ဗင်နီဇွဲလား အာဏာရှင်သမ္မတ နီကိုလပ်စ်မာဒူရိုကို အမေရိကန်က ကြက်ကလေး ငှက်ကလေး ဖမ်းသလိုမျိုး ဘယ်လို ဝင်ဖမ်းသွားခဲ့သလဲ၊  မာဒူရိုကို ဖမ်းဆီးအပြီးမှာပဲ မြန်မာအရေး အမေရိကန် နိုင်ငံခြားရေးဝန်ကြီးရဲ့ ထုတ်ပြန်ချက်က ဘယ်လိုသဘောဆောင်နေသလဲ၊ မာဒူရို နောက်ကို မင်းအောင်လှိုင်ရော လိုက်ရဖို့ရှိသလား ဆိုတာ  သုံးသပ်တင်ဆက်သွားမှာ ဖြစ်ပါတယ်။

ဗင်နီဇွဲလားမှာ  အာဏာရှင်သမ္မတ နီကိုလပ်စ်မာဒူရိုကို အမေရိကန်က ဝင်ရောက်ဖမ်းဆီးခဲ့တဲ့ သတင်းက တကမ္ဘာလုံးကို တုန်လှုပ်သွားစေခဲ့ပါတယ်။ မြန်မာပြည်မှာဆိုရင်လည်း မာဒူရိုလိုပဲ ကြာသပတေးနံနဲ့စတဲ့ အာဏာရှင် မင်းအောင်လှိုင်သာ အခုလို အဖမ်းခံရရင် ဘယ်လောက် ကောင်းမလဲလို့ ပြည်သူတွေက မျှော်လင့်နေကြပါတယ်။

ဟောလိဝုဒ် ရုပ်ရှင်တွေထဲကအတိုင်း ညဘက်ကြီး လေကြောင်းတိုက်ခိုက်၊ အထူးတပ်ဖွဲ့တွေက အိမ်ထဲထိ ဝင်စီးပြီး သမ္မတကို လက်ထိတ်ခတ် ခေါ်သွားတာမျိုးက တကယ့်လက်တွေ့ဘဝမှာ ဖြစ်လာလိမ့်မယ်လို့ ဘယ်သူမှ ထင်မထားခဲ့ကြပါဘူး။

အမေရိကန်စစ်ဆင်ရေးရဲ့ တရားဝင်မှုကို မေးခွန်းထုတ်နေကြတာ ရှိသလို၊ ရွေးကောက်ပွဲ မနိုင်တာကို အနိုင်လုပ်ပြီး အတိုက်အခံတွေကို ဖိနှိပ်၊ တိုင်းသူပြည်သားတွေကို အတိဒုက္ခရောက်အောင်လုပ်တဲ့ အာဏာရှင်တယောက် ပြုတ်ကျသွားတဲ့အပေါ် နှစ်ထောင်းအားရ ရှိကြသူတွေလည်း ရှိနေပါတယ်။

အသွင်ကူးပြောင်းရေးကာလ မတိုင်ခင်အထိ ဗင်နီဇွဲလားကို အမေရိကန်က အုပ်ချုပ်သွားမယ် လို့လည်း သမ္မတ ဒေါ်နယ်ထရမ့်ပ်က ပြောထားပေမဲ့ မရေရာမှုတွေ အများကြီး ရှိနေပါသေးတယ်။

အပိုင်း ၁ - စောင့်ကြည့် မျက်လုံးများနှင့် အိမ်ပုံစံတူ လေ့ကျင့်မှု

ဒီစစ်ဆင်ရေးကို “Operation Absolute Resolve” လို့ နာမည်ပေးထားပါတယ်။ အကောင်အထည်မဖော်ခင် လပေါင်းများစွာ အလိုကတည်းက အမေရိကန် ပင်တဂွန် စစ်ဌာနချုပ်နဲ့ CIA ထောက်လှမ်းရေးတွေဟာ ဗင်နီဇွဲလားသမ္မတ နီကိုလပ်စ်မာဒူရိုရဲ့ လှုပ်ရှားမှုမှန်သမျှကို မျက်ခြည်မပြတ် စောင့်ကြည့်နေခဲ့တာ ဖြစ်ပါတယ်။

