ထိုင်းနိုင်ငံ အလယ်ပိုင်း၊ အယုဒ္ဓယခရိုင်မှာ မြန်မာရွှေ့ပြောင်းလုပ်သားတွေ ဆူညံပြီး ပတ်ဝန်းကျင်ကို အနှောင့်အယှက်ပြုတာကြောင့်ဆိုပြီး ထိုင်းမျိုးချစ်ဝါဒီအဖွဲ့က သွားရောက်အင်အားပြ ရိုက်နှက် ခြိမ်းခြောက် သတိပေးခဲ့ပြီးနောက် မြန်မာနိုင်ငံသားတွေ စိုးရိမ်နေပါတယ်။

အယုဒ္ဓယခရိုင်၊ ဘန်ပအင်မြို့၊ ဆင်ထိဝါးရပ်ကွက်ထဲမှာ မြန်မာလုပ်သားတွေ ဝင်‌ရောက်နေထိုင်ပြီး ညအချိန်မတော် ဆူညံသံပြုတာ၊ အရင်ဝိုင်းဖွဲ့သောက်စား စကားများငြင်းခုံတာ၊ ယာဉ်စည်းကမ်း လမ်းစည်းကမ်းမလိုက်နာတာ၊ ယဉ်ကျေးမှူမရှိတာ စတာတွေကြောင့် ပတ်ဝန်းကျင်အနှောင့် အယှက်ဖြစ်ရကြောင်း “တေ့အာချီဝ ” (အရပ်အခေါ် နှုတ်ခမ်းမွေး) ဆိုသူ ဦးဆောင်တဲ့အဖွဲ့ဟာ ဇန်နဝါရီ ၁၉ ရက် ည ၉ နာရီလောက်က အဆိုပါရပ်ကွက်ထဲ‌ရောက်လာကာ အနီးနားရပ်ကွက်နေ ပြည်သူ ၁၀၀ ကျော်လောက်ကလည်း အဲဒီနားကို ဝိုင်းရံရောက်ရှိလာပြီးတော့ မြန်မာလုပ်သားတွေရဲ့ လုပ်ရပ်တွေကို တယောက်တပေါက် တိုင်တောကြတယ်လို့ ထိုင်းသတင်းတွေမှာ ဖော်ပြပါတယ်။

တိုင်တန်းချက်တွေထဲမှာ “မြန်မာလုပ်သား ၃ ယောက်က ဦးထုပ်မပါ  Big bike ဆိုင်ကယ်စီးပြီး လမ်းလျှောက်နေတဲ့ အဘွားတယောက်ကို ဂရုမစိုက်ဘဲ အချင်းချင်းစကားပြောကာ စည်းကမ်းမဲ့ ဆိုင်ကယ်မောင်းတယ်၊ အဘွားသာမ‌ရှောင်နိုင်ရင် အတိုက်ခံရပြီ” လို့ ပြောတဲ့သူရှိသလို နောက်တယောက်ကလည်း “သူက သူ့ဖာသူလမ်းမကြီးပေါ်မှာကားကို ဖြည်းဖြည်းမောင်းလာတာ၊ မြန်မာလုပ်သားရဲ့ ဆိုင်ကယ်က လမ်းကြားထဲက ရုတ်တရက်ထွက်လာပြီး တိုက်မလိုဖြစ်တော့ သူတို့က မတောင်းပန်တဲ့အပြင် သူ့ကို မိုက်ကြည့် ကြည့်သွားတယ်။”  နောက်တယောက်ကလည်း “  မနက် ၂ နာရီ ၃ နာရီ သူများတွေ အိပ်လို့ကောင်းတဲ့ချိန် သူတို့ဘယ်ကပြန်လာလဲမသိဘူး၊ ဆိုင်ကယ်သံ အကျယ်ကြီးနဲ့ဝင်လာတယ်၊ စကားအကျယ်ကြီးပြောကြတယ်၊ တညနှစ်ည မဟုတ်ဘူး အမြဲလိုဘဲ။” “ရပ်ကွက်ထဲမှာ ဈေးဆိုင်ဖွင့်ထားတာ သူတို့ဆိုင်တွေချည်းပဲ၊ ထိုင်းဆိုင်တောင်သိပ်မရှိတော့ဘူး” စသဖြင့် တိုင်တောကြပါတယ်။

