ပြည်သူ့ကာကွယ်ရေးတပ်မတော် မန္တလေး (PDF-MDY) အနေနဲ့ NUG ရဲ့ ကာကွယ်ရေးဝန်ကြီးဌာန၊ စစ်ရုံးချုပ်ကွပ်ကဲ မှုအောက်ကနေ ”အထူးလှုပ်ရှားတပ်မ” အဖြစ် ဆက်လက် တိုက်ပွဲဝင်သွားမယ်လို့ PDF-MDY တည်ထောင်ခြင်း ၅ နှစ်ပြည့် ဒီကနေ့ ဖေဖော်ဝါရီ ၂၅ ရက်မှာ ကြေညာပါတယ်။

ထုတ်ပြန်ချက်မှာတော့ “စစ်ရုံးချုပ်၏ ကွပ်ကဲမှုအောက်တွင် ‘အထူးလှုပ်ရှားတပ်မ’ အဖြစ် တော်လှန်ရေးတာဝန်များကို ဆက်လက်ထမ်းဆောင်လျက်ရှိပြီး စစ်အာဏာရှင်စနစ် အမြစ်ပြတ်သည်အထိ ဦးလည်မသုန် တိုက်ပွဲဝင်သွားမည် ဖြစ်ပါကြောင်း ကတိသစ္စာပြုအပ်ပါသည်” လို့ ဖော်ပြထားပါတယ်။

‘အထူးလှုပ်ရှားတပ်မ’ (PDF-MDY)  ရဲ့ တည်ထောင်ခြင်း ၅ နှစ်ပြည့်အထိမ်းအမှတ် အမျိုးသားညီညွတ်ရေးအစိုးရ (NUG) ကာကွယ်ရေးဝန်ကြီးဌာနက “နွေဦးတော်လှန်ရေးသမိုင်းတလျှောက် စုစည်းကျစ်လျစ်မှု၊ စစ်ပုံကျမှု နှင့် တိုက်ခိုက်ရေးကဏ္ဍများတွင် ထူးခြားပြောင်မြောက်သည့် ဂုဏ်ထူးဝိသေသများနှင့် ပြည့်စုံပြီး ပြည်သူလူထု၏ အထူးအားကိုးယုံကြည်မှုကို ရရှိခဲ့သည့် တပ်ဖွဲ့တခုအဖြစ် ၁၀၂၇ စစ်ဆင်ရေးနဲ့ ရှမ်း-မန်း စစ်ရေးအပါအဝင် စစ်နယ်မြေအသီးသီးမှာ စွမ်းဆောင်ရည်ပြသနိုင်တယ်” လို့ ဂုဏ်ပြုသဝဏ်လွှာတွေ ပေးပို့ထားပါတယ်။

ပြည်သူ့ကာကွယ်ရေးတပ်မတော် (မန္တလေး) ဟာ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန လက်အောက်က လှုပ်ရှားနေတဲ့ တပ်တခုဖြစ်ပြီး ၂၀၂၁ ခု ဖေဖော်ဝါရီ ၂၅ ရက်မှာ စတင်တည်ထောင်ခဲ့တာပါ။

ပြည်သူ့ကာကွယ်ရေးတပ်မတော် (မန္တလေး) ၅ နှစ်ပြည့်နေ့အတွက် ဓနုပြည်သူ့လွတ်မြောက်ရေးတပ်ဦး (DPLF)၊ ကရင်နီအမျိုးသားများကာကွယ်ရေးတပ် (KNDF)၊ ဗမာလွတ်မြောက်ရေးဒီမိုကရက်တစ်တပ်ဦး (BLDF) နဲ့ ပြည်သူ့ကာကွယ်ရေးတပ်မတော် (မိုးကုတ်ဗျူဟာ) တို့ကလည်း စစ်အာဏာရှင်အမြစ်ဖြတ်ရေး အတူတကွပူးပေါင်းကာ ဆက်လက်တိုက်ပွဲဝင်သွားမယ်လို့ ဂုဏ်ပြုသဝဏ်လွှာ အသီးသီးပေးပို့ခဲ့ကြပါတယ်။