ကရင်ပြည်နယ်၊ ကော့ကရိတ်မြို့ ကျေးရွာအနီးကို စစ်ကြောင်းထိုးလာတဲ့ စစ်ကောင်စီတပ်တွေနဲ့ ဇန်နဝါရီ ၁၇ ရက်နေ့ မနက် ၇ နာရီခွဲကစပြီး ညနေ့ပိုင်းအထိ တိုက်ပွဲတွေပြင်းထန်နေတယ်လို့ အမှတ် ၃၁ ဗျူဟာ၊ စစ်ကြောင်းတာဝန်ရှိသူက ပြောပါတယ်။
နှစ်ဖက်တိုက်ပွဲအတွင်း စစ်တပ်စစ်ကြောင်းတွေ အထိနာခဲ့တာကြောင့် လေကြောင်းကနေ လေယာဉ်၊ ဒရုန်းတွေနဲ့ ဗုံးကြဲတိုက်ခိုက်တာတွေအပြင် လက်နက်ကြီးတွေနဲ့ ညနေပိုင်းအထိ အဆက်မပြတ် ပစ်ခတ်တိုက်ခိုက်နေတယ်လို့ ဆိုပါတယ်။
အမှတ် ၃၁ ဗျူဟာ၊ စစ်ကြောင်း တပ်ရင်းမှူး ဗိုလ်ကျော်ဟိန်းက “ဒရုန်းတွေကော လေယာဉ်တွေကော၊ လက်နက်ကြီးတွေကောဆိုတော့ သူတို့ တော်တော် အထိနာလို့ဖြစ်မယ်။ ဒီကောင်တွေက အထိမနာဘဲနဲ့တော့ မမဲဘူး။ တော်တော် အထိနာလို့ တော်တော်မဲတာ” လို့ ပြောပါတယ်။
ဒါ့အပြင် လေကြောင်းကနေ ဗုံးကြဲနေတဲ့ Y 12 လေယာဉ်ကို အမှတ် ၃၁ ဗျူဟာ၊ စစ်ကြောင်းက ပြန်လည်ပစ်ခတ်ခဲ့တာကြောင့် ထိမှန်ပြီး ချက်ချင်း ပြန်လှည့်သွားတယ်လို့ စစ်ကြောင်းတာဝန်ရှိသူက ပြောပါတယ်။
တိုက်ပွဲအတွင်း စစ်တပ်ဘက်က ထိခိုက်သေဆုံးမှုနဲ့ လက်နက်ခဲယမ်းသိမ်းဆည်းရမိမှု အခြေအနေကို လက်ရှိ တိုက်ပွဲဖြစ်ပွားနေဆဲမို့ မသိရသေးဘူးလို့ ဆိုပါတယ်။
စစ်တပ်က နောက်ဆုံးအကြိမ်ပြုလုပ်မယ့် ရွေးကောက်ပွဲအပိုင်း ၃ ကို ကော့ကရိတ်မြို့နယ်နဲ့ ကြာအင်းဆိပ်ကြီးမြို့နယ်မှာ ကျင်းပနိုင်ဖို့ နေရာတော်တော်များများကို စစ်အင်အား ဖြည့်တင်းထားပါတယ်။
နှစ်ဖက်တိုက်ပွဲတွေနဲ့ စစ်ကော်မရှင်စစ်ကြောင်းတွေ စစ်ကြောင်းထိုးနေတာ၊ မြေပြင်ကနေ လက်နက်ကြီးပစ်ခတ်တာ၊ လေကြောင်းကနေ ဗုံးကြဲနေတာကြောင့် ထီဖိုးစံ၊ နန်းရွှေမိတ်၊ မိဖာလဲ့၊ စော်ဟဲ၊ နောင်တပွဲ၊ နောင်ကိုင်း၊ နောင်တပ္ပံ၊ မြပတိုင်၊ နောင်မိ စတဲ့ကျေးရွာ ၂၀ က သောင်းနဲ့ချီတဲ့ ဒေသခံတွေ ထွက်ပြေးတိမ်းရှောင်နေရပါတယ်။