တေ့အာချီဝကလည်း မြန်မာလုပ်သားတွေ ထိုင်းမှာဆက်နေချင်ရင် ကောင်းကောင်းနေကြ၊ မင်းတို့ဘာသာ ငါတို့က ကရင်၊ ငါတို့က ရှမ်းအဲလိုခွဲမနေနဲ့ အကုန်လုံး မြန်မာတွေချည်းပဲ၊ ဒါဟာ အယုဒ္ဓယ၊ ဒါဟာ ထိုင်းနိုင်ငံ၊ ငါတို့ပြည်သူ ဒီလိုအနိုင်ကျင့်ခံရတာ လွှတ်ထားလို့မရဘူး။ သင်တို့ကို ရဲတွေက မစောင့်ရှောက်ရင် တေ့အာချီဝ စောင့်ရှောက်မယ်၊  မြန်မာတွေမှတ်ထား၊ တပတ်အတွင်း မင်းတို့အချိုးတွေ မပြင်ရင် ထပ်လာမယ်။ “အယုဒ္ဓယ - ဒါထိုင်းနိုင်ငံ” စသဖြင့် ကြွေးကြော်ပြီး မြန်မာ လုပ်သားတွေကို ခြိမ်းခြောက်ခဲ့ကြပါတယ်။

မြန်မာလုပ်သားဘက်က ကိုယ်စားလှယ်တွေနဲ့ တွေ့ဆုံဆွေးနွေးတာကိုတော့ မတွေ့ရပါဘူး။  အဲဒီနောက် သူတို့အဖွဲ့ပြန်သွားပြီး ရပ်ကွက်ထဲကလူတွေလည်း လူစုခွဲကာ အသီးသီးပြန်သွားကြပါတယ်။ 

လတ်တလော ထိုင်းနိုင်ငံမှာ မြန်မာလုပ်သားတွေ ထိုင်းလူမျိုးနဲ့ရော အချင်းချင်းပါ ခိုက်ရန်ဖြစ်ပွားတဲ့ သတင်းတွေ တက်နေတာကြောင့် မြန်မာရွှေ့ပြောင်းလုပ်သားတွေ အနေအထိုင်ဆင်ခြင်ဖို့  လူမှုကွန်ရက်မှာ အချင်းချင်း သတိပေးနေကြပါတယ်။

ထိုင်းနိုင်ငံအယုဒ္ဓယခရိုင်ထဲက မြန်မာလူမျိုးအများစုနေထိုင်တဲ့ ဆင်ထိဝါးရပ်ကွက်ထဲကို ထိုင်းမျိုး ချစ်အဖွဲ့က အုပ်စုလိုက်ဝင်ရောက်စစ်ဆေးပြီး ရိုက်နှက်တာတွေလုပ်သွားတဲ့အတွက် ရပ်ကွက်ထဲနေ မြန်မာတွေ  စိုးရိမ်ထိတ်လန့်နေကြပြီး အကူအညီပေးမယ့်သူ မရှိဖြစ်နေတယ်လို့ သိရပါတယ်။ 

ဆင်ထိဝါးရပ်ကွက်မှာနေသူတယောက်က “တနေ့ကဆိုရင် လူလုံးကြီးနဲ့ အကြမ်းဖက်သလို ဝင်လာတယ်။ ဝင်ပြီးတော့တွေ့တဲ့လူ အကုန်စီးရိုက်တယ်။ ဒါပေမဲ့ မနေ့ညနေကကျတော့ အဲ့လို မဟုတ်တော့ဘူး။ ဘယ်လိုလာလဲဆိုတော့ အဖွဲ့ပေါင်းစုံပေါ့၊ စစ်သားတွေ၊ ရဲတွေ နောက်ပြီးအရပ်ဝတ်လူကြီးတွေပုံစံနဲ့ အကုန်ဝင်လာတာ အဓိကပစ်မှတ်တွေကတော့ မြန်မာဆိုင်တွေ ပတ်စပို့ရုံးတွေ ဈေးရောင်းတဲ့ဟာတွေကို အဓိကထားပြီးတော့ တန်းစီစစ်တယ်  မသကာတဲ့ဟာတွေကို ကားပေါ်တင်ပြီးခေါ်သွားတယ်”လို့ ပြောပါတယ်။

