စစ်တပ်အာဏာသိမ်းပြီးနောက် ၅ နှစ်တာကာလအတွင်း မြန်မာနိုင်ငံတဝန်း အကျဉ်းထောင်တွေမှာ ထောင်တွင်းဆန္ဒပြလှုပ်ရှားမှု အနည်းဆုံး ၁၈ ကြိမ် ဖြစ်ပွားခဲ့ပြီး နိုင်ငံရေးအကျဉ်းသား အပါအဝင် အကျဉ်းသား ၁၆ ယောက်ထက်မနည်း အသက်ဆုံးရှုံးခဲ့တယ်လို့ မြန်မာ့အကျဉ်းထောင်သက်သေ Myanmar Prison Witness က ဖေဖော်ဝါရီ ၁၆ ရက်မှာ ထုတ်ပြန်ပါတယ်။
ဒါ့အပြင် အကျဉ်းသား အယောက် ၄၀၀ လောက်ဟာလည်း ရိုက်နှက် နှိပ်စက်ခံရပြီး တိုက်ပိတ်ဒဏ် ချမှတ်ခံခဲ့ရပါတယ်လို့ ဆိုပါတယ်။
ဒီဖြစ်ရပ်တွေထဲမှာ အင်းစိန်နဲ့ မန္တလေး အိုးဘိုအကျဉ်းထောင်တွေမှာ ပြုလုပ်ခဲ့တဲ့ လှုပ်ရှားမှုတွေကိုတော့ အာဏာပိုင်တွေက အပြင်းထန်ဆုံး ဖိနှိပ် နှိမ်နှင်းခဲ့တယ်လို့လည်း သိရပါတယ်။
စစ်အာဏာသိမ်းလိုက်တဲ့ ၂၀၂၁ ခုနှစ် ဖေဖော်ဝါရီ ၁ ရက်ကစပြီး အကျဉ်းထောင်တွေဟာ ဖိနှိပ်ရေးယန္တရားအဖြစ် ပြောင်းလဲသွားခဲ့တယ်လို့လည်း Myanmar Prison Witness ရဲ့ ထုတ်ပြန်ချက်မှာ ဖော်ပြပါတယ်။
နိုင်ငံရေးအကျဉ်းသားတွေကတော့ မတရား ဖမ်းဆီးချုပ်နှောင်မှုတွေ ကြားကနေ အကျဉ်းသားအခွင့်အရေးနဲ့ လွတ်မြောက်ရေးကို ဆက်လက်တောင်းဆိုခဲ့ကြသလို ထောင်တွင်းအသံကို ပြင်ပကို ပျံ့နှံ့အောင် ကြိုးပမ်းလှုပ်ရှားခဲ့ကြတယ်လို့ Myanmar Prison Witness က ထုတ်ပြန်ပြောဆိုပါတယ်။
