မကွေးတိုင်း၊ ဂန့်ဂေါမြို့နယ်က တော်လှန်ရေးတပ်ဖွဲ့ဝင်တယောက်ဟာ လက်နက်ခဲယမ်းတွေနဲ့အတူ ဖေဖော်ဝါရီ ၁ ရက်က စစ်ကောင်စီထံ ပူးပေါင်းသွားတယ်လို့ တော်လှန်ရေးတပ်ဖွဲ့ဝင်တွေဆီကနေ သိရပါတယ်။
ဂန့်ဂေါအခြေစိုက် တော်လှန်ရေးတပ်ဖွဲ့ဝင်တယောက်က “ဂန့်ဂေါ ခလရ ၅၀ ဆီကို ပူးပေါင်းသွားတဲ့ ရဲဘော်က ဂန့်ဂေါခရိုင်တပ်ရင်း ၁၄ ကပါ။ လက်နက်ခဲယမ်းတွေ ပါသွားတယ်လို့ သိရတယ်” လို့ ပြောပါတယ်။
အဆိုပါဖြစ်စဥ်နဲ့ပတ်သက်ပြီး ဖေဖော်ဝါရီ ၄ ရက်အထိ ဂန့်ဂေါခရိုင်တပ်ရင်း ၁၄ ဘက်ကတော့ သတင်းတစုံတရာ ထုတ်ပြန်လာတာ မတွေ့ရသေးပါဘူး။
ဂန့်ဂေါမြို့နယ် ပအဖ တာဝန်ရှိသူတယောက်က “ဟိုဘက်ကို ပူးပေါင်းသွားတာက ဂန့်ဂေါခရိုင်တပ်ရင်း ၁၄ က ရဲဘော် အကြီးကောင်တဲ့။ နာမည်အရင်းကတော့ ကျော်မင်းလှိုင်ပါ။ နောက်ပြီး သူက ရန်ကုန်ဇာတိဖြစ်ပြီးတော့ တော်လှန်ရေးအစကတည်းက ပါလာသူလည်း ဖြစ်တယ်။ လက်ရှိ ဂန့်ဂေါ-ဟားခါး လမ်းဆုံမှာ လုံခြုံရေးတာဝန် ထမ်းဆောင်နေရင်း စစ်တပ်ဘက်ကို လက်နက်ခဲယမ်းတွေနဲ့ ပူးပေါင်းသွားတာလို့ သိရတယ်။ သူ့မိသားစု ပါ မပါ ဆိုတာကတော့ အတည်မပြုနိုင်သေးသလို သူ ဘာကြောင့် အဲ့လို ပူးပေါင်းသွားတာလဲ ဆိုတာလည်း မသိရသေးပါဘူး” လို့ ပြောပါတယ်။
တော်လှန်ရေးကာလအစကနေ ၂၀၂၆ ခုနှစ်၊ ဖေဖော်ဝါရီလအထိ ဂန့်ဂေါခရိုင်ပကဖနဲ့ တပ်ရင်း တပ်ဖွဲ့တွေဘက်က တော်လှန်ရေးတပ်ဖွဲ့ဝင် ၂ ယောက်ဟာ စစ်ကောင်စီတပ်ဘက်ကို ပူးပေါင်းသွားခဲ့ပါတယ်။
ဖေဖော်ဝါရီ ၃ ရက် မနက် ၅ နာရီဝန်းကျင်မှာ ဂန့်ဂေါမြို့နယ်မြောက်ပိုင်း စန်းမြို့ကျေးရွာအနီးကို စစ်ကောင်စီတပ်က လေကြောင်းတိုက်ခိုက်မှု ၂ ကြိမ် ပြုလုပ်ခဲ့ပါတယ်။
