တနင်္သာရီတိုင်း၊ သရက်ချာင်းမြို့နယ်၊ ထားဝယ်မြစ်ဝမှာ ခရီသည်တင် အမြန်ရေယာဥ်တစီး ပစ်ခတ်ခံရပြီး လူ ၄ ယောက် ထိခိုက်ဒဏ်ရာရခဲ့တယ်လို့ ခရီးသွားလုပ်ငန်းအသိုက်အဝန်းနဲ့ ခရီးသည်တွေဆီက သိရပါတယ်။
ခရီးသွားလုပ်ငန်းနဲ့နီးစပ်သူတယောက်က “ပစ်ခတ်တဲ့သူတွေက ယူနီဖောင်းမပါဘူး။ အရပ်ဝတ်နဲ့ပါ။ ယာဥ်မှာပါလာတဲ့သူတွေက VIP လည်းမပါ၊ ပုံမှန်သွားလာနေတဲ့ ခရီးသည်တွေပါ” လို့ ပြောပါတယ်။
အဆိုပါပစ်ခတ်မှုကြောင့် အသက် ၁၂ နှစ်အရွယ် ကလေးတယောက်အပါအဝင် ခရီးသည် ၄ ယောက် ဒဏ်ရာရှိခဲ့ပြီး ထားဝယ်မြို့ဆေးရုံနဲ့ သရက်ချောင်းမြို့ဆေးရုံတွေကို ပို့ဆောင်လိုက်ရတယ်လို့ ခရီးသည်တွေဆီက သိရပါတယ်။
ဒီကနေ့မနက် ဖေဖော်ဝါရီ ၄ ရက်နေ့မှာတော့ သရက်ချောင်းမြို့မှာရှိတဲ့ လူနာ ၂ ယောက်ထဲက တယောက်သက်သာပြီး တယောက်ကိုတော့ ထားဝယ်ဆေးရုံကြီး ထပ်မံပို့ဆောင်လိုက်ရတယ်လို့ ဆိုပါတယ်။
ဒါ့အပြင် အမြန်ရေယာဥ်မှာလည်း ကျည်ထိမှန်ပြီး စက်ရပ်တန့်သွားခဲ့ကာ နောက်မှ စစ်ကောင်စီတပ်က လာရောက်ခေါ်ယူပြီး သရက်ကျောင်းမြို့နယ်၊ ရှင်ဖြူပြင်ဆိပ်ကမ်းကို ပို့ဆောင်ပေးလိုက်တယ်လို့ ဒေသခံတွေဆီက သိရပါတယ်။
တနင်္သာရီတိုင်းမှာ မြိတ်-ထားဝယ်ကားပိုင်းတလျှောက် မကြာခဏတိုက်ပွဲနေတာမို့လို့ ခရီးသည်တွေဟာ ရေကြောင်းကို အဓိထား သွားလာနေကြရပြီး အခုဖြစ်စဉ် ဘယ်လက်နက်ကိုင်အဖွဲ့က ပစ်ခတ်တယ်ဆိုတာတော့ မသိရသေးပါဘူး။
