ထိုင်းနိုင်ငံအလယ်ပိုင်း၊ အယုဒ္ဓယခရိုင်၊ ဘန်ပအင်မြို့နယ်ထဲမှာ မိမိရင်သွေး သန္ဓေသားကို အမှိုက်ပုံးထဲ စွန့်ပစ်ထားတဲ့ မြန်မာမိန်းကလေးတယောက် ဖမ်းဆီးခံရတယ်လို့ ခေါဝ်ဆွတ် ထိုင်းသတင်းအရ သိရပါတယ်။

ပြီးခဲ့တဲ့ အောက်တိုဘာ ၈ ရက်က ဘန်ပအင်မြို့နယ်၊ ခလောင်းကျစ်ရပ်ကွက်ရှိ အမှိုက်ပုံးထဲမှာ ကိုယ်ဝန် ၄-၅ လအရွယ်ရှိ သန္ဓေသားကလေးငယ်အလောင်း တွေ့ရှိကြောင်း အမှိုက်သိမ်းသမားက လာရောက်အကြောင်းကြားခဲ့တယ်လို့ ဘန်ပအင်ရဲတပ်ဖွဲ့ တာဝန်ရှိသူက သတင်းထောက်ကို ပြောပါတယ်။

ရဲတပ်ဖွဲ့က အနီးနားတဝိုက် ရပ်ကွက်ထဲက နေအိမ်တွေ လိုက်လံမေးမြန်းစုံစမ်းသလို စီစီတီဗီ ကင်မရာတွေ စစ်ဆေးချက်အရ အောက်တိုဘာ ၈ ရက် မနက်စောစောမှာ မိန်းကလေးတယောက် အိပ်ရာခင်းနဲ့ ပတ်ထားတဲ့ တစုံတရာကို ယူဆောင်လာပြီး အမှိုက်ပုံနား ရောက်တော့ အမှိုက်ပုံးထဲ ပစ်ချပြီး လာလမ်းအတိုင်း ပြန်သွားခဲ့တယ်လို့ ဆိုပါတယ်။

တာဝန်ရှိသူတွေက အဆိုပါမိန်းကလေးရဲ့ ပုံပန်းသဏ္ဌာန်ကိုပြပြီး အနီးနားက နေအိမ်တွေ လိုက်လံမေးမြန်းတယ်၊ အဲဒီနောက် အဆောင်တခုမှာ ငှားနေတဲ့ မိန်းကလေးကို ဖမ်းမိတာလို့ ဆိုပါတယ်။ 

မိန်းကလေးကို တွေ့မြင်ချိန်မှာ ပင်ပန်းနွမ်းနယ်နေတယ်၊ သူမဟာ အသက် ၂၅ နှစ်အရွယ် မြန်မာရွှေ့ပြောင်းလုပ်သား အမျိုးသမီးတယောက်ဖြစ်တယ်၊ ကလေးစွန့်ပစ်ရတဲ့ အကြောင်းက သူမမှာ ရည်းစားနဲ့ကွဲပြီးကာမှ ကိုယ်ဝန် ၃ လရှိနေပြီဆိုတာ သိရတယ်၊ သူမအနေနဲ့ ကလေးကို စောင့်ရှောက်နိုင်မှာ မဟုတ်တာကြောင့် ကလေးထွက်လာတော့ အထုပ်နဲ့ထုပ်ပြီး အမှိုက်ပုံးမှာ သွားစွန့်ပစ်ခဲ့တာလို့ ထွက်ဆို ဝန်ခံသွားပါတယ်။

ရဲစခန်းက သူမကို “ရင်သွေးစွန့်ပစ်မှု၊ ၁၂ ပတ်သက်တမ်းအထက် သန္ဓေသား ဖျက်ချမှုတွေနဲ့ စွဲချက်တင်ထားတယ်၊ မည်သူမဆို မိမိကလေးအား အကြောင်းမဲ့ဖျက်ချပါက တရားဥပဒေအရ ထောင်ဒဏ်လ ၆ လ ဒါမှမဟုတ် ငွေဒဏ် ဘတ် ၁၀,၀၀၀ ပေးဆောင်ရမယ်” လို့ ဖော်ပြထားပါတယ်။ 

Source: Khaosod News