ထိုင်း-မြန်မာနယ်စပ်၊ တာ့ခ်ခရိုင်၊ မဲဆောက်မှာ မြန်မာဘက်ကနေ ထိုင်းဘက်ကို ထွက်ပြေးလာတဲ့ တရုတ်နိုင်ငံသားတွေနဲ့  ပါကစ္စတန်နိုင်ငံသားတွေ စုစုပေါင်း ၁၀ ယောက်ကို ထိုင်းစစ်တပ်က  ဖေဖေါ်ဝါရီ  ၁၀ ရက်မှာ ဖမ်းဆီးလိုက်ပါတယ်။

ကရင်ပြည်နယ်၊ မြဝတီမြို့မြောက်ဘက်မှာ အွန်လိုင်းငွေလိမ်ကျားဖြန့်လုပ်နေတဲ့ တရုတ်နိုင်ငံသား ၇ ယောက်နဲ့ ပါကစ္စတန် နိုင်ငံသား ၃ ယောက်တို့ဟာ ဖေဖေါ်ဝါရီ ၁၀ ရက်မနက် ၁၁ နာရီလောက်မှာ ထိုင်းနိုင်ငံဘက်ကို တရားမဝင် တင်ရောက် ထွက်ပြေးလာစဉ် ထိုင်းစစ်တပ်က လှည့်ကင်းပြုလုပ်နေတဲ့အချိန်မှာ တွေ့ရှိလို့ ဖမ်းဆီးခဲ့တာလို့ နယ်စပ်သတင်းရင်းမြစ်ကနေ သိရပါတယ်။

အလားတူ ဖေဖော်ဝါရီ ၉ ရက်ကလည်း မဲဆောက်မြို့နယ်၊ မယ်ပအုပ်စုထဲမှာ တရားမဝင် ဝင်ရောက်လာတဲ့ တရုတ်နိုင်ငံသား ၁၀ ယောက် ဖမ်းဆီးရမိတယ်လို့ မန်နေဂျာအွန်လိုင်း ထိုင်းသတင်းမှာ ဖော်ပြပါတယ်။

ထိုင်းစစ်တပ် ရာ့ခ်မနူးစစ်ကြောင်းနဲ့ အမှတ် ၁၄၁၁ ခြေလျင်တပ်ရင်းက တပ်ဖွဲ့ဝင်တွေဟာ ဖေဖော်ဝါရီ ၉ ရက် ညက ဘန့်ဟွေ့ကလုတ်၊ ဘန့်ဝမ်းကယောက်အနီး သောင်ရင်းမြစ်ကမ်း တလျှောက်မှာ နယ်လှည့်လုံခြုံရေးစစ်ဆေးစဉ် သောင်ရင်းမြစ်ကို ဖြတ်ကျော်ဝင်ရောက်လာတဲ့ တရုတ်နိုင်ငံသား ၁၀ ယောက် ဖမ်းဆီးရမိခဲ့တာပါ။ 

အဲဒီထဲမှာ အမျိုးသား ၈ ယောက်၊ အမျိုးသမီး ၂ ယောက် ပါဝင်ပြီး မြန်မာဘက်ခြမ်း မြဝတီမှာ အလုပ်သွားလုပ်သူတွေဖြစ်ကြောင်းနဲ့ ကျားဖြန့်နှိမ်နင်းရေးတွေ ဆောင်ရွက်နေတာကြောင့်  ထိုင်းဘက်ခြမ်းကို ပြန်ကူးလာကြတာလို့ ဆိုပါတယ်။

သူတို့တွေဟာ ထိုင်းနိုင်ငံတွင်း နေထိုင်ခွင့် အထောက်အထားမရှိတာကြောင့် တရားမဝင် ဝင်ရောက်နေထိုင်မှုနဲ့ အရေးယူသွားမယ်လို့  တာဝန်ရှိသူတွေက ပြောပါတယ်။ 

Source:  MGROnline