ကရင်ပြည်နယ်၊ လှိုင်းဘွဲမြို့နယ်ရှိ  ကရင်နယ်ခြားစောင့်တပ် (BGF) စခန်းတခုကို စစ်ကောင်စီ လေတပ်က  ဇန်နဝါရီ ၁၂ ရက်​မှာ ပထမဆုံးအကြိမ် ဗုံးကြဲတိုက်ခိုက်ခဲ့လို့ BGF စစ်သည် တယောက် သေဆုံးပြီး  ၄ ယောက် ဒဏ်ရာရသွားပါတယ်။

လှိုင်းဘွဲမြို့နယ် သိုက်​တောရွာနံ့ ဥ​ဒေါင်းရွာအကြားရှိ  BGF စစ်​ဒေသ အမှတ် ၁ စခန်း ( ဥဒေါင်းရဲစခန်းဟောင်းနေရာ-ကူးတို့ဆိပ်စခန်း) ကို စစ်​တပ်က တိုက်​လေယာဥ်နဲ့ မနေ့ နေ့လယ် ၃ နာရီလောက်မှာ ဗုံး ၂ လုံး ကြဲချသွား​တာလို့ ဒေသခံ တယောက်က ပြောပါတယ်။

အဆိုပါ ဗုံးကြဲတိုက်ခိုက်မှုကြောင့် ကူးတို့ဆိပ်ရွာနဲ့ ဥဒေါင်းရွာက ကရင်ရွာသား ၂၀၀ လောက် ထွက်ပြေးခဲ့ကြရပါတယ်။

ဗုံးကြဲခံရတဲ့ BGF စစ်​ဒေသ အမှတ် ၁ စခန်းဟာ ကရင်အမျိုးသားတပ်မ​တော် (KNA) အဖြစ် တံဆိပ်မပြောင်းဘဲဆက်လက်ရပ်တည်နေတဲ့ အဖွဲ့ဖြစ်ပါတယ်။