သတင်းရင်းမြစ်တွေရဲ့ အဆိုအရ ဗင်နီဇွဲလား အစိုးရအဖွဲ့အတွင်းက သတင်းပေးသူတဦး အပါအဝင် အမေရိကန် လျှို့ဝှက်ထောက်လှမ်းရေး အဖွဲ့ငယ်လေးဟာ ဩဂုတ်လကတည်းက မြေပြင်မှာ ရှိနေခဲ့တာပါ။ သူတို့ရဲ့ ထောက်လှမ်းမှုဟာ အရမ်းအသေးစိတ်ပါတယ်။ အသက် ၆၃ နှစ်အရွယ် မာဒူရို ဘယ်အချိန် အိပ်တယ်၊ ဘာစားတယ်၊ ဘယ်လိုအဝတ်အစားတွေ ဝတ်တယ် ဆိုတာက အစ အကုန်သိနေပါတယ်။ စစ်ဘက်ဆိုင်ရာ အရာရှိကြီးတွေရဲ့ ပြောကြားချက်အရဆိုရင် မာဒူရိုရဲ့ “အိမ်မွေးတိရစ္ဆာန်လေးတွေ” အိမ်ထဲမှာ ဘယ်နေရာရှိနေသလဲ ဆိုတာကိုပါ ထောက်လှမ်းထားနိုင်ခဲ့တယ်လို့ ဆိုပါတယ်။

ဒါပေမဲ့ သတင်းရရုံနဲ့ မပြီးပါဘူး။ အမေရိကန် အထူးတပ်ဖွဲ့တွေဖြစ်တဲ့ Delta Force တွေဟာ မာဒူရို နေထိုင်တဲ့ ကာရာကပ်စ်မြို့က ခံတပ်လို လုံခြုံရေးချထားတဲ့ အိမ်ပုံစံအတိုင်း ‘ပုံစံတူ အရွယ်အစားတူ အိမ်တလုံး’ ကို တည်ဆောက်ခဲ့ပါတယ်။ အဲဒီ ပုံစံတူအိမ်ထဲမှာ Delta Force အထူးတပ်ဖွဲ့တွေဟာ ဘယ်လမ်းက ဝင်မယ်၊ ဘယ်တံခါးကို ဖောက်မယ် ဆိုတာကို လပေါင်းများစွာ အသေးစိတ် လေ့ကျင့်ခဲ့ကြပါတယ်။

ဒီဇင်ဘာလ အစောပိုင်းမှာတော့ စစ်ဆင်ရေး စီမံချက် အပြီးသတ် ရေးဆွဲနိုင်ခဲ့ပါတယ်။ ဒါဟာ စစ်အေးခေတ်နောက်ပိုင်း လက်တင်အမေရိကမှာ အမေရိကန်ရဲ့ အကြီးမားဆုံး စစ်ရေး ဝင်ရောက်စွက်ဖက်မှုကြီး ဖြစ်လာပါတယ်။ ဒီကိစ္စကို ကွန်ဂရက်လွှတ်တော်ကိုတောင် ကြိုတင် အသိမပေးဘဲ အထူးလျှို့ဝှက်ထားခဲ့ပါတယ်။

တကယ်တမ်းမှာ သမ္မတ ဒေါ်နယ်ထရမ့်ပ်က လွန်ခဲ့တဲ့ ၄ ရက်ကတည်းက ဒီစစ်ဆင်ရေးကို ‘Go’ လို့ ခွင့်ပြုမိန့် ပေးခဲ့ပြီးသားပါ။ ဒါပေမဲ့ ရာသီဥတု အခြေအနေ မကောင်းတာရယ်၊ တိမ်ထူနေတာရယ်ကြောင့် စစ်ဘက်ဆိုင်ရာ ခေါင်းဆောင်တွေက စောင့်ဆိုင်းဖို့ အကြံပြုခဲ့ပါတယ်။ ဗိုလ်ချုပ်ကြီး ဒန်ကိန်း ပြောပြချက်အရဆိုရင် ခရစ္စမတ်နဲ့ နှစ်သစ်ကူး ကာလတလျှောက်လုံး အမေရိကန် စစ်သည်တွေဟာ အမိန့်ရတာနဲ့ စဖို့ အသင့်ပြင်ထားခဲ့ကြတယ်လို့ ဆိုပါတယ်။

