ထိုင်းနိုင်ငံက အက်ရှင်ဇာတ်ကြမ်း ရုပ်ရှင်ဇာတ်လမ်းတွဲတွေမှာ စက်ကိရိယာအကူမပါဘဲ သဘာဝကျကျ ထိုးကြိတ်ခုန်ပျံကျော်လွှား သရုပ်ဆောင်သူ ထိပ်တန်းမင်းသား  ကျာဖနုန် ခေါ် တိုနီဂျာ (မြန်မာတွေအကြားမှာ ဝမ်းဘတ်လို့လူသိများသူ) ဟာ ကင်ဆာရောဂါဝေဒနာ ခံစားနေရတယ်လို့ ထိုင်းသတင်းတွေမှာ ဖော်ပြပါတယ်။

ဒီမတိုင်ခင်က သူ့ရဲ့ အင်စတာဂရမ် လူမှုကွန်ရက်မှာ ဓာတ်ပုံတွေ တင်ထားခဲ့ပြီး အဲဒီပုံတွေဟာ အရင်လို ထွားကျိုင်းသန်မာနေတာမဟုတ်ဘဲ ပိန်သွယ်ပြီး အသားအရေလည်း ဖျော့တော့နေတာကြောင့် သူ့ရဲ့ပရိသတ်တွေကြား စိုးရိမ်မှုတွေ မြင့်တက်ခဲ့ပါတယ်။

Thai Entertainment အနုပညာသတင်းဌာနက သူ့ကို အင်တာဗျူးရာမှာတော့ သူဟာ လွန်ခဲ့တဲ့ ၂ နှစ်ကျော်က မကြာခဏ ဗိုက်အရမ်းနာပြီး အသားအရေရော မျက်လုံးပါ အဝါရောင်သန်းလာတယ်၊ ဒါကြောင့် ဆေးရုံတက်ပြီး ဆေးစစ်ကြည့်တာမှာ သူ့ရဲ့သည်းခြေအိတ်မှာ ကင်ဆာဆဲလ်ကို တွေ့ရှိပြီး အဆင့် ၃ မှ အဆင့် ၄ ကို ကူးပြောင်းနေပြီလို့ ဆိုပါတယ်။

သူဟာ ခွဲစိတ်ကုသမှုခံယူပြီး ဆရာဝန်ညွှန်ကြားချက်အတိုင်း ကီမိုးဆေး ပုံမှန်ထိုးနေတယ်၊ နေ့စဉ် ကိုယ်ကာယလေ့ကျင့်ခန်းလုပ်တာ၊ တရားထိုင်တာနဲ့ ကုသိုလ်ရေး အလှူအတန်းတွေလုပ်ပြီး ကိုယ်ရောစိတ်ပါ ကျန်းမာအောင် နေထိုင်လျက်ရှိတယ်၊ ပရိသတ်တွေ စိုးရိမ်စွာနဲ့ သတင်းမေးတာတွေ၊ ဆုတောင်းပေးတာတွေအတွက်လည်း ကျေးဇူးတင်တယ်လို့ သူ့ရဲ့ လူမှုကွန်ရက်မှာ ရေးသားထားပါတယ်။

လက်ရှိ အသက် ၄၉ နှစ်ရှိပြီဖြစ်တဲ့ တိုနီဂျာမှာ လက်ဝှေ့သမားတယောက်ဖြစ်ပြီး လွန်ခဲ့တဲ့ ၂၀၀၃ ခုနှစ်က “အုန်းဘတ်” အမည်ရှိ အချစ်ဇာတ်ကြမ်းကားနဲ့ ရုပ်ရှင်လောကထဲ စတင် ဝင်ရောက်လာတယ်၊ အဲဒီကားမှာ သဘာဝကျကျ သရုပ်ဆောင်နိုင်လို့ လူကြိုက်များပြီး ဒီနောက်ပိုင်းမှာလည်း ဇာတ်ကြမ်းသရုပ်ဆောင် ရုပ်ရှင်ကားတွေ ဆက်တိုက်ရိုက်ကူးခဲ့ရပြီး ဟောလိဝုဒ်ရုပ်ရှင်လောက အထိ နာမည်ကျော်ကြားခဲ့ပါတယ်။

Source: khaosod / MGROnline / CH3 News