ဒီနေ့မနက်အစောပိုင်းက ကစားခဲ့တဲ့ ပရီးမီးယားလိဂ်ပွဲစဉ်မှာ မန်ချက်စတာယူနိုက်တက်အသင်းဟာ တိုက်စစ်မှူး ဘင်ဂျမင်ဆက်စ်ကိုရဲ့ တလုံးတည်းသော အနိုင်ဂိုးနဲ့ အဲဗာတန်အသင်းကို ၁ ဂိုး ဂိုးမရှိနဲ့ အနိုင်ရရှိခဲ့ပါတယ်။
အဲဗာတန်ရဲ့ ကွင်းသစ်ဖြစ်တဲ့ ဟေးလ် ဒစ်ကင်ဆန် စတေဒီယံမှာ ပထမဆုံးအကြိမ် သွားရောက်ကစားခဲ့တာဖြစ်ပြီး လူစားဝင်တိုက်စစ်မှူး ဆက်စ်ကိုက ပွဲကစားချိန် မိနစ် ၇၀ မှာ အမ်ဘူမိုရဲ့ ဖန်တီးပေးမှုကနေတဆင့် အနိုင်ဂိုးကို သွင်းယူပေးခဲ့တာပါ။
ဆက်စ်ကိုဟာ နည်းပြသစ် မိုက်ကယ်ကာရစ် လက်ထက်မှာ ပွဲထွက်ခွင့် မရသေးပေမဲ့ နောက်ဆုံး ၇ ပွဲမှာ ၆ ဂိုးအထိ သွင်းယူကာ အသင်းအတွက် ‘Super Sub’ အဖြစ် ခြေစွမ်းပြနေပါတယ်။
မိုက်ကယ်ကာရစ် တာဝန်ယူပြီးနောက်ပိုင်း ၆ ပွဲမှာ ၅ ပွဲအထိ အနိုင်ရခဲ့တဲ့ မန်ယူနိုက်တက်ဟာ အခုနိုင်ပွဲကြောင့် ချဲလ်ဆီးကိုကျော်ကာ အဆင့် ၄ နေရာကို တက်လှမ်းနိုင်ခဲ့သလို အဆင့် ၃ က အက်စတွန်ဗီလာနဲ့လည်း ၃ မှတ်အကွာကို ရောက်ရှိလာခဲ့ပါတယ်။
နည်းပြ မိုက်ကယ်ကာရစ်ကလည်း အသင်းရဲ့ စုစည်းမှုနဲ့ ခံစစ်ပိုင်း ကျစ်လျစ်မှုကို ပွဲအပြီးမှာ ချီးကျူးစကား ပြောကြားခဲ့ပါတယ်။