အပိုင်း ၂ -  ကရာကပ်စ်မြို့မှ သေမင်းတမန်အမှောင်ထု

အမေရိကန် စံတော်ချိန် ဇန်နဝါရီ  ၂ ရက်နေ့ သောကြာနေ့ည၊ ည ၁၀ နာရီ ၄၆ မိနစ်မှာတော့ သမ္မတ ထရမ့်ပ်ဆီကနေ အဆုံးအဖြတ်အမိန့် ရောက်လာပါတယ်။ “လွန်ခဲ့တဲ့ ၃/၄ ရက် လောက်ကတည်းက ငါတို့ လုပ်ဖို့ ပြင်ထားတာ၊ အခု ရာသီဥတု ကောင်းသွားပြီ၊ Go လို့ ပြောလိုက်တယ်” လို့ ထရမ့်ပ်က Fox News သတင်းဌာနကို ပြန်ပြောပြပါတယ်။ ဗိုလ်ချုပ်ကြီး ဒန်ကိန်း ကလည်း သမ္မတက သူတို့ကို ‘Good luck and Godspeed” လို့ ဆုတောင်းပေးပြီး စေလွှတ်လိုက်တယ်လို့ ဆိုပါတယ်။

စစ်ဆင်ရေးစတာနဲ့ တပြိုင်နက် ကာရာကပ်စ်မြို့တော်ကြီးတခုလုံး လျှပ်စစ်မီးတွေ ပြတ်တောက်ပြီး အမှောင်ကျသွားခဲ့ပါတယ်။ ဒါဟာ အမေရိကန်ရဲ့ ဆိုက်ဘာတိုက်ခိုက်မှုနဲ့ နည်းပညာစွမ်းရည်ပြမှု တခု ဖြစ်ပါတယ်။ “ကာရာကပ်စ်မြို့ မီးတွေ ငြိမ်းသွားတာက ကျုပ်တို့ရဲ့ ကျွမ်းကျင်မှု တခုကြောင့်ပါ၊ အဲဒီအမှောင်ထုဟာ သေမင်းတမန်ပါပဲ” လို့ ထရမ့်ပ်က ဂုဏ်ယူစွာနဲ့ ပြန်ပြောပြပါတယ်။ မြန်မာပြည်မှာတော့ မီးက သူ့ဘာသာသူ ပျက်ပျက်နေတာနဲ့တင် မီးဖျက်ဖို့တောင် လိုချင်မှလိုမှာပါ။

မီးပျက်သွားပြီး မကြာခင် ကာရာကပ်စ် ဒေသစံတော်ချိန် မနက် ၂ နာရီလောက်မှာတော့ ကျယ်လောင်တဲ့ ပေါက်ကွဲသံကြီးတွေ ပေါ်ထွက်လာပါတယ်။ အမေရိကန်ဟာ စုစုပေါင်း လေယာဉ် ၁၅၀ ကျော် အသုံးပြုခဲ့ပါတယ်။ အဲဒီထဲမှာ F-35 တိုက်လေယာဉ်တွေ၊ F-22 တွေ၊ B-1 ဗုံးကြဲလေယာဉ်တွေနဲ့ ထောက်လှမ်းရေးလေယာဉ်တွေ ပါဝင်ပါတယ်။ အနောက်ကမ္ဘာခြမ်းက စစ်အခြေစိုက်စခန်း ၂၀ လောက်ကနေ တပြိုင်နက်တည်း ပျံတက်လာကြတာ ဖြစ်ပါတယ်။

အမေရိကန် တာဝန်ရှိသူတွေရဲ့ အဆိုအရ ဒီလေကြောင်းတိုက်ခိုက်မှုတွေဟာ မာဒူရိုရဲ့ လေကြောင်းရန် ကာကွယ်ရေးစနစ် (Air Defense Systems) တွေကို အဓိက ပစ်မှတ်ထားတာ ဖြစ်ပါတယ်။ လာကာလိုတာ (La Carlota) လေတပ်စခန်းနဲ့ ကာရေဘီယံ ပင်လယ်ထွက်ပေါက် ဖြစ်တဲ့ လာဂွိုင်းရား (La Guaira) ဆိပ်ကမ်းတို့ အပါအဝင် နေရာ ၅ ခုလောက်ကို ဗုံးကြဲခဲ့ပါတယ်။

