေတယ်။ အဲဒီတုန်းက ကြံ့ခိုင်ရေးပုဆိုးအစိမ်းဝတ်ရမှာကို ကြောက်နေတဲ့သူတွေက အခုကျတော့ ဟိုနေရာလိုချင် ဒီနေရာလိုချင်နဲ့ အဲလိုမျိုးတွေဖြစ်နေတယ်။ ရှက်စရာကြီး၊ ကျနော်က အဲဒီအထဲမပါဘူး။”

အာဏာခွဲဝေမှုမှာ တပ်က အငြိမ်းစားယူပြီး ကြံ့ခိုင်ရေးပါတီက ဝင်ရွေးတဲ့ ကိုယ်စားလှယ်တွေနဲ့ မူလ ကြံ့ခိုင်ရေးပါတီက ရွေးကောက်ခံကိုယ်စားလှယ်တွေကြား မကျေလည်မှုတွေရှိတယ်လို့ နေပြည်တော် သတင်းအရင်းအမြစ်က DVB ကို ပြောပါတယ်။

“ကိုယ်စားလှယ်ချင်းတူပေမဲ့ အငြိမ်းစားရပြီး ဝင်ပြိုင်ရတာချင်း မတူဘူး။ ကြံ့ခိုင်ရေးပါတီမှာ အမြင့်ဆုံးက ကစထမှူးပဲရှိတယ်။ တပ်က လွှတ်လိုက်တဲ့ သူတွေထဲမှာ ဗိုလ်ချုပ်ကြီးအဆင့် ၄ ယောက်ပါတယ်၊ ကျန်တာ ကစထမှူးတွေ၊ ဗိုလ်ချုပ်တွေ မဖြစ်မနေမို့သာ ကြံ့ခိုင်ရေးပါတီ အောက်ကနေဝင်ပြိုင်ရပေမဲ့ မပြိုင်ခင်ကတည်းက အနိုင်ရရင် အစိုးရသစ်ဖွဲ့ရင် ဘယ်ရာထူးပေးမယ် ဆိုတာ တပ်ချုပ်က ပြောပြီးသား၊ ရာထူးတောင်းစရာမလိုဘူး။”

လာမဲ့ အစိုးရအဖွဲ့မှာ ဗိုလ်ချုပ်မှူးကြီး မင်းအောင်လှိုင်က သမ္မတ၊ ကြံ့ခိုင်ရေးပါတီဥက္ကဋ္ဌ ဦးခင်ရီက ပြည်သူ့လွှတ်တော်ဥက္ကဋ္ဌ နေရာယူမယ်လို့ သတင်းထွက်နေပေမဲ့ အတည်ပြုနိုင်ခြင်း မရှိပါဘူး။

စစ်တပ်သြဇာခံ ရွေးကောက်ပွဲကော်မရှင်က ဖေဖော်ဝါရီ ၃ ရက်က ထုတ်ပြန်တဲ့ စာရင်းအရ လွှတ်တော် ၃ ရပ်မှာ ကိုယ်စားလှယ်ပေါင်း ၁,၀၂၅ ယောက်မှာ ကြံ့ခိုင်ရေးပါတီက ၇၃၉ နေရာ အနိုင်ရရှိထားပါတယ်။

၂၀၂၀ ရွေးကောက်ပွဲမှာ အနိုင်ရရှိခဲ့တဲ့ အမျိုးသားဒီမိုကရေစီအဖွဲ့ချုပ် (NLD) ပါတီက သမ္မတနဲ့ နိုင်ငံတော်အတိုင်ပင်ခံပုဂ္ဂိုလ် အပါအဝင် အစိုးရအဖွဲ့ဝင်တွေကို စစ်ကောင်စီက ဖမ်းဆီးပြီး အာဏာသိမ်းခဲ့တာ ၅ နှစ်သက်တမ်းပြည့်တဲ့အချိန်မှာ စစ်အုပ်စုက ရွေးကောက်ပွဲ ကျင်းပခဲ့ပေမဲ့ ကုလသမဂ္ဂနဲ့ နိုင်ငံတကာက အတုအယောင်ရွေးကောက်ပွဲအဖြစ် သတ်မှတ်ထားပါတယ်။