ပြီးခဲ့တဲ့ ဖေဖော်ဝါရီ ၁၂ ရက်နဲ့ ၁၃ ရက်နေ့တွေမှာ အမေရိကန်ပြန်ထောင်စု၊ နယူးယောက်မြို့၊ ကုလသမဂ္ဂဌာနချုပ်မှာ ကျင်းပခဲ့တဲ့ IPU–UN ပူးပေါင်း လွှတ်တော်ဆိုင်ရာ ကြားနာပွဲကို မြန်မာလွှတ်တော်ကိုယ်စားလှယ်အဖွဲ့ တက်ရောက်ခဲ့တယ်လို့ CRPH က ဖေဖော်ဝါရီ ၁၄ ရက်မှာ ထုတ်ပြန်ပါတယ်။

“လွှတ်တော်များနှင့် ကုလသမဂ္ဂ- အတူတကွ ပိုမိုကောင်းမွန်စွာ ပူးပေါင်း၍ ပြည်သူများအတွက် ဆောင်ရွက်ခြင်း” ဆိုတဲ့ ဆောင်ပုဒ်နဲ့ ကျင်းပတဲ့ ဒီကြားနာပွဲကို နိုင်ငံတကာ ပါလီမန်များအဖွဲ့ ဥက္ကဋ္ဌ ဒေါက်တာ တူလီယာ အက်ဆန်နဲ့ ကုလသမဂ္ဂ အထွေထွေညီလာခံ ဥက္ကဋ္ဌ အန်နယ်လီနာ ဘေးအာဘာ့ခ်တို့က ဖွင့်လှစ်အမှာစကား ပြောကြားခဲ့ကြပါတယ်။

ပထမနေ့ ဆွေးနွေးပွဲမှာ မြန်မာကိုယ်စားလှယ် ဒေါ်မြမျိုးအေးက နိုင်ငံတကာ ကတိကဝတ်တွေဟာ လက်တွေ့ အကောင်အထည်ဖော်မှုနဲ့ ကွာဟချက် ကြီးထွားနေတယ်လို့ ထောက်ပြခဲ့ပါတယ်။

မြန်မာနိုင်ငံမှာ ဒီမိုကရေစီ အသွင်ကူးပြောင်းရေး ရပ်တန့်ခံရပြီး ၅ နှစ်အကြာ လူဦးရေ ၁၆ သန်းကျော် လူသားချင်းစာနာအကူအညီ လိုအပ်နေကာ ၄ သန်းနီးပါး နေရပ်စွန့်ခွာနေရတယ်လို့ ပြောကြားခဲ့တယ်လို့ ထုတ်ပြန်ပါတယ်။

ဒုတိယနေ့မှာ ဒေါ်မြတ်သီတာထွန်းက ဒီမိုကရေစီ နောက်ပြန်ဆွဲမှုဟာ ကမ္ဘာတဝန်း မြင်သာ ထင်ရှားလာနေပြီး မြန်မာနိုင်ငံမှာတော့ ၂၀၂၁ စစ်အာဏာသိမ်းမှုကြောင့် တိုက်ရိုက် အကြမ်းဖက် တိုက်ခိုက်ခံရခြင်း ဖြစ်တယ်လို့ ပြောကြားခဲ့ပါတယ်။

ဒီကြားနာပွဲကို မြန်မာလွှတ်တော်ကိုယ်စားလှယ်တွေအပြင် ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်းနဲ့ သံရုံးတာဝန်ရှိသူတွေလည်း တက်ရောက်ခဲ့ကြပါတယ်။