မြို့ခံတွေဖြစ်တဲ့ ဒန်နီရယ်လာနဲ့ သတင်းထောက် အာနဗာနက်ဆာ တို့ကတော့ “ပြတင်းပေါက်တွေ တုန်ခါသွားတဲ့အထိ ကျယ်လောင်တဲ့ အသံကြီးတွေ ကြားရပြီး မီးခိုးလုံးကြီးတွေ တက်လာတာကို မြင်ရတယ်” လို့ ဆိုပါတယ်။ ကွန်ဒိုတိုက်ခန်းတွေရဲ့ Chat Group တွေထဲမှာလည်း ကြောက်လန့်တကြား မေးမြန်းသံတွေနဲ့ ပြည့်နှက်နေခဲ့ပါတယ်။

အပိုင်း ၃ - ကြက်ကလေး ငှက်ကလေးလို အဖမ်းခံခဲ့ရတဲ့ မာဒူရို

လေကြောင်းတိုက်ခိုက်မှုတွေနဲ့အတူ မြေပြင်မှာတော့ အထူးတပ်ဖွဲ့တွေရဲ့ အခန်းကဏ္ဍ စတင်လာပါပြီ။ မနက် ၂ နာရီ ၁ မိနစ် အတိမှာ အမေရိကန် Delta Force အထူးတပ်ဖွဲ့တွေဟာ မာဒူရိုရဲ့ နေအိမ်ဝင်းထဲကို ရဟတ်ယာဉ်တွေနဲ့ ဆင်းသက်ခဲ့ပါတယ်။ ရဟတ်ယာဉ်တစင်းဟာ ပစ်ခတ်ခံရပြီး ထိမှန်ခဲ့ပေမဲ့ ဆက်လက် ပျံသန်းနိုင်ခဲ့တယ်လို့ သိရပါတယ်။

မာဒူရိုရဲ့ နေအိမ်ဟာ သာမန်အိမ် မဟုတ်ပါဘူး။ ‘ခံတပ်’ (Fortress) တခုလို သံမဏိတံခါးကြီးတွေနဲ့ ကာရံထားတာပါ။ ဒါပေမဲ့ အမေရိကန်တပ်ဖွဲ့တွေဟာ သံဖြတ်မီးရှူး (Blowtorches) တွေကို အသုံးပြုပြီး ဒီသံမဏိတံခါးတွေကို စက္ကန့်ပိုင်းအတွင်း ဖြတ်တောက် ဝင်ရောက်ခဲ့ပါတယ်။ သမ္မတ ထရမ့်ပ်က “သူတို့ဟာ ဖောက်ဝင်လို့မရဘူးလို့ ထင်ထားတဲ့ နေရာတွေကို စက္ကန့်ပိုင်းလေးနဲ့ ဝင်သွားခဲ့ကြတယ်” လို့ ပြောပါတယ်။

အိမ်ထဲကို စစ်သားတွေ ဝင်လာတဲ့အချိန်မှာ မာဒူရိုဟာ သူ့ရဲ့ အလုံပိတ် လျှို့ဝှက်ခန်း (Safe Room) ဆီကို ပြေးဝင်ဖို့ ကြိုးစားခဲ့ပါသေးတယ်။ ဒါပေမဲ့ သူဟာ အခန်းတံခါးကိုတောင် ပိတ်ခွင့်မရလိုက်ပါဘူး။ “သူ တံခါးဝကို ရောက်တယ်၊ ဒါပေမဲ့ မပိတ်နိုင်လိုက်ဘူး။ ကျုပ်လူတွေက အရမ်းမြန်လွန်းတော့ သူ့ကို ဝင်လုံးလိုက်နိုင်တယ်” လို့ ထရမ့်ပ်က ပြန်ပြောင်း ပြောပြပါတယ်။ တကယ်လို့ သူ တံခါးပိတ်လိုက်ရင်တောင် အဲဒီတံခါးကို ဖောက်ခွဲဖို့ ၄၇ စက္ကန့်ပဲ ကြာမှာ ဖြစ်တယ်လို့ ဆိုပါတယ်။

