ဧရာဝတီတိုင်း၊ သာပေါင်းနဲ့ ရေကြည်မြို့နယ်မှာ တာဝန်ချထားတဲ့ စစ်ကောင်စီတပ်သား ၂၃ ယောက် ထွက်ပြေးသွားပြီး ၅ ယောက် ပြန်လည်ဖမ်းဆီးခံထားရတယ်လို့ ဧရာဝတီတိုင်း တပ်ရင်းနဲ့ နီးစပ်သူဆီက သိရပါတယ်။

ရခိုင်ပြည်နယ်နဲ့ ထိစပ်နေပြီး တိုက်ပွဲဖြစ်နေတဲ့ ရေကြည်မြို့နယ်နဲ့ သာပေါင်းမြို့နယ်တို့ကနေ ဖေဖော်ဝါရီ ၂၀ ရက်ကနေ ၂၅ ရက်အထိ ၅ ရက်အတွင်း တပ်ကြပ်ကြီး အဆင့်ရှိသူ အပါအဝင် ၂၃ ယောက် ထွက်ပြေးသွားခဲ့ပြီး ၅ ယောက်ဟာ ဖေဖော်ဝါရီ ၂၄ ရက် ညက ပြန်လည်ဖမ်းဆီးခံထားရတယ်လို့ သိရပါတယ်။

ပုသိမ် အနောက်တောင်တိုင်းစစ်ဌာနချုပ်နဲ့ နီးစပ်သူက “စစ်မြေပြင်ကနေပဲ ပြေးတာလို့ ပြောရမယ်။ ထွက်ပြေးတာ ၂၃ ယောက်ပါ၊ ၅ ယောက် ပြန်မိထားတာ။ တနေ့တည်း ထွက်ပြေးတာမဟုတ်ဘူး။ ပြန်ဖမ်းမိတဲ့သူတွေကတော့ တနေ့တည်းပြန်မိခဲ့တာ” လို့ ပြောပါတယ်။

ထွက်ပြေးသွားတဲ့ စစ်ကောင်စီတပ်သား ၂၃ ယောက်ဟာ သာပေါင်းမြို့နယ်ထဲက သာပေါင်းကလေး၊ သစ်ဆိမ့်ကုန်း၊ တရော်ကုန်း၊ ယင်းဇယ် စတဲ့ကျေးရွာတွေဘက်မှာ တာဝန်ချထားစဉ် တပ်ကြပ်ကြီး အပါအဝင် ၁၉ ယောက်နဲ့ ရေကြည်မြို့နယ်၊ ငါးသိုင်းချောင်းမြို့ အမြောက်တပ် အမတ ၃၄၄ ကနေ ၄ ယောက် ဖြစ်တယ်လို့ သိရပါတယ်။

သာပေါင်းအခြေစိုက် ခလရ ၃၀၈ တပ်ရင်းနဲ့ နီးစပ်သူက “ထွက်ပြေးသွားတာလို့ သိရတယ်။ ထွက်ပြေးသွားတဲ့ စစ်ကောင်စီတပ်သားတွေက အရင်တပ်သားတွေလား၊ စစ်မှုထမ်း လူငယ်တွေလား မသိသေးဘူး။ အရာရှိတွေက အရက်မူးနေချိန် ပြေးတာလို့ သိရတယ်” လို့ ပြောပါတယ်။

ပြန်လည်ဖမ်းမိတဲ့ စစ်ကောင်စီတပ်သား ၅ ယောက်ဟာ သာပေါင်းမြို့နယ်ကနေ ထွက်ပြေးတဲ့ တပ်သားတွေဖြစ်ပြီး အုပ်ချုပ်ရေးမှူးတွေနဲ့ ပြည်သူ့စစ်တွေက ပူးပေါင်းဖမ်းဆီးပေးတာလို့ သိရပါတယ်။

ဒါ့အပြင် ပြန်လည်ဖမ်းဆီးခံရတဲ့ တပ်သား ၅ ယောက်ကို စစ်ကောင်စီတပ်က ရိုက်နှက် နေပူလှန်းတာတွေ လုပ်ပြီး ချုပ်နှောင်ထားကာ ထွက်ပြေးစစ်သားတွေကိုလည်း ချိတ်ဆက် စုံစမ်းရှာဖွေနေတယ်လို့ သိရပါတယ်။

အဲဒီ ထွက်ပြေးတဲ့ စစ်ကောင်စီတပ်သားတွေကို ပြန်လည်ဖမ်းမိပါက ရိုက်နှက်တာ၊ ခြေလက်တွေကို သေနတ်နဲ့ပစ်ခတ်တာ၊ နေပူလှန်းတာ စတဲ့ ပုံစံအမျိုးမျိုးနဲ့ အပြစ်ပေးတဲ့အပြင် တခြားဒေသ ရှေ့တန်းကို ပြောင်းရွှေ့ စေလွှတ်တာတွေ လုပ်တယ်လို့ စစ်ကောင်စီတပ်နဲ့ နီးစပ်သူဆီက သိရပါတယ်။