ဧရာဝတီတိုင်းကနေ ရန်ကုန်မှာ အလုပ်သွားလုပ်နေတဲ့ လူငယ် ၃ ယောက် ပေါ်တာအဆွဲခံရပြီး မကွေးတိုင်းထဲက တပ်ရင်းတခုဆီကို အပို့ခံထားရတယ်လို့ မိသားစုဝင်တွေဆီက သိရပါတယ်။
မော်လမြိုင်ကျွန်းမြို့နယ်၊ သာပေါင်းနဲ့ ပန်းတနော်မြို့နယ်တို့ကနေ ရန်ကုန်ကို အလုပ်သွားလုပ်နေတဲ့ လူငယ် ၃ ယောက်ကို ဇန်နဝါရီလပထမအပတ်မှာ လှိုင်သာယာ အလုပ်ရုံတခုက အပြန် စစ်ကောင်စီတပ်က အတင်းအဓမ္မ ပေါ်တာဆွဲဖမ်းဆီးခဲ့ပြီး မကွေးတိုင်း၊ မင်းဘူးမြို့က စစ်တပ် တပ်ရင်းတခုဆီကို ပို့ခဲ့တာလို့ ဆိုပါတယ်။
မိသားစုဝင် တယောက်က “အတူနေသူငယ်ချင်း ၃ ယောက်လုံး ပေါ်တာအဆွဲခံရတာ။ စက်ရုံကအပြန်မှာ စစ်တပ်နဲ့ အရပ်သားတချို့က ပေါ်တာဆွဲ ဖမ်းခေါ်တာခံရတာ။ သူတို့ ပေါ်တာအဆွဲခံရတာကို မကွေတိုင်းထဲက မင်းဘူးမြို့က တပ်ရင်းတခုကိုရောက်မှ ကလေးတွေက အဆက်အသွယ်ခိုးလုပ်လို့ သိရတာ” လို့ ပြောပါတယ်။
အဓမ္မပေါ်တာဆွဲခံရတဲ့ လူငယ် ၃ ယောက်ဟာ အသက် ၁၉ နှစ်အရွယ်၊ အသက် ၂၀ ကျော် အရွယ်နဲ့ အသက် ၂၉ နှစ်အရွယ် ဖြစ်တယ်လို့ သိရပါတယ်။
လူငယ်တွေရဲ့ မိသားစုဝင်တယောက်က “ရန်ကုန်မှာလိုက်ရှာကြတာ ၂ ရက်လောက်ပဲကြာတယ်။ မကွေးတိုင်းဘက် အပို့ခံရတာ အံ့သြတယ်။ ဟိုဘက်မှာလည်း အလုပ်ကြမ်းတွေခိုင်းတယ်လို့ သိရတယ်။ ကောင်လေးတွေရဲ့ အမေတွေဆို အခု ရူးသလိုဖြစ်နေပြီ။ အချိန်ပြည့်ငိုယိုနေတာ” လို့ ပြောပါတယ်။
အဲဒီလူငယ်တွေဟာ ရန်ကုန်တိုင်း၊ လှိုင်သာယာမြို့ကို ပြောင်းရွှေ့အလုပ်လုပ်နေတာ အချိန် ၂ လကျော်လောက်ပဲ ရှိသေးတယ်လို့လည်း သိရပါတယ်။
စစ်ကောင်စီဟာ အတင်းအဓမ္မစစ်မှုထမ်းစေတဲ့ ပြည်သူ့စစ်မှုထမ်းသင်တန်း အမှတ်စဉ် ၁ ကို ၂၀၂၄ ခုနှစ်မှာ စတင်ဖွင့်ခဲ့ပြီး အခုဆိုရင် သင်တန်းအမှတ်စဉ် ၂၁ ကို စတင်တော့မှာ ဖြစ်ပါတယ်။