ဒီဖြစ်ရပ်ကအစက ထိုင်းနဲ့ မြန်မာနိုင်ငံသားတို့ ယာဥ်တိုက်မှု ဖြစ်ရာကနေ မြန်မာနိုင်ငံသားက မတောင်းပန်ဘဲ မောင်းပြေးသွားတာကို ထိုင်းနိုင်ငံသားက မကျေနပ်လို့ ဇန်နဝါရီ ၁၇ ရက်မှာ အွန်လိုင်းပေါ်တင်လိုက်ရာကနေစပြီး ထိုင်းမျိုးချစ်အဖွဲ့တွေရောက်လာကာ ရပ်ကွက်ထဲက တွေ့သမျှ မြန်မာတွေကို ရိုက်နှက်စစ်ဆေးသွားတာဖြစ်ပါတယ်။ 

အခုလိုလုပ်ရပ်ကြောင့် အယုဒ္ဓယနေ မြန်မာလူမျိုးတွေ အလုပ်သွားရင်တောင် နှုတ်ခမ်းမွေးအဖွဲ့ကို သတိထားစောင့်ကြည့်ပြီး သွားနေရတဲ့ အခြေအနေနဲ့ ကြုံနေရတယ်လို့ ဆိုပါတယ်။ 

ထိုးကြိတ်ခံရတဲ့ဖြစ်ရပ်အား လိုင်းပေါ်တင်တဲ့သူတွေကို ထိုင်းမျိုးချစ်အဖွဲ့က စောင့်ကြည့်နေတဲ့အပြင် ရပ်ကွက်နေ မြန်မာတွေဟာ အလုပ်သမားအရေးကူညီတဲ့အဖွဲ့တွေကို အကူညီမတောင်းရဲသလို ဘယ်အဖွဲ့အစည်းကမှလည်း လက်ရှိပြဿနာတွေကို လာမဖြေရှင်းပေးဘူးလို့ သိရပါတယ်။

ဆင်ထိဝါးရပ်ကွက်မှာနေသူတယောက်က “အခုဘယ်လိုကြုံလဲဆိုတော့ ကျနော်တို့တင်တဲ့ ပို့စ်တွေကို Screen Shot ရိုက်တယ်။ သူတို့ရဲ့ ထိုင်း Group တွေမှာ ကျနော်တို့ပုံနဲ့တကွ တင်တဲ့လူတွေကို အကုန်လုံးကို ချပြထားတယ်။ အဲ့ဒါကြောင့် ကျနော်တို့ ရပ်ကွက်ထဲမှာနေရတာ ဘယ်လိုမှ မလုံခြုံဘူးဗျာ။ ကြောက်နေရတယ် အကုန်လုံးက။ ကြောက်စိတ်တွေနဲ့ မိန်းကလေးတွေ အလုပ်သွားရင်တောင် သူတို့နဲ့တိုးမှာကြောက်နေတယ် မိန်းကလေးတွေက” လို့ ပြောပါတယ်။

အယုဒ္ဓယမှာရှိတဲ့ မြန်မာအလုပ်သမားအရေးကူညီနေသူကတော့ ဒီကိစ္စဟာ နိုင်ငံရေးလှည့်ကွက် တွေ ပါနေတဲအတွက် မြန်မာသံရုံးအနေနဲ့ ကြားဝင်ဖြေရှင်းသင့်ကြောင်း သုံးသပ်ထားပေမဲ့ ဘန်ကောက်ရှိ မြန်မာသံရုံးကတော့ တစုံတရာ ထုတ်ပြန်တာလည်း မရှိသေးသလို DVB က ဆက်သွယ်မေးမြန်းတာကိုလည်း ပြန်လည်ဖြေကြားတာ ရှိသေးပါဘူး။ 

ဒါကြောင့် အလုပ်သမားရေးကူညီနေတဲ့ အဖွဲ့တွေအနေနဲ့လည်း ဒီကိစ္စဝင်ဖြေရှင်းဖို့ အခက်အခဲတွေ ရှိနေတယ်လို့ ဆိုပါတယ်။

