အမေရိကန်သမ္မတ ဒေါ်နယ်ထရမ့်ပ်ရဲ့ ခြိမ်းခြောက်မှုနဲ့ ရင်ဆိုင်နေရချိန်မှာ လက်နက်စွဲကိုင် တိုက်ခိုက်ဖို့ အသင့်ရှိနေတယ်လို့ ကိုလံဘီယာသမ္မတ ဂူစတာဗို ပေထရိုက ဇန်နဝါရီ ၅ ရက်မှာ ကြွေးကြော်လိုက်ပါတယ်။

ပြောက်ကျားရဲဘော်ဟောင်းဖြစ်တဲ့ ပေထရိုက “ကျုပ် လက်နက်မကိုင်တော့ပါဘူးလို့ ကျိန်ဆိုခဲ့တာ။ ဒါပေမဲ့ အမိမြေကို ကာကွယ်ဖို့ လက်နက်ပြန်လည်စွဲကိုင်ရတော့မှာပေါ့” လို့ X လူမှုကွန်ရက်မှာ ရေးသားခဲ့ပါတယ်။

ပေထရိုဟာ ၁၉၈၉ ခုနှစ် ငြိမ်းချမ်းရေးစာချုပ်အရ လက်နက်စွန့်ခဲ့တဲ့ M-19 မြို့ပြပြောက်ကျားအဖွဲ့ဝင်ဟောင်း တယောက် ဖြစ်ပါတယ်။

ဗင်နီဇွဲလားသမ္မတ နီကိုလပ်စ်မာဒူရိုကို ဝင်ဖမ်းပြီးတဲ့နောက် ကိုလံဘီယာကိုပါ စစ်ရေးအရ အရေးယူဖို့ သဘောတူတယ်လို့ ထရမ့်ပ်က ပြောကြားထားတာပါ။

ဒါ့အပြင် ပေထရိုဟာ ကိုကင်းထုတ်ပြီး အမေရိကန်ကို ရောင်းစားနေတဲ့ “စိတ်ပျက်စရာလူ” ဖြစ်တယ်လို့လည်း ထရမ့်ပ်က စွပ်စွဲထားပါတယ်။

အမေရိကန်ဟာ ပေထရိုနဲ့ သူ့မိသားစုကို ပိတ်ဆို့မှုတွေလုပ်ထားသလို၊ မူးယစ်တိုက်ဖျက်ရေး မဟာမိတ်စာရင်းကနေလည်း ကိုလံဘီယာကို ဖယ်ရှားခဲ့ပါတယ်။

ပေထရိုက “လုံလောက်တဲ့ ထောက်လှမ်းရေးအချက်အလက်မရှိဘဲ ဒီအဖွဲ့တွေကို ဗုံးကြဲမယ်ဆိုရင် ကလေးငယ်တွေ အများကြီး သေကျေနိုင်သလို၊ တောင်သူလယ်သမားတွေကို ဗုံးကြဲမယ် ဆိုရင်လည်း တောင်တန်းတွေပေါ်မှာ ပြောက်ကျားတွေ ထောင်ချီပေါ်ပေါက်လာလိမ့်မယ်။ ပြည်သူအများစု ချစ်ခင်လေးစားတဲ့ သမ္မတကို ဖမ်းဆီးမယ်ဆိုရင်တော့ ပြည်သူတွေရဲ့ ဒေါသအဟုန်ကို ဖွင့်လွှတ်လိုက်သလို ဖြစ်သွားပါလိမ့်မယ်”လို့ ရေးသားထားပါတယ်။

ထရမ့်ပ်အစိုးရအဖွဲ့ဟာ ကိုလံဘီယာကလက်ယာယိမ်း အတိုက်အခံတွေနဲ့ ရင်းနှီးတဲ့ ဆက်ဆံရေးရှိပြီး၊ အဲဒီအတိုက်အခံတွေကတော့ ဒီနှစ်ထဲမှာ ကျင်းပမဲ့ ဥပဒေပြုလွှတ်တော်နဲ့ သမ္မတရွေးကောက်ပွဲတွေမှာ အနိုင်ရဖို့ မျှော်လင့်ချက် ကြီးကြီးမားမား ထားရှိနေကြပါတယ်။

Source: Reuters