ရန်ကုန်မှာ ၂ ရက်အတွင်း တောမီးအပါအဝင် မီး ၅ ကြိမ်လောင်ပြီး မန္တလေးမှာလည်း ဖေဖော်ဝါရီ ၇ ရက် ဒီနေ့မှာ မီး ၂ ကြိမ်လောင်တယ်လို့ မီးသတ်တပ်ဖွဲ့ ထုတ်ပြန်ချက်တွေအရ သိရပါတယ်။
ဖေဖော်ဝါရီ ၇ ရက် ဒီမနက်အစောပိုင်း ၃ နာရီခွဲက ရန်ကုန်၊ လှိုင်သာယာအရှေ့ပိုင်းမြို့နယ်၊ စက်မှုဇုန်-၂၊ ဆိပ်ကမ်းသာလမ်းမှာ ကိုင်းတောမီးလောင်လို့ လှိုင်သာယာ အရှေ့ပိုင်းမြို့နယ် မီးသတ်စခန်းက မီးငြှိမ်းသတ်ယာဉ် ၂ စီးနဲ့ ငြှိမ်းသတ်ခဲ့ပြီး မနက် ၄ နာရီမှာ မီးငြိမ်းသွားပါတယ်။
မွန်းတည့် ၁၂ နာရီမှာလည်း တိုက်ကြီးမြို့နယ်၊ မေတ္တာအေးရွာမှာ တောမီးလောင်လို့ တိုက်ကြီးမြို့နယ်မီးသတ်စခန်းက မီးသတ်ယာဉ် ၁ စီးနဲ့ ငြှိမ်းသတ်ခဲ့ပြီး ၁၂ နာရီ မိနစ် ၅၀ လောက်မှာ မီးငြိမ်းတယ်လို့ မီးသတ်က ထုတ်ပြန်ထားပါတယ်။
နေ့လယ် ၁၂ နာရီ ၅၅ မိနစ်မှာလည်း ရန်ကုန်တိုင်း၊ ထန်းတပင်မြို့နယ်၊ ရခိုင်ရိုးလေးကျေးရွာ၊ အနော်ရထာလမ်းမှာ မီးလောင်လို့ ထန်းတပင်နဲ့ လှိုင်သာယာ မီးသတ်စခန်းက သွားရောက်ငြှိမ်းသတ်ခဲ့ပြီး ၁ နာရီ ၁၂ မိနစ်လောက်မှာ မီးငြိမ်းသွားပါတယ်။
ဖေဖော်ဝါရီ ၆ ရက် မနေ့ညနေ ၃ နာရီကျော်ကလည်း မရမ်းကုန်းမြို့နယ်၊ တောင်ဥက္ကလာပ ဂေါက်ကွင်းနားမှာ ကိုင်းတောမီးလောင်ခဲ့သလို ညနေ ၄ နာရီခွဲမှာလည်း မှော်ဘီမြို့နယ်၊ မြောင်းတကာစက်မှုဇုန်မှာ တောမီးလောင်လို့ နာရီဝက်ကြာလောက် ငြှိမ်းသတ်ခဲ့ရပါတယ်။
မန္တလေးမှာတော့ အမရပူရမြို့နယ်၊ မှန်တန်းရပ်ကွက်၊ အေးဇရပ်ရပ်မှာ ဖေဖော်ဝါရီ ၇ ရက် ဒီနေ့လယ် ၁၂ နာရီ ၄၅ မိနစ်က မီးလောင်လို့ Level 2 ယာဉ်အုပ်စုနဲ့ ငြှိမ်းသတ်ခဲ့ရပြီးနောက် မွန်းလွဲ ၁ နာရီ ၁၅ မိနစ်မှာ မီးငြိမ်းသွားပါတယ်။
ပြီးတော့ မွန်းလွဲ ၁ နာရီ မိနစ် ၂၀ မှာလည်း ချမ်းအေးသာစံမြို့နယ်၊ ၈၃ လမ်း၊ ၃၄ x ၃၅ အကြားမှာ တိုက်ခန်းတခန်း မီးလောင်ခဲ့ပါသေးတယ်။
မီးလောင်လို့ အိမ်တွေဘယ်လောက်ပျက်စီးဆုံးရှုံးတယ်ဆိုတာတော့ မသိရသေးပါဘူး။
