အမေရိကန်မှာ နှစ် ၂၀ ကျော်အတွင်း အဆိုးရွားဆုံး ဝက်သက်ကူးစက်မှုကြောင့် အပြင်းအထန် ထိခိုက်ခဲ့ရတဲ့ တောင်ကယ်ရိုလိုင်းနားပြည်နယ်မှာ မကြာသေးခင်လတွေအတွင်း ဝက်သက်ကာကွယ်ဆေးထိုးနှုန်း ၂ ဆ တိုးလာပါတယ်။

ဒါပေမဲ့ ကျန်းမာရေးအရာရှိတွေက ဗိုင်းရပ်စ်ပျံ့နှံ့မှုကို ထိန်းချုပ်ဖို့ ကာကွယ်ဆေးထိုးဖို့ အများကြီး လိုအပ်တယ်လို့ သတိပေးခဲ့ပါတယ်။

တခြားဒေသတွေလိုပဲ ကိုဗစ်-၁၉ ကပ်ရောဂါနောက်ပိုင်း ကာကွယ်ဆေးထိုးဖို့ တွန့်ဆုတ်တာတွေ မြင့်တက်လာတာကြောင့် အမေရိကန် လူမှုအသိုက်အဝန်း အများအပြားဟာ ဝက်သက်နဲ့ တခြားကာကွယ်ဆေးတွေနဲ့ ကာကွယ်နိုင်တဲ့ရောဂါတွေ မကူးစက်အောင် ကာကွယ်နိုင်ခြေ နည်းပါးလာပါတယ်။

နောက်ဆုံးဖြစ်ပွားမှုရဲ့ ဗဟိုချက်ဖြစ်တဲ့ မြောက်ကယ်ရိုလိုင်းနား နယ်စပ်နားက စပါတန်ဘာ့ဂ်မြို့နယ်မှာ ထိုးနှံခဲ့တဲ့ ဝက်သက်၊ ပါးချိတ်ရောင်နဲ့ ရူဘယ်လာ (MMR) ကာကွယ်ဆေး အရေအတွက်ဟာ ရိုက်တာသတင်းဌာနနဲ့ မျှဝေထားတဲ့ ပြည်နယ်သတင်းအချက်အလက်တွေအရ ပြီးခဲ့တဲ့လေးလအတွင်း အရင်နှစ်က ကာလတူနဲ့ နှိုင်းယှဉ်ရင် ၁၀၂ ရာခိုင်နှုန်း တိုးလာပါတယ်။

ဇန်နဝါရီလမှာ နောက်ထပ် ကာကွယ်ဆေး ၁,၀၀၀ ကျော် ထိုးနှံပေးခဲ့ပါတယ်။ ပြည်နယ်တဝန်းမှာ လေးလတာကာလအတွင်း MMR ကာကွယ်ဆေးထိုးနှုန်းဟာ ၂၈ ရာခိုင်နှုန်း တိုးလာခဲ့ပါတယ်။

ဗိုင်းရပ်စ်တွေက နယ်နိမိတ်တွေကို မသိဘူးလို့ ရောဂါထိန်းချုပ်ရေးနဲ့ ကာကွယ်ရေးဌာနရဲ့ အမျိုးသားကာကွယ်ဆေးထိုးခြင်းနဲ့ အသက်ရှူလမ်းကြောင်းဆိုင်ရာ ရောဂါများဌာနရဲ့ ညွှန်ကြားရေးမှူးဟောင်း ဒေါက်တာ ဒမ်ထရီ ဒါစကာလာကစ်က ဇန်နဝါရီ ၁၅ ရက်မှာ ရိုက်တာသတင်းဌာနနဲ့ အင်တာဗျူးမှာ ပြောခဲ့ပါတယ်။

တောင်ကယ်ရိုလိုင်းနားပြည်နယ်ရဲ့ ကပ်ရောဂါဗေဒပညာရှင် ဒေါက်တာ လင်ဒါ ဘဲလ်က ပြည်နယ်တဝန်းမှာ အသက် ၆ လကနေ ၁၁ လအရွယ် ကလေးငယ်တွေကို MMR ကာကွယ်ဆေး ၁,၁၇၈ ကြိမ် ထိုးပေးခဲ့တယ်လို့ ရိုက်တာသတင်းဌာနကို ပြောပါတယ်။

ကာကွယ်ဆေးထိုးနှံမှု ၅၅ ရာခိုင်နှုန်းက စပါတန်ဘာ့ဂ်မြို့နယ်နဲ့ အိမ်နီးချင်း ဂရင်းဗီးလ်မြို့နယ်တို့မှာ ရှိပါတယ်။

အစောပိုင်းကာကွယ်ဆေးတွေဟာ ကလေးငယ်တွေကို ဝက်သက်ရောဂါကနေ ကာကွယ်ဖို့ မရှိမဖြစ် လိုအပ်တယ်လို့လည်း သူက ပြောခဲ့ပါတယ်။

Source: Reuters