ဖေဖော်ဝါရီ ၁၃ ရက်ကနေ ၂၂ ရက်အထိ ကျရောက်မဲ့ တရုတ်နှစ်သစ်ကူး အားလပ်ရက်ကာလအတွင်း ထိုင်းနိုင်ငံ လေဆိပ် ၆ ခုကတဆင့် ခရီးသည် ၄ သန်းကျော် ဖြတ်သန်းသွားလာလိမ့်မယ်လို့ ထိုင်းနိုင်ငံ လေဆိပ်များအာဏာပိုင်အဖွဲ့ (AOT) က ခန့်မှန်းထားတဲ့အကြောင်း Khaosod သတင်းတပုဒ်မှာ ဖော်ပြပါတယ်။

AOT အဖွဲ့ဥက္ကဋ္ဌ ဖာဗီနာ ဂျာရီရာသီတီဖွန်းက သုဝဏ္ဏဘူမိ၊ ဒွန်မောင်း၊ ချင်းမိုင်၊ မယ်ဖားလုံ-ချင်းရိုင်၊ ဖူးခက်နဲ့ ဟတ်ယိုင် လေဆိပ်တွေမှာ ခရီးသည်သွားလာမှုမှာ နိုင်ငံတကာခရီးသည် ၂ ဒသမ ၆ သန်းနီးပါးနဲ့ ပြည်တွင်းခရီးသည် ၁ ဒသမ ၅၁ သန်း အပါအဝင် စုစုပေါင်း ၄ ဒသမ ၁၁ သန်းထိ ရှိလာနိုင်တယ်လို့ ပြောပါတယ်။

အဆိုပါကာလအတွင်း စုစုပေါင်း လေကြောင်းခရီးစဉ်အရေအတွက်ကတော့ နိုင်ငံတကာခရီးစဉ် ၁၄,၂၉၅ ခုနဲ့ ပြည်တွင်းခရီးစဉ် ၁၀,၅၅၂ ခု အပါအဝင် စုစုပေါင်း ၂၄,၈၄၇ ခု ရှိမယ်လို့ ခန့်မှန်းရပါတယ်။

ဖေဖော်ဝါရီ ၄ ရက်အထိ အချက်အလက်တွေကို ဆန်းစစ်ချက်အရ တရုတ်နိုင်ငံက လေကြောင်းခရီးစဉ်တွေနဲ့ ခရီးသည်အရေအတွက် သိသိသာသာ တိုးတက်လာတာကို တွေ့ရှိရတဲ့အကြောင်း ဖာဗီနာက ပြောပါတယ်။

တရုတ်ခရီးသည် အရေအတွက် ၆၇၉,၂၅၉ ယောက်အထိ ရှိလာနိုင်ပြီး အရင်နှစ်က အလားတူကာလထက် ၈ ဒသမ ၁ ရာခိုင်နှုန်း တိုးတက်လာမယ်လို့ မျှော်လင့်ရကြောင်း သတင်းမှာ ဖော်ပြပါတယ်။

ဒါ့အပြင် ထိုင်းနိုင်ငံ အဓိက နိုင်ငံတကာဝင်ပေါက်ဖြစ်တဲ့ သုဝဏ္ဏဘူမိလေဆိပ်က တရုတ်ခရီးစဉ်တွေအတွက် ခရီးသည် ၄၄၄,၂၅၅ ယောက်ကို ဝန်ဆောင်မှုပေးရနိုင်တယ်လို့ ခန့်မှန်းထားပြီး ဒါဟာလည်း အရင်နှစ် အလားတူကာလထက် ၂၄ ဒသမ ၂ ရာခိုင်နှုန်း သိသိသာသာ မြင့်တက်လာတာဖြစ်တယ်လို့ သိရပါတယ်။

AOT အဖွဲ့ဥက္ကဋ္ဌ ဖာဗီနာကတော့ ဒီကိန်းဂဏန်းတွေက ထိုင်းနိုင်ငံရဲ့ ခရီးသွားကဏ္ဍအပေါ် ယုံကြည်မှု ပြန်လည်ရရှိလာတာနဲ့အတူ အထူးသဖြင့် တရုတ်နိုင်ငံက နိုင်ငံတကာခရီးသွားလာမှု ဆက်လက်ဦးမော့လာတဲ့အပေါ် ရောင်ပြန်ဟပ်နေတယ်လို့ ပြောလိုက်ပါတယ်။

ဒါ့အပြင် ပွဲတော်ကာလအတွင်း ခရီးသွားတွေကို ကြိုဆိုနိုင်ဖို့အတွက် AOT က ခြင်္သေ့အက ဖျော်ဖြေပွဲတွေ၊ ယဉ်ကျေးမှုဆိုင်ရာ ပြသမှုတွေ အပါအဝင် တရုတ် နှစ်သစ်ကူး အထိမ်းအမှတ်ပွဲတွေကို ကျင်းပသွားဖို့လည်း ရှိနေတယ်လို့ ဆိုပါတယ်။

အဆိုပါ ပွဲတော်ကာလအတွင်းမှာတော့ ခရီးသည်အလွန်များပြားနိုင်တာကြောင့်  လေယာဉ်နောက်ကျကျန်ခဲ့တာမျိုး မဖြစ်စေဖို့ ခရီးစဉ်မထွက်ခွာမီ အနည်းဆုံး ၂ နာရီကနေ ၃ နာရီလောက် ကြိုတင်ပြီးတော့ လေဆိပ်ကို ရောက်ရှိကြဖို့လည်း AOT က တိုက်တွန်းနှိုးဆော်ထားပါတယ်။

Source: Khaosod