မန်ယူနိုက်တက်တိုက်စစ်မှူးဟောင်း ဝိန်းရွန်းနီရဲ့ သားဖြစ်သူ ကိုင်ရွန်းနီဟာ ယူ-၁၆ အသင်းမှာ ခြေစွမ်းပြနေပြီး နောဝှစ်ချ်လူငယ်အသင်းနဲ့ပွဲမှာ တဦးတည်း ၄ ဂိုးသွင်းခဲ့ပါတယ်။
ယူနိုက်တက် ယူ-၁၆အသင်းက နောဝှစ်ချ်ယူ-၁၆ သင်းကို ၆ ဂိုး ၄ ဂိုးနဲ့ အနိုင်ရခဲ့ပြီး ကိုင်ရွန်းနီက ၄ ဂိုး သွင်းယူနိုင်ခဲ့တာပါ။
ကျောနံပါတ် ၇ ဝတ်ဆင်တဲ့ ကိုင်ရွန်းနီဟာ ရှုံးထွက်ဖလားဆီမီးဖိုင်နယ်မှာ ၄ ဂိုး သွင်းခဲ့ကြောင်း ပရိသတ် ၆ သိန်းကျော်ရှိတဲ့ သူ့ရဲ့ဆိုရှယ်မီဒီယာမှာ တင်ထားပြီး ကျောနံပါတ် ၇ ပါ ဂျာစီနဲ့ အဝတ်လဲခန်းမှာ ရိုက်ထားတဲ့ဓာတ်ပုံနဲ့ အတူ တင်ခဲ့ပါတယ်။
ယူနိုက်တက်ဟာ ကိုင်ရွန်းနီကို တနှစ် လုပ်ခ ပေါင် ၅၀,၀၀၀ နဲ့ စာချုပ်ချုပ်ဆိုဖို့ ကမ်းလှမ်းထားကြောင်း သတင်းတွေထွက်ပေါ်အပြီးမှာ ကိုင်ရွန်းနီကလည်း သူ့ရဲ့စွမ်းဆောင်ရည်ကို သွင်းဂိုးတွေနဲ့ သက်သေပြသွားတာဖြစ်ပါတယ်။
သူ့အနေနဲ့ ဖခင်ဖြစ်သူရဲ့ ပုံစံအတိုင်း မဖြစ်ချင်ဘဲ မိမိကိုယ်ပိုင်ကစားပုံနဲ့အတူ အမြင့်မားဆုံးအဆင့်အထိ ရောက်ရှိဖို့ ဆက်လက်ကြိုးစားသွားမဲ့အကြောင်း အင်တာဗျူးတခုမှာ ပြောခဲ့ဖူးပါတယ်။
