ရန်ကုန်၊ ရွှေပြည်သာမြို့နယ်၊ ဝါးတရာစက်မှုဇုန်မှာ မနေ့က မီးလောင်ခဲ့တဲ့ M-Brother အထည်ချုပ်စက်ရုံကို ၁၃ နာရီကျော်ကြာငြှိမ်းသတ်ခဲ့ရတယ်လို့ မီးသတ်တပ်ဖွဲ့ရဲ့ ထုတ်ပြန်ချက်အရ သိရပါတယ်။
အဲဒီစက်ရုံမှာ ဖေဖော်ဝါရီ ၁၈ ရက် မွန်းလွဲ ၁၂ နာရီကျော်မှာ မီးစလောင်ခဲ့ပြီး ရွှေပြည်သာမြို့နယ် မီးသတ်စခန်းက မီးငြှိမ်းသတ်ယာဉ် ၄ စီးနဲ့ ရေသယ်ယာဉ် ၂ စီး သွားရောက်ငြှိမ်းသတ်ပြီး မကြာခင်မှာပဲ နောက်ထပ် မီးငြှိမ်းသတ်ယာဉ် ၁၀ စီးပါတဲ့ Level 1 အဆင့် ယာဉ်အုပ်စုနဲ့ ငြှိမ်းသတ်ခဲ့ရပါတယ်။
မွန်းလွဲ ၁ နာရီမှာတော့ နောက်ထပ် မီးငြှိမ်းသတ်ယာဉ် ၁၀ စီးပါတဲ့ Level 2 ယာဉ်အုပ်စု၊ ဌာနချုပ်ယာဉ်အုပ်စုတို့နဲ့ ငြှိမ်းသတ်ခဲ့ရတာပါ။
အဲဒီနောက် မွန်းလွဲ ၁ နာရီခွဲကျော်မှာ မီးထိန်းနိုင်တယ်လို့ မီးသတ်တပ်ဖွဲ့က ထုတ်ပြန်ခဲ့ပေမဲ့ မီးကို မငြှိမ်းနိုင်သေးဘဲ မီးကျန်တွေက ပြန်လောင်တာကြောင့် ဆက်လက်ငြှိမ်းသတ်ရင်း ဖေဖော်ဝါရီ ၁၉ ရက် မနက် ၁ နာရီခွဲမှာမှ မီးငြိမ်းသွားတယ်လို့ ထုတ်ပြန်ထားပါတယ်။
မီးငြှိမ်းသတ်တာကို လူမှုကူညီရေးအသင်းအဖွဲ့တွေကလည်း လာရောက်ကူညီကြတာ တွေ့ရပါတယ်။
ဒီနေ့ မွန်းတည့် ၁၂ နာရီလောက်မှာ မီးကြွင်းမီးကျန်တွေကနေ မီးပြန်လောင်တယ်လို့ လူမှုကူညီရေးအသင်းတွေဆီက သိရပြီး မီးသတ်ကားတွေပြန်လာတာတွေ့ရတယ်လို့လည်း အနီးအနားနေသူတွေက ဆိုပေမဲ့ မီးသတ်တပ်ဖွဲ့က သတင်းထုတ်ပြန်တာတွေ မရှိပါဘူး။
မီးလောင်တာကြောင့် စက်ရုံက အလုပ်သမား ၂ ယောက်သေဆုံးတယ်လို့ ရွှေပြည်သာမြို့နယ် အထည်ချုပ်လုပ်သားများ သမဂ္ဂကဆိုပေမဲ့ နောက်ဆက်တွဲ အသေးစိတ်ကိုတော့ မသိရသေးပါဘူး။
