ဧရာဝတီတိုင်းမှာ သဘာဝဘေးကြောင့်အပြင် သွင်းအားစုဈေးနှုန်း ကြီးမြင့်မှုကြောင့် ကွမ်းရွက်တပိဿာ ကျပ် ၄၅,၀၀၀ အထိ ဈေးတက်နေတယ်လို့ ဒေသခံတွေနဲ့ ကွမ်းရွက် ရောင်းဝယ်ရေးပွဲရုံလုပ်ငန်းရှင်တွေဆီက သိရပါတယ်။

ဧရာဝတီတိုင်းမှာ ၂၀၂၅ ခုနှစ် ဇူလိုင်ကနေ စက်တင်ဘာအထိ ကာလရှည် ရေကြီးရေလျှံမှုကြောင့် ကွမ်းခြံတွေ ရေနစ်မြုပ်ပျက်စီးခဲ့ပြီး ရန်ကုန်နဲ့ တွံတေးဘက်က ဝယ်ယူနေရာတာကြောင့် အခုလို ဈေးနှုန်းမြင့်တက်နေတာလို့ ဆိုပါတယ်။ 

ဧရာဝတီတိုင်း ကွမ်းနှင့်ကွမ်းသီး ရောင်းဝယ်ရေးလုပ်ငန်းရှင်တယောက်က “ကွမ်းရွက်ဈေးက မြောက်နေတယ်။ ဒေသထွက် ကွမ်းရွက်က မရှိဘူး။ ရန်ကုန်၊ တွံတေးဘက်က ကွမ်းနုဝါတွေ ရောင်းနေရတာ။ ဒေသထွက်ကွမ်းရှိရင် ဈေး အခုလောက်မမြောက်ပါဘူး။ အခုလိုလောက်အထိကို ဈေးထိုးတက်နေတာက ဒေသထွက် ကွမ်းခြံတွေ ပျက်စီးခဲ့လို့လည်း ဈေးမြောက်နေတာ” လို့ ပြောပါတယ်။

ကျိုက်လတ် ကွမ်းစိုက်ပျိုးရေး လုပ်ငန်းရှင်တယောက်က “ကွမ်းတဧက ၅ ခြံက စိုက်လိုက် ရေမြုပ်လိုက်နဲ့ ၄ ကြိမ်အထိ ရေမြုပ်ဆုံးရှုံးခဲ့တယ်။ အခုအထိ ပြန်မစိုက်နိုင်သေးဘူး။ နာလန်မထူတဲ့အထိကို ဖြစ်သွားတာ။ ကွမ်းက ရေများရင် အဆင်မပြေဘူး။ ကွမ်းစိုက်တဲ့လုပ်ငန်းက အရင်းအနှီး အရမ်းများတယ်။ လူကလည်း ဂရုစိုက်ရတယ်။ ပုံမှန်မဟုတ်တဲ့ သဘာဝဘေးဒဏ်ကို မခံနိုင်ဘူး။ ပြီးခဲ့တဲ့နှစ် ရေကြီးချက်က တခါမှ မမြုပ်တဲ့နေရာတွေပါ ရေတက်မြုပ်ကုန်တာ” လို့ ပြောပါတယ်။

ဧရာဝတီတိုင်းမှာ ရေကြီးရေလျှံမှုကြောင့် ညောင်တုန်း၊ မအူပင်၊ ကျိုက်လတ်၊ ဖျာပုံ၊ ပန်းတနော်၊ ဟင်္သာတ၊ ဘိုကလေး၊ မော်လမြိုင်ကျွန်း၊ ဓနုဖြူ၊ ဝါးခယ်မ၊ ဟိုင်းကြီးကျွန်း၊ သာပေါင်း၊ ကန်ကြီးထောင့်၊ မြန်အောင် စတဲ့ ကွမ်းအဓိက စိုက်ပျိုးတဲ့ ဒေသတွေက ကွမ်းခြံတွေ ပျက်စီးခဲ့တာလို့ သိရပါတယ်။

ဧရာဝတီတိုင်းမှာ ၂၀၂၀ ပြည့်နှစ်လောက်က ကွမ်းရွက် ၁ ပိဿာဈေးဟာ ကျပ် ၁,၈၀၀ ကနေ ၂,၅၀၀ သာရှိပြီး အာဏာသိမ်းပြီးနောက်ပိုင်း သဘာဝဘေးကြောင့်အပြင် ကွမ်းစိုက်ပျိုးရာမှာအသုံးပြုတဲ့ ပိုးသတ်ဆေးတွေနဲ့ အထွေထွေသွင်းအားစုတွေ ဈေးတက်လာလို့ ကွမ်းဈေးပါ တရိပ်ရိပ် လိုက်တက်လာတယ်လို့ ဒေသခံတွေဆီက သိရပါတယ်။