ထူးခြားတဲ့ သမိုင်းတိုက်ဆိုင်မှု တခုကတော့ ၁၉၉၀ ပြည့်နှစ် ဇန်နဝါရီ ၃ ရက်နေ့တုန်းက ပနားမား အာဏာရှင် မာနူရယ် နော်ရေးဂါး အမေရိကန်လက်ထဲ အဖမ်းခံခဲ့ရသလို အခု ၃၆ နှစ်အကြာ ၂၀၂၆ ခုနှစ် ဇန်နဝါရီ ၃ ရက်နေ့မှာလည်း မာဒူရိုဟာ နော်ရေးဂါး လမ်းစဉ်အတိုင်း အဖမ်းခံလိုက်ရတာပဲ ဖြစ်ပါတယ်။

အပြန်အလှန် ပစ်ခတ်မှုတွေ ရှိခဲ့ပြီး အမေရိကန်ဘက်က စစ်သားတချို့ ဒဏ်ရာရခဲ့ပေမဲ့ သေဆုံးသူ မရှိဘူးလို့ ဆိုပါတယ်။ မာဒူရိုနဲ့ သူ့ဇနီး စီလီယာဖလောရက်စ် တို့ကို ဖမ်းဆီးပြီး မနက် ၄ နာရီ မိနစ် ၂၀ မှာတော့ ရဟတ်ယာဉ်တွေဟာ ဗင်နီဇွဲလားမြေကနေ ပြန်လည်ထွက်ခွာသွားခဲ့ပါပြီ။ ၇ နာရီလောက် အကြာမှာတော့ သမ္မတ ထရမ့်ပ်က USS Iwo Jima စစ်သင်္ဘောကြီးပေါ်မှာ မာဒူရိုတယောက် မီးခိုးရောင် ဘောင်းဘီရှည် ဝတ်ထားပြီး မျက်လုံးစည်း၊ လက်ထိတ်ခတ်ခံထားရတဲ့ ပုံကို ကမ္ဘာကို ချပြလိုက်ပါတယ်။

အပိုင်း ၄ - ဒွန်ရိုးဝါဒနဲ့ ကမ္ဘာ့အမြင်

ဒီစစ်ဆင်ရေးကြီးတခုလုံးကို သမ္မတ ထရမ့်ပ်ဟာ အိမ်ဖြူတော်က Situation Room မှာ ကြည့်နေတာ မဟုတ်ပါဘူး။ ဖလော်ရီဒါက သူ့ရဲ့ မာရာလာဂို အပန်းဖြေစခန်းမှာ CIA ညွှန်မှူး ဂျွန်ရက်ကလစ်ဖ်၊ နိုင်ငံခြားရေးဝန်ကြီး မာကို ရူဘီယို တို့နဲ့အတူ တိုက်ရိုက် ကြည့်ရှုနေခဲ့တာပါ။ ထရမ့်ပ်ကတော့ တိုက်ရိုက်ပြနေတဲ့ ရုပ်သံရှိုးပွဲတခု ကြည့်ရသလိုမျိုးပဲလို့ ဆိုပါတယ်။

ဒီစစ်ဆင်ရေးဟာ နိုင်ငံရေးအရတော့ ပြည်တွင်းမှာရော ကမ္ဘာမှာပါ ဂယက်ရိုက်ခတ်မှုတွေ ရှိနေပါတယ်။ အမေရိကန် ကွန်ဂရက်လွှတ်တော်ကို ကြိုတင် အသိမပေးခဲ့ပါဘူး။ ထရမ့်ပ်ကတော့ “ကွန်ဂရက်က သတင်းပေါက်တတ်တယ်၊ ဒါကြောင့် မပြောတာ” လို့ အကြောင်းပြပါတယ်။

တရုတ်၊ ရုရှားနဲ့ အီရန်တို့က ဒီလုပ်ရပ်ကို ‘လက်နက်ကိုင် ကျူးကျော်မှု’ နဲ့ ‘အချုပ်အခြာအာဏာကို ဗြောင်ကျကျ ချိုးဖောက်မှု’ အဖြစ် ပြင်းပြင်းထန်ထန် ရှုတ်ချပါတယ်။ အထူးသဖြင့် အိမ်နီးချင်း ဘရာဇီးသမ္မတ လူလာဒါဆေးလ်ဗားက အမေရိကန်ရဲ့ လုပ်ရပ်ဟာ “လက်ခံနိုင်စရာမရှိတဲ့ စည်းကို ကျော်လိုက်တာပဲ” လို့ ပြောဆိုလိုက်ပြီး ကုလသမဂ္ဂ အတွင်းရေးမှူးချုပ် အန်တိုနီယို ဂူတာရက်စ် ကလည်း ဒါဟာ “အန္တရာယ်ကြီးတဲ့ အစဉ်အလာဆိုး” (Dangerous Precedent) ဖြစ်သွားပြီလို့ သတိပေးလိုက်ပါတယ်။ နော်ဝေနိုင်ငံကတော့ အမေရိကန်ရဲ့ ဝင်ရောက်စွက်ဖက်မှုဟာ နိုင်ငံတကာ ဥပဒေနဲ့ မညီညွတ်ဘူးလို့ တဲ့တိုး ပြောဆိုထားပါတယ်။

