၂၀၂၃ ခုနှစ် အောက်တိုဘာ ၇ ရက်မှာ ဟားမတ်စ်နဲ့ အစ္စရေးအကြား ပဋိပက္ခ စဖြစ်ချိန်ကစပြီး ပါလက်စတိုင်းသတင်းထောက် စုစုပေါင်း ၂၅၆ ယောက် သေဆုံးခဲ့ပြီး ဂါဇာမြို့ဟာ သတ်ဖြတ်မှု အများစုဖြစ်ခဲ့တဲ့ နေရာဖြစ်တယ်လို့ ပါလက်စတိုင်းသတင်းထောက်များစုစည်းမှု (PJS) က ဇန်နဝါရီ ၅ ရက်မှာ အစီရင်ခံစာ ထုတ်ပြန်ပါတယ်။

၂၀၂၅ ခုနှစ်ဟာ ပါလက်စတိုင်း သတင်းစာပညာအတွက် သွေးထွက်သံယိုမှု အများဆုံးနဲ့ အန္တရာယ်အရှိဆုံး နှစ်တွေထဲက တခုဖြစ်ပြီး မီဒီယာဝန်ထမ်း ၆၃ ယောက် သေဆုံးခဲ့တယ်လို့ အစီရင်ခံစာထဲမှာ ဖော်ပြထားပါတယ်။

၂၀၂၅ ခုနှစ်က ဂါဇာလို နေရာတွေမှာ သတင်းယူနေတုန်း တိုက်ရိုက် လေကြောင်းတိုက်ခိုက်မှုတွေ၊ သေနတ်ပစ်ခတ်မှုတွေနဲ့ ပစ်မှတ်ထားတိုက်ခိုက်မှုတွေကြောင့် သတင်းထောက်တွေ အများကြီး သေဆုံးခဲ့တယ်လို့ အစီရင်ခံစာမှာ ဖော်ပြထားပါတယ်။

ပါလက်စတိုင်း သတင်းထောက်တွေဟာ သေနတ်ပစ်ခတ်မှုတွေ၊ ပေါက်ကွဲမှုတွေကြောင့် ပြင်းထန်တဲ့ဒဏ်ရာတွေ၊ အဖမ်းအဆီးတွေနဲ့ အုပ်ချုပ်ရေးဆိုင်ရာ ထောင်ဒဏ်ချမှတ်ခြင်း၊ လူတွေ့မေးမြန်းတာတွေကို တားဆီးခြင်းနဲ့ ရှည်လျားတဲ့ စစ်ဆေးမေးမြန်းမှုတွေကြောင့် ဖိအားတွေနဲ့ ရင်ဆိုင်နေရတယ်လို့ အစီရင်ခံစာထဲမှာ ဖော်ပြထားပါတယ်။

မီဒီယာအဖွဲ့အစည်းတွေ၊ ရုပ်သံလွှင့်ဌာနတွေ၊ ရုံးတွေနဲ့ ရိုက်ကူးရေးပစ္စည်းတွေ ပျက်စီးသွားလို့ အခင်းဖြစ်ပွားရာ နေရာကနေ သတင်းယူနိုင်စွမ်း အားနည်းသွားတယ်လို့လည်း ထပ်လောင်းဖော်ပြထားပါတယ်။

ဂါဇာတောင်ပိုင်းမှာ အိုးမဲ့အိမ်မဲ့ပြည်သူတွေ ခိုလှုံရာ တဲတလုံးကို အစ္စရေးက လေကြောင်းကနေ တိုက်ခိုက်မှုကြောင့် တနင်္လာနေ့မှာ ပါလက်စတိုင်း ၄ ယောက်ထက်မနည်း သေဆုံးပြီး ၂ ယောက် ဒဏ်ရာရခဲ့တယ်လို့ ပါလက်စတိုင်း ဆေးဘက်ဆိုင်ရာ သတင်းရင်းမြစ်တွေနဲ့ မျက်မြင်သက်သေတွေက ဆိုပါတယ်။

အစ္စရေး ကာကွယ်ရေးတပ်ဖွဲ့ (IDF) တွေက တနင်္လာနေ့မှာ ကြေညာချက်တစောင် ထုတ်ပြန်ခဲ့ပြီး တောင်ပိုင်းဂါဇာက အစ္စရေးတပ်ဖွဲ့တွေကို ချက်ချင်းတိုက်ခိုက်ဖို့ စီစဉ်နေတဲ့ ဟားမတ်စ် စစ်သွေးကြွတယောက်ကို “အပစ်အခတ်ရပ်စဲရေး သဘောတူညီချက်နဲ့အညီ” ပစ်ခတ်ခဲ့တယ်လို့ ပြောပါတယ်။

တောင်ပိုင်းကွပ်ကဲမှုဌာနက တပ်ဖွဲ့တွေကို ဆက်တာဝန်ချထားပြီး လက်ငင်းခြိမ်းခြောက်မှုတွေကို ဖယ်ရှားဖို့ ဆက်ဆောင်ရွက်သွားမယ်လို့လည်း IDFတွေက ပြောခဲ့ပါတယ်။

Source: Reuters