ရုရှားနိုင်ငံအတွင်း ဖြစ်ပွားနေတဲ့ အကြမ်းဖက်တိုက်ခိုက်မှုတွေကို အနောက်အုပ်စု ထောက်လှမ်းရေးတွေရဲ့ အကူအညီနဲ့ ယူကရိန်းက လုပ်ဆောင်တာလို့ ရုရှားသမ္မတ ဗလာဒီမာ ပူတင်က စွပ်စွဲလိုက်ပါတယ်။

ဒါကိုတုံ့ပြန်ဖို့အတွက် ဖက်ဒရယ်လုံခြုံရေးဝန်ဆောင်မှု (FSB) ကို ရုရှားရဲ့ စွမ်းအင်နဲ့ သယ်ယူပို့ဆောင်ရေး အခြေခံအဆောက်အအုံတွေကို ကာကွယ်ရေး တိုးမြှင့်လုပ်ဆောင်ဖို့လည်း ပူတင်က ဖေဖော်ဝါရီ ၂၄ ရက်မှာ အမိန့်ထုတ်လိုက်ပါတယ်။

ယူကရိန်းစစ်ပွဲ ၄ နှစ်ပြည့်မြောက်တဲ့နေ့မှာ ရုရှားဖက်ဒရယ်လုံခြုံရေးဌာန (FSB) အရာရှိတွေကို ပြောကြားတဲ့ မိန့်ခွန်းအတွင်း ပူတင်က ရုရှားရဲ့ ရန်သူတွေဟာ မော်စကို ကို အလွန်အကျွံ ဖိအားပေးလာရင် နောင်တရလိမ့်မယ်လို့လည်း သတိပေးပါတယ်။

ဒါက ရုရှားကို စစ်မြေပြင်မှာ မဟာဗျူဟာအရ အနိုင်ယူဖို့ မအောင်မြင်တာကြောင့် တယောက်ချင်းနဲ့ အစုလိုက် အကြမ်းဖက်နည်းလမ်းတွေကို အသုံးပြုလာနေတာဖြစ်ပြီး အဲဒီထဲမှာ မြို့တွေကို ဗုံးကြဲတိုက်ခိုက်တာ၊ အခြေခံအဆောက်အအုံတွေကို ဖျက်ဆီးတာနဲ့ အစိုးရနဲ့ စစ်ဘက်အရာရှိတွေကို လုပ်ကြံသတ်ဖြတ်တာတွေ ပါဝင်တယ်လို့လည်း ပူတင်က FSB အရာရှိတွေကို ပြောပါတယ်။

ရုရှားကို အပြီးသတ် အနိုင်ယူဖို့ ကြိုးပမ်းနေပြီးတော့ ဘာနည်းလမ်းမျိုးမဆို အသုံးချနိုင်ကြောင်းလည်း ပူတင်က ပြောပါတယ်။

စစ်ပွဲကာလအတွင်း ယူကရိန်းဘက်က ရုရှားရဲ့ ဆီသိုလှောင်ရုံတွေ၊ ရေနံသန့်စင်စက်ရုံတွေနဲ့ ဆိပ်ကမ်းတွေကို ထပ်ခါတလဲလဲ တိုက်ခိုက်ခဲ့တဲ့အပြင် ထိပ်တန်းစစ်ဘက်ခေါင်းဆောင်တွေ သတ်ဖြတ်ခံရတဲ့ ဖြစ်စဉ်တွေမှာလည်း ယူကရိန်းမှာ တာဝန်ရှိကြောင်း မော်စကိုက စွပ်စွဲထားပါတယ်။

ပင်လယ်နက်အောက်ရှိ ရုရှားစွမ်းအင်ပိုက်လိုင်းတွေကိုလည်း တိုက်ခိုက်ခံရနိုင်ကြောင်း သမ္မတပူတင်က ရုပ်သံမိန့်ခွန်းထဲမှာ ခန့်မှန်းပြောပါတယ်။

အခုလို ခြိမ်းခြောက်မှုတွေကို ပိုပြီး မြန်ဆန်ထိရောက်စွာ တုံ့ပြန်နိုင်ဖို့အတွက် လုံခြုံရေးဆိုင်ရာ အမိန့်သစ်တွေကိုလည်း ထုတ်ပြန်လိုက်ပါတယ်။

စွမ်းအင်နဲ့ သယ်ယူပို့ဆောင်ရေး အဆောက်အအုံတွေအပြင် အများပြည်သူ စုဝေးရာ နေရာတွေကို အကြမ်းဖက်မှုရန်ကနေ ကာကွယ်ဖို့ လုံခြုံရေးအဆင့်မြှင့်တင်ဖို့နဲ့ လိုအပ်ရင် အဆင့်မြင့် လုံခြုံရေးပစ္စည်းကိရိယာတွေ ထပ်မံဖြည့်ဆည်းဖို့ ညွှန်ကြားခဲ့ပါတယ်။

ဒါ့အပြင် နိုင်ငံတော်ရဲ့ စစ်ရေးနဲ့ ဗျူဟာမြောက် လျှို့ဝှက်ချက်တွေကို ကာကွယ်ဖို့လည်း သမ္မတပူတင်က အထူးသတိပေးခဲ့ပါတယ်။

Source: Reuters