ဒါပေမဲ့ တဖက်မှာလည်း အားပေးထောက်ခံသူတွေ ရှိနေပါတယ်။ အာဂျင်တီးနားသမ္မတ ဟားဗီးယာ မီလေက “လွတ်လပ်ခြင်းတရား ရှေ့ကို ဆက်လှမ်းပြီ၊ လွတ်လပ်ရေး အဓွန့်ရှည်ပါစေ” လို့ လူမှုကွန်ရက်မှာ ရေးသားခဲ့သလို အစ္စရေးဝန်ကြီးချုပ် နေတန်ယာဟုကလည်း ထရမ့်ပ်ရဲ့ လုပ်ရပ်ကို “လွတ်လပ်မှုနဲ့ တရားမျှတမှုအတွက် ရဲရင့်တဲ့ သမိုင်းဝင် ဦးဆောင်မှု” လို့ ချီးကျူးခဲ့ပါတယ်။

ဥရောပ မဟာမိတ်တွေကတော့ သတိကြီးကြီးထား တုံ့ပြန်ကြတာ တွေ့ရပါတယ်။ ဗြိတိန်ဝန်ကြီးချုပ် ကီယာစတာမာက မာဒူရိုအစိုးရ ပြုတ်ကျသွားတဲ့အပေါ် “မျက်ရည်ကျစရာ မရှိဘူး” လို့ ပြောပေမဲ့ စစ်ရေးတိုက်ခိုက်မှုရဲ့ ဥပဒေကြောင်းအရ တရားဝင်မှုကိုတော့ တိုက်ရိုက် မှတ်ချက်မပေးဘဲ ရှောင်ရှားသွားပါတယ်။ ဂျာမန်ဝန်ကြီးချုပ် ဖရိုင်းဒရစ်ဇ်မာ့ဇ် ကလည်း ဒီစစ်ဆင်ရေးရဲ့ ဥပဒေကြောင်းရာ ကိစ္စဟာ “ရှုပ်ထွေးတယ်” လို့ သုံးသပ်ထားပြီး ပြင်သစ်သမ္မတ မက်ခွန်းနဲ့ ဥရောပသမဂ္ဂတို့ကတော့ အာဏာလွှဲပြောင်းရေးကို ငြိမ်းချမ်းစွာ လုပ်ဆောင်ဖို့ပဲ တိုက်တွန်းထားပါတယ်။

ဒါပေမဲ့ ထရမ့်ပ်ကတော့ အခုလုပ်ရပ်ဟာ ၁၉ ရာစုက Monroe Doctrine (မွန်ရိုးဝါဒ) ကို ပြန်အသက်သွင်းထားတဲ့ “Donroe Doctrine” ပဲလို့ ပြောဆိုခဲ့ပါတယ်။။ သမ္မတ ဂျိန်းစ်မွန်ရိုးရဲ့ မူကို ဒေါ်နယ်ထရမ့်ပ်က ပြန်အသက်သွင်းတာကြောင့် မွန်ရိုးနဲ့ ဒေါ်နယ်ကို ပေါင်းပြီးတော့ ဒွန်ရိုးလို့ နောက်ပြောင် သုံးနှုန်းခဲ့တာ ဖြစ်ပါတယ်။ အနောက်ကမ္ဘာခြမ်းဟာ အမေရိကန်ရဲ့ အိမ်ရာဝင်း ဖြစ်ပြီး ဘယ်သူမှ လာစွက်ဖက်လို့ မရဘူးလို့ ကြေညာလိုက်ပါတယ်။

