သိမ်းပိုက်ထားတဲ့ အနောက်ဘက်ကမ်းဒေသကို ပိုတင်းတင်းကျပ်ကျပ် ထိန်းချုပ်ဖို့နဲ့ အခြေချနေထိုင်သူတွေ မြေယာဝယ်ရာမှာ ပိုလွယ်စေဖို့ အစ္စရေးရဲ့ ဆုံးဖြတ်ချက်ကို ကုလသမဂ္ဂဆိုင်ရာ ပါလက်စတိုင်း သံအမတ်ကြီး ရီယတ်မန်ဆော်နဲ့ အတူ ကုလသမဂ္ဂအဖွဲ့ဝင် နိုင်ငံတွေနဲ့ အဖွဲ့အစည်းတွေ စုစုပေါင်း ၈၀ ကျော်က အပြင်းအထန် ရှုတ်ချခဲ့ပါတယ်။

ပါလက်စတိုင်းတွေက ဒီလုပ်ရပ်ကို "လက်တွေ့ကျကျ သိမ်းပိုက်ခြင်း"လို့ ခေါ်ဆိုခဲ့ကြပါတယ်။

အစ္စရေးရဲ့ မကြာသေးမီက ဆုံးဖြတ်ချက်တွေဟာ အရှေ့ဂျေရုဆလင်အပါအဝင် ၁၉၆၇ ခုနှစ်ကစပြီး သိမ်းပိုက်ထားတဲ့ နယ်မြေမှာ တရားမဝင်ရှိနေတယ်လို့ သူခေါ်ဆိုတဲ့အရာက တိုးချဲ့သိမ်းပိုက်တာနဲ့ ညီမျှတယ်လို့ မန်ဆော်က သတင်းထောက်တွေကို နယူးယောက်မြို့က ကုလသမဂ္ဂဌာနချုပ်မှာ ဖေဖော်ဝါရီ ၁၇ ရက်က ပြောပါတယ်။

မန်ဆော်က ပါလက်စတိုင်းနယ်မြေတွေရဲ့ လူဦးရေဖွဲ့စည်းပုံ ဒါမှမဟုတ် တရားဝင်အဆင့်အတန်းကို ပြောင်းလဲစေတဲ့ ဘယ်လိုခြေလှမ်းတွေကိုမဆို ငြင်းပယ်ခဲ့ပါတယ်။

ဒါဟာ ပဋိပက္ခကို အဆုံးသတ်ဖို့နဲ့ ညှိနှိုင်းထားတဲ့ ငြိမ်းချမ်းရေးသဘောတူညီချက်တရပ်ရဖို့ ကြိုးပမ်းချက်တွေကို အန္တရာယ်ဖြစ်စေတဲ့ နိုင်ငံတကာ ဥပဒေကို ချိုးဖောက်ခြင်းပဲလို့ သူက ဖော်ပြခဲ့ပါတယ်။

ဒီလို သိမ်းပိုက်ခြင်းကို ပါလက်စတိုင်းတွေက ဆန့်ကျင်တယ်လို့လည်း သံအမတ်ကြီးက ထပ်ပြောခဲ့ပါတယ်။ အနောက်ဘက်ကမ်းဟာ အနာဂတ်မှာ လွတ်လပ်တဲ့နိုင်ငံတခု ဖြစ်လာရေး ပါလက်စတိုင်းလူမျိုးတွေက ကြိုးစားနေတဲ့ နယ်မြေတွေထဲက တခုပါ။

နယ်မြေအများစုက အစ္စရေးစစ်တပ်ရဲ့ ထိန်းချုပ်မှုအောက်မှာရှိပါတယ်။ အနောက်နိုင်ငံတွေက ကျောထောက် နောက်ခံပေးထားတဲ့ ပါလက်စတိုင်း အာဏာပိုင်အဖွဲ့က စီမံခန့်ခွဲတဲ့ တချို့နေရာတွေမှာ ပါလက်စတိုင်းကိုယ်ပိုင်အုပ်ချုပ်ခွင့် အကန့်အသတ်နဲ့ ရှိနေပါတယ်။

ကုလသမဂ္ဂရဲ့ အမြင့်ဆုံးတရားရုံးက ၂၀၂၄ ခုနှစ်မှာ စည်းနှောင်မှုမရှိတဲ့ အကြံပေးချက်တရပ်ထဲမှာ အစ္စရေးရဲ့ ပါလက်စတိုင်းနယ်မြေတွေနဲ့ အဲဒီနေရာတွေမှာ အခြေချနေထိုင်မှုတွေဟာ တရားမဝင်ဘဲ အမြန်ဆုံးအဆုံးသတ်သင့်တယ်လို့ ပြောခဲ့ပါတယ်။ အစ္စရေးက အဲဒီအမြင်ကို ငြင်းဆိုခဲ့ပါတယ်။

Source:Reuters