မြောက်ကိုရီးယားခေါင်းဆောင် ကင်မ်ဂျုံအန်းဟာ လာမဲ့ ၅ နှစ်အတွင်း နိုင်ငံရဲ့ စီးပွားရေးအရည်အသွေးကို ပိုမိုခိုင်မာအောင်နဲ့ တိုးတက်အောင် လုပ်ဆောင်သွားမယ်လို့ ပြောတဲ့အကြောင်း နိုင်ငံပိုင် KRT ရုပ်သံက ဖေဖော်ဝါရီ ၂၄ ရက်မှာ ထုတ်ပြန်ပါတယ်။
ပြီးခဲ့တဲ့ သီတင်းပတ်ကတည်းက မြောက်ကိုရီးယားဟာ လာမဲ့ ၅ နှစ်အတွက် အဓိကမူဝါဒတွေ ချမှတ်မဲ့ “ကိုရီးယားအလုပ်သမားပါတီရဲ့ ၉ ကြိမ်မြောက် ညီလာခံ” ကို ကျင်းပနေတာပါ။
ညီလာခံကို ဖေဖော်ဝါရီ ၂၃ ရက် တနင်္လာနေ့မှာလည်း ဆက်လက်ကျင်းပနေခဲ့ပြီး အဖွဲ့ဝင်တွေဟာ စစ်ရေး၊ နိုင်ငံခြားရေး မူဝါဒ၊ စက်မှုနဲ့ စိုက်ပျိုးရေး အပါအဝင် ကဏ္ဍအသီးသီးအတွက် ၅ နှစ်စာ စီမံကိန်းတွေနဲ့ ရည်မှန်းချက်တွေကို စတင်ရေးဆွဲနေကြပြီလို့ KRT သတင်းမှာ ပြောသွားပါတယ်။
တနင်္လာနေ့က ပြောကြားခဲ့တဲ့ မိန့်ခွန်းထဲမှာ လာမဲ့ ၅ နှစ်ကာလကို “အရှိန်အဟုန်နဲ့ တိုးတက်မဲ့အဆင့်” လို့ ကင်မ်ဂျုံအန်းက တင်စားပြောပါတယ်။
စီမံကိန်းအသစ်တွေကို ကောင်းကောင်းမွန်မွန် စီမံခန့်ခွဲနိုင်ဖို့အတွက် အတွေးအခေါ်၊ နည်းပညာနဲ့ ယဉ်ကျေးမှုပိုင်းဆိုင်ရာတွေကို တော်လှန်ပြောင်းလဲကြဖို့ တိုက်တွန်းခဲ့တယ်လို့လည်း KRT မှာ ဖတ်ကြားခဲ့ပါတယ်။
Source: Reuters
