မြန်မာနဲ့ ကမ္ဘောဒီးယားနိုင်ငံ အခြေစိုက် ကျားဖြန့် အွန်လိုင်းငွေလိမ်ဂိုဏ်းတွေရဲ့ ဘဏ်အကောင့်ပေါင်း ၁၁၀ နီးပါး စီစဉ်ပေးခဲ့တဲ့ တရားခံပြေး ဗီကပ်စ် ချောင်ဒရီနဲ့ အပေါင်းအပါတွေကို အိန္ဒိယရဲတပ်ဖွဲ့က ရှာဖွေနေတဲ့အကြောင်း The Times of Idia သတင်းမှာ ဒီနေ့ ဖော်ပြပါတယ်။

အမှုနဲ့ ပတ်သက်တဲ့ အဓိကတရားခံ အသက် ၃၁ နှစ်အရွယ် ချောင်ဒရီဟာ အင်ဂျင်နီယာဘွဲ့ရ ဖြစ်ပြီး လက်ရှိမှာ ထွက်ပြေးတိမ်းရှောင်နေဆဲဖြစ်ကာ သူ့ကို နိုင်ငံရေးအဆက်အသွယ်ရှိတဲ့ ဆွေမျိုးတယောက်က ကူညီဖုံးကွယ်ပေးထားတယ်လို့ ရဲတပ်ဖွဲ့က သံသယရှိနေတာပါ။

အိန္ဒိယနိုင်ငံတောင်ပိုင်း၊ တီလန်ဂါနာပြည်နယ်၊ ခမ်မမ် ရဲတပ်ဖွဲ့ကေတာ့ အခုအမှုနဲ့ ပတ်သက်ပြီးတော့ ဆက်စပ်သူအယောက် ၂၀ လောက်ကို ဖမ်းဆီးထားပြီး ဖြစ်သလို ဒါဟာ ပြီးခဲ့တဲ့ ဒီဇင်ဘာ ၂၄ ရက်က အလုပ်လက်မဲ့ လူငယ်တယောက်ကို ဘဏ်အကောင့်ဖွင့်ဖို့ ခြိမ်းခြောက်ခိုင်းစေမှုနဲ့ ရဲစခန်းမှာ အမှုဖွင့်တိုင်ကြားခဲ့ရာကနေ ကျားဖြန့်ရာဇဝတ်ကွန်ရက်ကြီးတခုလုံးကို ဖော်ထုတ်နိုင်ခဲ့တာလို့ ဆိုပါတယ်။

တရားခံတွေဟာ အလုပ်လက်မဲ့ လူငယ်တွေ၊ နေ့စားအလုပ်သမားတွေကို ရူပီးငွေ ၃,၅၀၀ ကနေ ၁၀,၀၀၀ ကြားပေးကာ ဘဏ်အကောင့်တွေ ဖွင့်ခိုင်းခဲ့ပြီး အဆိုပါအကောင့်တွေကို ငွေဖြူအဖြစ် ပြောင်းလဲရာမှာ အသုံးချတဲ့ ကြားခံအကောင့်တွေအဖြစ် အသုံးပြုခဲ့ကြတယ်လို့ ဆိုပါတယ်။

ငွေကြေးပမာဏအနေနဲ့ အဆိုပါ အကောင့် ၁၀၀ ကျော်ကတဆင့် စုစုပေါင်း ရူပီး ငွေ ၆၅၀ ကုဋေ (ခန့်မှန်းခြေ အမေရိကန်ဒေါ်လာ ၇၈ သန်းနီးပါး) လည်ပတ်ခဲ့ပြီး တရားခံတွေက ကော်မရှင်ခအဖြစ် ရူပီးငွေ ၆၀ ကုဋေကျော် ရရှိခဲ့တယ်လို့ ယူဆရပါတယ်။

လည်ပတ်ပုံကတော့ အွန်လိုင်းကတဆင့် လိမ်လည်ရရှိငွေတွေကို အဆိုပါ ကြားခံအကောင့်တွေဆီ ဦးစွာထည့်သွင်းပြီးနောက် ကုမ္ပဏီအမည်ခံ အကောင့်တွေဆီ လွှဲပြောင်းကာတဆင့် ပြန်လည်ထုတ်ယူပြီး ခရစ်ပတို (ဒီဂျစ်တယ်ငွေကြေး) အဖြစ် ပြောင်းလဲကာ မြန်မာနဲ့ ကမ္ဘောဒီးယားနိုင်ငံတွေက ကျားဖြန့်ဂိုဏ်းတွေဆီ ပေးပို့ခဲ့ကြတာလို ဆိုပါတယ်။

လက်ရှိမှာတော့ အိန္ဒိယရဲတပ်ဖွဲ့က အမှုမှာ ငွေကြေးခဝါချမှုများစွာ ပါဝင်နေတာကြောင့် အိန္ဒိယနိုင်ငံ ငွေကြေးဆိုင်ရာ ပြစ်မှုစုံစမ်းစစ်ဆေးရေးဦးစီးဌာနဆီ အကြောင်းကြားစာ ပေးပို့ထားတယ်လို့ သတင်းမှာ ဖော်ပြပါတယ်။