ဧရာဝတီတိုင်း၊ ဟင်္သာတမြို့နယ်၊ အင်္ဂရမ်းအုပ်စု၊ အလက လက်ပံစု (နောက်) ကျောင်းမှာ အလယ်တန်းပြဆရာမက ကျောင်းအိမ်သာနံရံမှာ ပေကျံနေတဲ့ ရွှံ့စေးတွေကို ကျောင်းသားတွေကို လျှာနဲ့လျက်ခိုင်းခဲ့တဲ့ကိစ္စနဲ့ ပတ်သက်ပြီး သက်ဆိုင်ရာ တာဝန်ရှိတဲ့အဖွဲ့က စစ်ဆေးနေတယ်လို့ ပညာရေးဝန်ထမ်းတွေဆီက သိရပါတယ်။
ဇန်နဝါရီ ၃၀ ရက်က အလက လက်ပံစု(နောက်) စာသင်ကျောင်းရဲ့ ကျောင်းသားအိမ်သာနံရံမှာ ပေကျံနေတဲ့ ရွှံ့စေးတွေကို အလယ်တန်းပြဆရာမဖြစ်တဲ့ ဒေါ်မြမြသွယ်က တွေ့ရှိသွားပြီး ရွှံ့ပေအောင်လုပ်တဲ့သူ မေးမရတဲ့အတွက် ကျောင်းသားတွေကို ခေါ်ပြီး လျှာနဲ့ လျက်ခိုင်းခဲ့တာကြောင့် မိဘတွေက သိရှိပြီးနောက် စုပေါင်းတိုင်ကြားလို့ ဖေဖော်ဝါရီ ၂ ရက်မှာ မြို့နယ်အဆင့် ပညာရေးမှူးရုံး စစ်ဆေးရေးအဖွဲ့က စစ်ဆေးနေတာလို့ သိရပါတယ်။
ပညာရေးဝန်ထမ်းတယောက်က “ခရိုင်အထိ တိုင်ကြားမှုရှိလို့ ခရိုင်က ညွှန်ကြားချက်နဲ့ အုပ်ချုပ်ရေးအဖွဲ့တွေပါတဲ့ စစ်ဆေးရေးအဖွဲ့က စစ်ဆေးတာ။ ကျောင်းကို ကွင်းဆင်းစစ်ဆေးတာ။ ကလေးတွေကို လျှာနဲ့လျက်ခိုင်းတဲ့ ဆရာမနဲ့ ကျောင်းသားတွေပါ စစ်ဆေးခဲ့တာ” လို့ ပြောပါတယ်။
ကျောင်းအိမ်သာနံရံမှာ ပေကျံနေတဲ့ ရွှံ့စေးတွေကို အလယ်တန်းပြဆရာမဖြစ်တဲ့ ဒေါ်မြမြသွယ်က ကျောင်းသား အယောက် ၃၀ ကျော်ကို လျှာနဲ့လျက်ခိုင်းတာအပြင် မိဘ ပြန်မပြောကြဖို့၊ ပြန်ပြောခဲ့ပါက ကျောင်းရောက်လာတဲ့အခါ ရိုက်နှက်မယ်လို့ပါ ကျောင်းသားတွေကို ခြိမ်းခြောက် ပြောဆိုခဲ့တယ်လို့ သိရပါတယ်။
ဒေသခံ ကျောင်းသားမိဘတယောက်က “လုံးဝလက်မခံနိုင်တဲ့လုပ်ရပ်မို့ တိုင်တာပါ။ စစ်ဆေးတဲ့ အဖွဲ့ ကနဦး စစ်ဆေးသွားတာ။ စာမေးပွဲတွေရှိတာကြောင့် စစ်ဆေးတာကို ခဏရပ်ထားပြီး ဆက်စစ်မယ်လို့ သိရပါတယ်။ ပြစ်မှုကျူးလွန်တဲ့ ဆရာမကို ထိရောက်တဲ့ အရေးယူမှု လုပ်တဲ့အထိ လုပ်ဆောင်သွားမယ်” လို့ ပြောပါတယ်။
အဲဒီဖြစ်စဉ်နဲ့ ပတ်သက်လို့ ကျောင်းသား၊ ကျောင်းသူတွေအတွက် နှစ်ဆုံးစာမေးပွဲတွေ ရှိတာကြောင့် စစ်ဆေးမှုလုပ်ငန်းတွေကို ခေတ္တဆိုင်းငံ့ထားမှာဖြစ်ပြီး စာမေးပွဲတွေပြီးဆုံးပါက ခရိုင်အဆင့် တာဝန်ရှိတဲ့သူတွေပါတဲ့ အဖွဲ့က ဆက်လက်စစ်ဆေးသွားဖို့ ရှိတယ်လို့ သိရပါတယ်။
နှစ်ဆုံးစာမေးပွဲတွေကို ၂၀၂၆ ခုနှစ် ဖေဖော်ဝါရီ ၅ ရက်က စတင်ပြီး အလက လက်ပံစု(နောက်) စာသင်ကျောင်းမှာ စတင်ကျင်းပဖို့ ပြင်ဆင်ထားတယ်လို့ သိရပါတယ်။