ဗင်နီဇွဲလား အသွင်ကူးပြောင်းရေး မပြီးမချင်း အမေရိကန်ကပဲ နိုင်ငံကို အုပ်ချုပ်သွားမယ်လို့လည်း  ထရမ့်ပ်က ပြောခဲ့ပါတယ်။ အမေရိကန် စွမ်းအင်ကုမ္ပဏီတွေက ဗင်နီဇွဲလားရဲ့ ရေနံလုပ်ငန်းတွေကို ဝင်ရောက်လုပ်ကိုင်ပြီး တိုင်းပြည် ပြန်လည်တည်ဆောက်မယ်လို့ ဆိုပါတယ်။

အပိုင်း ၅ - နေပြည်တော်ကို ဘယ်တော့လာခေါ်မလဲ

ဘာပဲပြောပြောပြော ကမ္ဘာ့အနောက်ခြမ်းက အာဏာရှင်တယောက် နိဂုံးချုပ်သွားပါပြီ။ ဒီသတင်းကို ကြားကြားချင်းမှာပဲ မြန်မာပြည်သူတွေရဲ့ စိတ်ထဲမှာ တယောက်သောသူကိုပဲ ပြေးမြင်မိမှာပါ။  အဲဒါကတော့ နေပြည်တော်က စစ်ခေါင်းဆောင် မင်းအောင်လှိုင်ပဲ ဖြစ်ပါတယ်။

မာဒူရိုနဲ့ မင်းအောင်လှိုင်ဟာ တူညီချက်တွေ အများကြီး ရှိနေပါတယ်။ နှစ်ယောက်စလုံးဟာ ရွေးကောက်ပွဲရလဒ်ကို ငြင်းပယ်ပြီး အာဏာယူထားသူတွေ ဖြစ်တယ်။ နှစ်ယောက်စလုံးဟာ မြို့တော်ကြီးတွေက ခံတပ်တွေထဲမှာ ကိုယ့်ကိုယ်ကိုယ် အလုံခြုံဆုံးလို့ ထင်မှတ်နေကြသူတွေ ဖြစ်ပါတယ်။ မာဒူရိုမှာ ကာရာကပ်စ်က ခံတပ်အိမ် ရှိသလို မင်းအောင်လှိုင်မှာလည်း နေပြည်တော်က မြေအောက်ဥမင်တွေ၊ ဘန်ကာတွေ ရှိကောင်း ရှိပါလိမ့်မယ်။

ဒါပေမဲ့ “Operation Absolute Resolve” က ပေးလိုက်တဲ့ သင်ခန်းစာကတော့ ရှင်းပါတယ်။ အမေရိကန်လို ကမ္ဘာ့အင်အားကြီးနိုင်ငံတခုရဲ့ ခေတ်မီနည်းပညာ၊ မောင်းသူမဲ့လေယာဉ်တွေ (Drones)၊ ဆိုက်ဘာတိုက်ခိုက်မှုတွေနဲ့ အထူးတပ်ဖွဲ့တွေရဲ့ စွမ်းရည်အောက်မှာ ဘယ်လို ခံတပ်မျိုး၊ ဘယ်လို သံမဏိတံခါးမျိုးကမှ အာဏာရှင်ကို ကာကွယ်မပေးနိုင်ဘူး ဆိုတာပါပဲ။ မာဒူရိုရဲ့ Safe Room တံခါးတောင် ပိတ်ခွင့်မရလိုက်တဲ့ အဖြစ်အပျက်က နေပြည်တော်က စစ်ဗိုလ်ချုပ်တွေကို ကျောချမ်းသွားစေမှာ အသေအချာပါပဲ။

ဒီနေရာမှာ အထူးသတိပြုစရာ အချက်တချက် ရှိပါတယ်။ အဲဒါကတော့ မာဒူရိုကို ဝင်ဖမ်းတဲ့ စစ်ဆင်ရေးမှာ သမ္မတ ထရမ့်ပ်နဲ့အတူ ဘေးချင်းယှဉ် ထိုင်ကြည့်နေခဲ့တဲ့ နိုင်ငံခြားရေးဝန်ကြီး မာကို ရူဘီယိုရဲ့ ထုတ်ပြန်ချက်ဖြစ်ပါတယ်။ ဗင်နီဇွဲလား အာဏာရှင်ကို ဖြုတ်ချဖို့ ဦးဆောင်ခဲ့သူ တယောက်က နောက်ရက်မှာပဲ မြန်မာစစ်ကောင်စီကို သတိပေးစာ ထုတ်လိုက်တာဟာ တိုက်ဆိုင်မှု တခုထက်တော့ ပိုနိုင်ပါတယ်။

