အမေရိကန်အစိုးရဟာ အီရန်နိုင်ငံရဲ့ တရားမဝင် ရေနံရောင်းဝယ်မှုတွေနဲ့ ပဲ့ထိန်းဒုံးကျည် အပါအဝင် အဆင့်မြင့်နည်းပညာသုံး စစ်လက်နက် (ACW) ထုတ်လုပ်ရေးမှာ ပါဝင်ပတ်သက်နေတဲ့ လူပုဂ္ဂိုလ်နဲ့ အဖွဲ့အစည်းပေါင်း ၃၀ ကျော်ကို ဖေဖော်ဝါရီ ၂၅ ရက်မှာ ထပ်မံပိတ်ဆို့ အရေးယူလိုက်ပါတယ်။

အမေရိကန် ဘဏ္ဍာရေးဝန်ကြီးဌာနရဲ့ ထုတ်ပြန်ချက်အရ အခုပိတ်ဆို့မှုဟာ နိုင်ငံခြားပိုင်ဆိုင်မှု ထိန်းချုပ်ရေးရုံးမှ အီရန်ရဲ့ ရေနံတင်သင်္ဘော ၁၂ စီးနဲ့ အဲဒီသင်္ဘောပိုင်ရှင်တွေနဲ့ လည်ပတ်လုပ်ကိုင်သူတွေကို ပစ်မှတ်ထားတာဖြစ်ပါတယ်။

အီရန်တော်လှန်ရေးအစောင့်တပ်ဖွဲ့ (IRGC) က ဒုံးကျည်နဲ့ အဆင့်မြင့် သမားရိုးကျ စစ်လက်နက်တွေကို ထုတ်လုပ်ရာမှာ လိုအပ်တဲ့ အခြေခံစက်ပစ္စည်းတွေ ရရှိအောင် ကူညီပေးနေတဲ့အပြင် ဒရုန်းတွေကို တတိယနိုင်ငံတွေဆီ ဖြန့်ချိရာမှာလည်း ပါဝင်နေတဲ့ ကွန်ရက်တွေကိုပါ ဟန့်တားလိုက်တာ ဖြစ်ပါတယ်။

အမေရိကန်အစိုးရဟာ ၂၀၂၅ ခုနှစ်အတွင်း အီရန်အပေါ် “အမြင့်ဆုံးဖိအားပေး” တဲ့ မူဝါဒအောက်မှာ လူပုဂ္ဂိုလ်တွေ၊ သင်္ဘောတွေနဲ့ လေယာဉ်တွေ စုစုပေါင်း ၈၇၅ ခုကျော်ကို အရေးယူထားပါတယ်။

အမေရိကန်သမ္မတ ဒေါ်နယ်ထရမ့်ပ်ကတော့ အီရန်အနေနဲ့ နျူကလီးယားလက်နက် ပိုင်ဆိုင်ခွင့်ကို လုံးဝခွင့်ပြုမှာမဟုတ်ဘူးလို့ အင်္ဂါနေ့မှာ သတိပေးခဲ့ပါတယ်။

ဒီလိုတင်းမာမှုတွေရှိနေပေမဲ့ အမေရိကန်နဲ့ အီရန်တို့အကြား ဆွေးနွေးပွဲအသစ်ကို ဂျီနီဗာမှာ ဖေဖော်ဝါရီ ၂၆ ရက် ပြုလုပ်ဖို့ စီစဉ်ထားပြီး အဲဒီဆွေးနွေးပွဲမှာ အီရန်ရဲ့ နျူကလီးယားအစီအစဉ်၊ ယူရေနီယံ အဆင့်မြှင့်တင်မှုနဲ့ အရေးယူပိတ်ဆို့မှု လျှော့ပေါ့ရေးတို့ကို အဓိကထား ဆွေးနွေးမယ်လို့ မျှော်လင့်ရပါတယ်။

လေ့လာသူတွေကတော့ အခုဆွေးနွေးပွဲဟာ အမေရိကန်နဲ့ အစ္စရေးတို့က အီရန်ကို စစ်ရေးအရ ပူးပေါင်းတိုက်ခိုက်မှု မလုပ်ခင် နောက်ဆုံးဖြစ်နိုင်တဲ့ သံတမန်ရေးရာ အခွင့်အလမ်း ဖြစ်နိုင်တယ်လို့ သုံးသပ်နေကြပါတယ်။

Source: Reuters