မကွေးတိုင်း၊ ဆောမြို့နယ်ထဲကို စစ်ကောင်စီတပ်က ဇန်နဝါရီ ၂၀ ရက် ညနေပိုင်းမှာ လေယာဥ်နဲ့ ဗုံးကြဲခဲ့တာကြောင့် ပြည်သူ တယောက် သေဆုံးကာ ၃ ယောက်ထက်မနည်း အပြင်းအထန် ဒဏ်ရာရရှိခဲ့တယ်လို့ ဒေသခံတွေဆီကနေ သိရပါတယ်။

ယောအလင်းတန်းအဖွဲ့ရဲ့တာဝန်ရှိသူက “ညနေ ၄ နာရီလောက်မှာ ဆောမြို့နယ်ထဲက လယ်ကြီးအိုင်ရွာကို ဗုံးကြဲခံလိုက်ရတာပါ။ ပြည်သူ ၄ ယောက် အပြင်းအထန် ဒဏ်ရာတွေရကြပြီး အဲဒီထဲက အမျိုးသားတယောက်က ရင်ဘတ် ဗုံးစဖောက်ဝင်တဲ့ဒဏ်ရာ ပြင်းထန်လို့ ဆေးကုနေရင်း ညနေ ၅ ​နာရီလောက်မှာ ဆုံးသွားပါတယ်။ ကျန်တဲ့ ၃ ယောက်ထဲမှာလည်း အသက်အန္တရာယ် စိုးရိမ်ရတဲ့သူတွေ ရှိနေသေးတယ်။ လူနေအိမ် ၃ လုံးလည်း ပျက်စီးခဲ့ပါသေးတယ်” လို့ ပြောပါတယ်။

လေကြောင်းတိုက်ခိုက်ခံရမှုကြောင့် ဆေးကုသမှုခံယူနေရင်း သေဆုံးသွားသူဟာ လယ်ကြီးအိုင်ကျေးရွာက အသက် ၆၀ ကျော်အရွယ် ဦးဖေခင်​ ဖြစ်ပါတယ်။

မကွေးလေတပ်က နေတက်လာတဲ့ MIG 29 ဂျက်တိုက်လေယာဉ်က လယ်ကြီးအိုင်ရွာထဲကို ဗုံးတလုံးကြဲပြီး ဒေသအခေါ် ရေပြွန်ပေါက်ကို ၂ လုံးနဲ့ သစ်ဆိမ့်ပင်ကို ၁ လုံးကြဲသွားတာလို့ ဆောမြို့နယ် ပကဖ တာဝန်ခံ ကိုနိုဘယ် က DVB ကို ပြောပါတယ်။

လယ်ကြီးအိုင်ရွာထဲမှာက ဘေးဝန်းကျင်ရွာတွေကနေ စစ်​လာရှောင်တဲ့သူတွေ ရှိနေတော့ ထိခိုက်မှု များခဲ့ကြတာပါ။ 

ဒဏ်ရာပြင်းပြင်းထန်ရထားတဲ့သူတွေက ကြံတောရွာသား တယောက်၊ ကံကြီးရွာက တယောက်နဲ့ ယောမြို့ရွာက တယောက်တို့ဖြစ်ကြပြီး ၃ ယောက်လုံးဟာ  စစ်ရှောင်ပြည်သူတွေ ဖြစ်ပါတယ်။ 

ဆောမြို့နယ် ပကဖတာဝန်ခံ ကိုနိုဘယ်က “ရေပြွန်ပေါက်နဲ့ သစ်ဆိမ့်ပင်ဘက်မှာတော့ ထိခိုက်မှုမရှိပါဘူး။ အခုဗုံးကြဲချသွာတဲ့နေရာတွေ ဘက်မှာ တိုက်ပွဲတွေဖြစ်နေတာ မရှိပါဘူး” လို့ DVB ကို ပြောပါတယ်။

အခုရက်ပိုင်းအတွင်း စစ်တပ်ဟာ ဆောမြို့နယ်အတွင်းကို UAV ကင်းထောက်ဒရုန်းတွေအပြင် ATR 47 ကင်းထောက်လေယာဉ်တွေ ပျံဝဲပြီး ကင်းထောက်တာတွေ ​ဆက်တိုက်ပြုလုပ်နေလို့ ဒေသခံပြည်သူတွေအနေနဲ့ စစ်တပ်ရဲ့ လေကြောင်းအန္တရာယ်ကို အထူးသတိထားဖို့ တိုက်တွန်းပါတယ်။

တော်လှန်ရေးတပ်ပေါင်းစုတွေဟာ ပြီးခဲ့တဲ့ ဒီဇင်ဘာ ၂၇ ရက် မနက်စောပိုင်းက စတင်ကာ Yawland Opreation စစ်ဆင်ရေးနာမည်နဲ့ ဂန့်ဂေါခရိုင်ရှိ စစ်တပ်စခန်းတွေနဲ့ ပျူစောထီးကျေးရွာတွေကို ထိုးဆင်စစ်တိုက်ခိုက်နေတာဖြစ်ပြီး ပျူစောထီးကျေးရွာ ၂ ရွာနဲ့ လက်နက်ခဲယမ်းအ များအပြား သိမ်းပိုက်ရရှိထားပါတယ်။