စစ်ကိုင်းတိုင်း၊ အင်းတော်မြို့နယ်ထဲကို စစ်ကောင်စီတပ်က ဇန်နဝါရီ ၂၉ ရက်မှာ တိုက်လေယာဥ်တွေနဲ့ ဗုံးကြဲတွေကြဲချခဲ့တာကြောင့် ၃ နှစ်အရွယ်ကလေးငယ် အပါအဝင် ၈  ယောက် သေဆုံးကာ ဒဏ်ရာရသူတွေလည်းရှိခဲ့တယ်လို့ ဒေသခံတွေဆီကနေ သိရပါတယ်။

Indaw Revolution – IR ရဲ့ ပြန်ကြားရေးတာဝန်ရှိသူက “အင်းတော်မြို့နယ်ထဲမှာရှိတဲ့ မော်လူးဒေသက နမီးကျေးရွာအုပ်စု၊ လေဘိုရွာကို စစ်တပ်ကဂျက်ဖိုက်တာတွေနဲ့ ၂ ကြိမ် ပစ်ခတ်တိုက်ခိုက်ခဲ့လို့ ၃ နှစ်အရွယ်ကလေးငယ်အပါအဝင် မိသားစုလိုက် ၇ ယောက်နဲ့ ဘေးအိမ်က ၁ ယောက် စုစုပေါင်း ၈ ယောက်သေဆုံးပြီးတော့ ဒဏ်ရာရရှိသူကလည်း ၂ ယောက်ဖြစ်ပါတယ်။ လူနေအိမ်တချို့လည်း ပျက်စီးသွားပါသေးတယ်” လို့ ပြောပါတယ်။

စစ်ကောင်စီတပ်ဟာ လေဘိုကျေးရွာကို ဇန်နဝါရီ ၂၉ ရက်မနက် ၁၀ နာရီခွဲဝန်းကျင်မှာ လေကြောင်းတိုက်ခိုက်ခဲ့တုန်းက ထိခိုက်ပျက်စီးတာမရှိခဲ့ပေမဲ့ အဲဒီနေ့ည ၉ နာရီဝန်းကျင်မှာ ဂျက်တိုက်လေယာဉ်နဲ့ ပေါင် ၅၀၀ ဗုံး ၂ လုံးထပ်မံကြဲချခဲ့တာကြောင့် ထိခိုက်ပျက်စီးသေဆုံးတာတွေ များခဲ့တာလို့ ဆိုပါတယ်။

အင်းတော်မြို့နယ် သတင်းပြန်ကြားရေးအဖွဲ့ရဲ့ တာဝန်ရှိသူက “အခုဗုံးကြဲခံရတဲ့နေရာက အင်တာနက်နဲ့ ဖုန်းလိုင်းတွေအရမ်းအခက်အခဲရှိနေတဲ့နေရာဖြစ်လို့ မြေပြင်သတင်းကို အချိန်နဲ့တပြေးညီမရရှိနိုင်တာဖြစ်ပါတယ်။ အခုလက်ရှိ အဲဒီ လေဘိုရွာမှာက PDF စခန်းလည်းမရှိသလို စစ်တပ်စစ်ကြောင်းထိုးနေတာနဲ့ တိုက်ပွဲတွေဖြစ်နေတာလည်းမရှိပါဘူး။ အခုလထဲမှာတင် အင်းတော်မြို့နယ်ထဲက မော်​လူးမြို့လို့ခေါ်တဲ့ မော်လူးဒေသကို စစ်တပ်ကလေကြောင်းတိုက်ခိုက်မှုတွေ ဆက်တိုက်လုပ်ဆောင်နေတာပါ” လို့ ပြောပါတယ်။

အခု ဇန်နဝါရီလအတွင်း အင်းတော်မြို့နယ်၊ မော်လူးဒေသကို စစ်တပ်ရဲ့လေကြောင်း တိုက်ခိုက်မှုတွေကြောင့် ဒေသခံပြည်သူ ၉ ယောက်နဲ့ ကာကွယ်ရေးတပ်ဖွဲ့ဝင် ၅ ယောက်၊ စုစုပေါင်း ၁၄ ယောက် သေဆုံးခဲ့တယ်လို့လည်း သူကဆက်ပြောပါတယ်။

စစ်ကောင်စီတပ်ဟာ မော်လူးဒေသ ပဲခူးကျေးရွာနဲ့ ရွာရှည်ကျေးရွာကြားကို ဇန်နဝါရီ ၂ ရက်မှာ တိုက်ပွဲဖြစ်ပွားတာမရှိဘဲ လေကြောင်းတိုက်ခိုက်ခဲ့တာကြောင့် Grade 12 ကျောင်းသူ တယောက် သေဆုံးပြီး တယောက် ထိခိုက်ဒဏ်ရာရရှိခဲ့သလို ဇန်နဝါရီ ၂၁ ရက်ကလည်း မော်လူးမြို့၊ မာန်ဟဲကျေးရွာကိုဗုံးကြဲချခဲ့လို့ ပကဖတပ်ဖွဲ့ဝင် ၅ ယောက် သေဆုံးပြီး ဒေသခံပြည်သူ ၂ ယောက် ဒဏ်ရာရရှိခဲ့ပါသေးတယ်။