ကချင်ပြည်နယ် မြစ်ကြီးနားမြို့နယ်၊ တာလောကြီးရွာကို စစ်ကောင်စီတပ်က ဖေဖော်ဝါရီ ၁၃ ရက် မနက် ၁၁ နာရီလောက်မှာ လေကြောင်းကနေ ဗုံးကြဲတိုက်ခိုက်တာကြောင့် အရပ်သား ၁ ယောက် သေဆုံးပြီး ၈ ယောက် ဒဏ်ရာရတယ်လို့ ဒေသခံတွေဆီက သိရပါတယ်။

မြစ်ကြီးနားမြို့​ရဲ့ ဧရာဝတီမြစ်တဘက်ကမ်းမှာရှိတဲ့ တာလောကြီးရွာကို စစ်ကောင်စီတပ်က ဂျက်ဖိုက်တာနဲ့ ၁၁ ကြိမ် လှည့်ပတ်ပစ်ခတ်တာဖြစ်ပြီး ကလေးငယ် ၃ ယောက် အပါအဝင် ၈ ယောက် ဒဏ်ရာရတယ်လို့ သိရပါတယ်။

မြစ်ကြီးနားမြို့ဒေသခံတယောက်က “ဦးသိန်းဇော်က သေသွားတယ်။ ကလေး ၃ ဦးအပါ ၇ ဦး ဒဏ်ရာရပါတယ်။ သူတို့အမည်ကိုတော့ လုံခြုံရေးအရ မပြောချင်ဘူး။ သူတို့ကို မြစ်ကြီးနားဆေးရုံကို ပို့ထားရတယ်” လို့ DVB ကိုပြောပါတယ်။

သေဆုံးသူ ဦးသိန်းဇော်ဟာ အသက် ၅၀ အရွယ်ရှိပြီး ဒဏ်ရာရသူတွေထဲမှာ ၅ နှစ်အရွယ်၊ ၇ နှစ်အရွယ်နဲ့ ၁၂ နှစ်အရွယ်ကလေးတွေပါတယ်လို့ သိရပါတယ်။

ဖေဖော်ဝါရီ ၁၂ ရက်က မြစ်ကြီးနားလေဆိပ်ရဲ့ လေယာဉ်ပြေးလမ်းနဲ့ အနီးဝန်းကျင်နေရာတွေကို အသေခံဒရုန်းနဲ့ တိုက်ခိုက်ခံခဲ့ရပြီးနောက် စစ်ကောင်စီဟာ မြစ်ကြီးနားမြို့ကနေ လက်ရှိ တိုက်ပွဲပြင်းထန်နေတဲ့ ဝိုင်းမော်မြို့ကို လက်နက်ကြီးတွေနဲ့ ပစ်ခတ်ခဲ့ပါတယ်။