ရူဘီယိုဟာ မာဒူရိုကို ဖမ်းပြီးပြီးချင်းပဲ ဇန်နဝါရီ ၃ ရက်နေ့ ရက်စွဲနဲ့ မြန်မာနိုင်ငံအတွက် အရေးကြီးတဲ့ ကြေညာချက်တစောင်ကို ထုတ်ပြန်ခဲ့ပါတယ်။ ဇန်နဝါရီ ၄ ရက်နေ့မှာ ကျရောက်တဲ့ ၇၈ နှစ်မြောက် မြန်မာ့လွတ်လပ်ရေးနေ့ အထိမ်းအမှတ် သဘောထားထုတ်ပြန်ချက် ဖြစ်ပါတယ်။

“အမေရိကန်ပြည်ထောင်စုအနေနဲ့ ဒီကနေ့ လွတ်လပ်ရေးနေ့ကို ဆင်နွှဲနေကြတဲ့ မြန်မာပြည်သူတွေဘက်ကနေ ရပ်တည်ကြောင်း ထပ်လောင်း အတည်ပြုပါတယ်” လို့ ဖော်ပြထားပါတယ်။ ဒါ့အပြင် မြန်မာနိုင်ငံမှာ ဖြစ်ပေါ်နေတဲ့ အကျပ်အတည်းတွေအပေါ် အမေရိကန်က အထူးစိုးရိမ်ပူပန်ကြောင်းနဲ့ စစ်ကောင်စီအနေနဲ့ အကြမ်းဖက်မှုတွေကို ရပ်တန့်ဖို့၊ လူသားချင်း စာနာထောက်ထားမှု အကူအညီတွေကို အတားအဆီးမရှိ ခွင့်ပြုဖို့နဲ့ မတရား ဖမ်းဆီးထားသူတွေကို ပြန်လွှတ်ပေးဖို့ တိုက်တွန်းထားပါတယ်။

ဗေဒင်ကိန်းခန်းအရ ပြောမယ်ဆိုရင်လည်း ကြာသပတေးနံ မ နဲ့ စတဲ့ မာဒူရို ပြီးတဲ့အခါ ကြာသပတေးနံ မင်း နဲ့စတဲ့ မင်းအောင်လှိုင် အလှည့် ရောက်လာမလားလို့ တွေးကြည့်စရာပါ။ နေပြည်တော်ကိုလည်း ဒီလိုပဲ ဝင်ဆွဲသွားရင် သိပ်ကောင်းမှာလို့ လူထုတွေက လူမှုကွန်ရက်မှာ ပြောဆိုနေကြပါတယ်။

နိဂုံး

အချုပ်ပြောရရင်တော့ ဗင်နီဇွဲလားက မာဒူရိုရဲ့ နိဂုံးဟာ ကမ္ဘာတလွှားက အာဏာရှင်တွေ အတွက်တော့ သေမင်းတမန် ခေါင်းလောင်းသံပါပဲ။ ကိုယ့်ပြည်သူကို သတ်ဖြတ်၊ ဖိနှိပ်ပြီး အာဏာတည်မြဲဖို့ ကြိုးစားနေသူတွေအတွက် “ပြေးစရာ မြေမရှိ” ဆိုတဲ့ စကားက လက်တွေ့ ဖြစ်လာနိုင်ပါတယ်။

နေပြည်တော်က စစ်ခေါင်းဆောင်တွေ အိပ်ပျော်ပါ့မလား ဆိုတာကတော့ မပြောတတ်ပါဘူး။ မာဒူရို လိုမျိုး မင်းအောင်လှိုင်တယောက် လက်ထိတ်ခတ်ပြီး မျက်လုံးစည်းခံထားရမဲ့၊ တရားစီရင်ခံရမဲ့ နေ့ရက်ကိုတော့ မြန်မာပြည်သူတွေကတော့ လက်ချိုးရေတွက် စောင့်မျှော်နေကြမှာ အသေအချာပဲ ဖြစ်ပါတယ်။

စိုင်းခေတ်နွေ

ရုပ်သံလင့်ခ်