ပျဉ်းမနားတွင် မီးလောင်မှုကြောင့် နေအိမ် ၂ လုံး ဆုံးရှုံး၊ ဝက် ၁၂ ကောင် သေဆုံး
DVB
·
February 7, 2026
နေပြည်တော်၊ ပျဉ်းမနားမြို့ မြို့ဇီးဖြူပင်ကျေးရွာမှာ ဖေဖော်ဝါရီ ၇ ရက် မနက် ၁၀ နာရီကျော်က ဒယ်နီအိုး အပူလွန်ကဲမှု ဖြစ်ရာကတဆင့် မီးစတင်လောင်ကျွမ်းတာကြောင့် နေအိမ် ၂ လုံး ဆုံးရှုံးခဲ့ပြီး အိမ်မွေးဝက် ၁၂ ကောင် သေဆုံးခဲ့တယ်လို့ ကူညီကယ်ဆယ်ရေးအဖွဲ့တွေဆီကနေ သိရပါတယ်။
ကူညီကယ်ဆယ်ရေးဆောင်ရွက်ပေးသူတယောက်က “အချိန်မီ မီးထိန်းနိုင်လို့ ဆင့်ပွား မီးကူးစက်တာ မရှိတာ။ အိမ်နဲ့ဝက်တွေတော့ ဆုံးသွားတယ်။ ဝက်တွေကလည်း မီးလောင်လို့ သေဆုံးတာပါ။ အိမ်မွေးဝက်တွေပါ။ မီးစတင်လောင်ကျွမ်းတဲ့ နေအိမ်ပိုင်ရှင်ကို ရဲတွေက စစ်ဆေးနေတယ်” လို့ ပြောပါတယ်။
ပြီးခဲ့တဲ့ ဒီဇင်ဘာ ၃၁ ရက်၊ ညနေ ၆ နာရီကျော်လောက်ကလည်း ပျဉ်းမနားမြို့ ရန်နိုင်ရပ်ကွက်မှာ ဝါယာရှော့ဖြစ်ရာကတဆင့် နေအိမ်အလုံး ၆၀ ကျော် မီးကူးစက်လောင်ကျွမ်းဆုံးရှုံးခဲ့တယ်လို့ သိရပါတယ်။
Photos - Hein
