တောင်ကုတ်-ပန်းတောင်း ရိုးတောင်ကျော်လမ်း ကပစ ၁၆ ကာကင်း ပွိုင့် ၆၆၆ စခန်းအနီး၊ ကာကင်းစစ်ကြောင်းတခုက ထွက်ပြေးလာတဲ့ စစ်ကောင်စီတပ်ဖွဲ့ဝင် ၂ ယောက်ကို အာရက္ခတပ်တော် (AA) တပ်ဖွဲ့ဝင်တွေက ဖမ်းဆီးရမိတယ်လို့ သိရပါတယ်။
တပ်ဖွဲ့ဝင် ၂ ယောက်ဟာ ဇန်နဝါရီ ၁၃ ရက် ညနေ ၃ နာရီလောက်မှာ ကပစ ၁၆ နဲ့ ပွိုင့် ၆၆၆ ကြား ကာကင်းစစ်ကြောင်းတခုမှ ထွက်ပြေးလာပြီး အာရက္ခတပ်တော်ဘက်က ဖမ်းဆီးလိုက်တာလို့ စစ်ရေးသတင်းရင်းမြစ်က ပြောပါတယ်။
“မနေ့ညက ထွက်ပြေးလာတာပါ ၂ ယောက်၊ သူတို့က ပြည်သူ့စစ်တွေပါ၊ လက်နက်ခဲယမ်း အပြည့်အစုံ ပါတယ်၊ အခုတော့ AA စစ်ကြောင်းက ဖမ်းဆီးထားတယ်။”
AA က ဖမ်းဆီးရမိထားတဲ့ ထွက်ပြေးလာသူ စစ်ကောင်စီတပ်ဖွဲ့ဝင် ၂ ယောက်လုံး ပြည်သူ့စစ်တွေ ဖြစ်တယ်လို့ သူက ပြောပါတယ်။
ပန်းတောင်းမြို့နယ်အပိုင် ပွိုင့် ၆၆၆ စခန်းပတ်ဝန်းကျင် ကာကင်းအားလုံးကို AA နဲ့ ပူးပေါင်း တော်လှန်ရေးဘက်က အဓိက ဝိုင်းဝန်းပိတ်ဆို့ထားတဲ့အတွက် စားနပ်ရိက္ခာပြတ်လပ်ပြီး အငတ်ဘေး ရင်ဆိုင်နေရတဲ့အတွက် အခုလို ထွက်ပြေးလာတာလို့ ဆိုပါတယ်။
စစ်ကောင်စီက ပွိုင့်ကုန်း၊ လေလာတောင်၊ ဆင်လန် စတဲ့ ရှေ့တန်းစခန်းတွေကို ဒရုန်းအသုံးပြုပြီး စားနပ်ရိက္ခာ ပို့ဆောင်နေပေမဲ့ လုံလောက်မှုမရှိတဲ့အပြင် တော်လှန်ရေးတပ်ဘက်က ဒရုန်းကျချိန် အာပီဂျီ၊ စနိုက်ဘာ ပစ်ခတ်မှုကြောင့် ရိက္ခာထုပ် ပျက်စီးမှုရှိသလို လာယူတဲ့ တပ်ဖွဲ့ဝင်တချို့လည်း သေဆုံးမှုရှိနေတယ်လို့ စစ်ရေးသတင်းရင်းမြစ်က ပြောပါတယ်။
“အခုနောက်ပိုင်း လေယာဉ်နဲ့ ပစ္စည်းမပို့တော့ဘူး၊ ဒရုန်းနဲ့ပို့တယ်၊ အဲဒီ ဒရုန်းကျချိန် တော်လှန်ရေးဘက်ကလည်း စနိုက်ဘာ၊ အာပီဂျီတို့နဲ့ ပစ်တယ်၊ အဓိက စကမဘက်က အထုပ်တွေ ပျက်စီးတယ်၊ တပ်ဖွဲ့ဝင်တွေ သေတယ်။”
ပန်းတောင်းမြို့နယ် ကပစ ၁၆ ကို တော်လှန်ရေးတပ်တွေ ဝင်ရောက်လာမှာကို စိုးရိမ်တဲ့အတွက် ကပစ ၁၆ မှ ပွိုင့် ၆၆၆ စခန်းထိ စစ်ကြောင်း ၃ ကြောင်းထက်မနည်း ထိုးနေပြီး ကာကင်းစခန်းတွေကိုလည်း ပြန့်ကျဲပြီး တိုးချထားတယ်လို့ တော်လှန်ရေးအသိုက်အဝန်းဆီက သိရပါတယ်။