အလုပ်သမားရေးကူညီနေသူတယောက်က “ကျနော်တို့အမြင်နဲ့ ကြည့်မယ်ဆိုရင် ဒါအုပ်စုဖွဲ့ပြီး အနိုင်ကျင့်တယ်လို့ပဲ မြင်တယ်။ သူတို့လုပ်မယ်ဆိုလည်း ဥပဒေဘောင်ကပဲ လုပ်ပေါ့။ ကျနော်တို့ အမြင်မှာက ကျနော်တို့ နိုင်ငံရေးကြောင့်နဲ့လည်း သက်ဆိုင်တယ်။ မြန်မာနိုင်ငံသံရုံးဘက်ကလည်း ပွင့်ပွင့်လင်းလင်းပြောရမယ်ဆိုရင် ဒီလူတယောက်ဖြစ်တယ်ဆိုရင် သံရုံးအနေနဲ့ သံတမန်အနေနဲ့ ဒီအရေးကို လုံးဝဝင်လို့ရတယ်။ ပထမဖြစ်စဥ်တခုလည်း ရှိထားတယ်။ ကမ္ဘောဒီးယား လူမျိုးတယောက်ကို ဘာမှမဟုတ်ဘဲ ကုန်တိုက်ထဲမှာ ထိုးတဲ့ကိစ္စမှာ သူတို့နိုင်ငံ သံရုံးကစာထုတ်ပြန်ပြီးတော့ ချက်ချင်းအရေးယူတယ်။ သူတို့အဖွဲ့ပဲ အရေးယူခံရတယ်။ မြန်မာနိုင်ငံသံရုံးက မဖြစ်မနေ ကျနော်တို့မြန်မာပြည်သားဘက်မှာ ရပ်တည်ဖို့ ရှိကိုရှိရမယ်။ အခုဟာက မြန်မာနိုင်ငံသားဘက်မှာ ရပ်တည်ပေးတာမရှိတော့ ကျနော်တို့တွေက ကာကွယ်ပေး ဖို့ခက်တယ်ဗျ” လို့ ပြောပါတယ်။

ဇန်နဝါရီ ၁၁ ရက်လည်း စမွတ်ပရကန်ခရိုင် ဘန်ဘိုဒေသမှာ ထိုင်းနိုင်ငံသား ဒယ်လီပို့သမားတွေနဲ့ မြန်မာအလုပ်သမားတွေ ရန်ဖြစ်ပြီးတဲ့နောက်ပိုင်း ထိုင်းမျိုးချစ်အဖွဲ့တွေက မြန်မာအလုပ်သမားတွေပေါ်  ပစ်မှတ်ထားစစ်ဆေးမှုတွေ ဆက်တိုက်လုပ်ဆောင်နေတာပါ။

ထိုင်းဝန်ကြီးချုပ်ရုံးကနေ ဒေသတွင်းရှိ ရွှေ့ပြောင်းလုပ်သားတွေနဲ့ စီးပွားရေးလုပ်ငန်းတွေကို တင်းကျပ်စွာ စစ်ဆေးဖို့ ထုတ်ပြန်ထားတဲ့ အချိန်လည်းဖြစ်တဲ့အတွက် ထိုင်းနိုင်ငံရှိ မြန်မာ အလုပ်သမားတွေအနေနဲ့ ဥပေဒကို လေးစားလိုက်နာဖို့နဲ့ အိမ်ရှင်တွေရဲ့ ဓလေ့တွေကို နားလည်ဖို့ လိုအပ်နေပြီး အုပ်စုဖွဲ့အရက်သောက်တာ၊ ညအချိန်မတော် အော်ဟစ်ဆူညံတာတွေနဲ့ လူစုလူဝေးရှိတဲ့ နေရာတွေကို ရှောင်ကြဉ်ဖို့ ထိုင်းရောက် မြန်မာအချင်းချင်း တိုက်တွန်းနှိုးဆော်နေကြပါတယ်။ 

နန်းမြနဒီ/ မောရစ်

Source: Thai News / Top News