စစ်ကိုင်းတိုင်း၊ ဆားလင်းကြီးမြို့နယ်အနောက်ခြမ်း မတောင်းတတိုက်နယ်ဆေးရုံပေါ်ကို စစ်ကောင်စီက ဝေဟင်ကနေ ဗုံးကြဲတာကြောင့် ပြည်သူ ၃ ယောက် သေဆုံးခဲ့ရတယ်လို့ ဒေသခံတွေက ပြောပါတယ်။
ရွာသားတယောက်က “ဗုံးသီးက ၃ လုံးချတာ။ ဆေးရုံပေါ်ကို ကျတာ။ ဆေးကုသခံယူနေတဲ့ ပြည်သူမြေးအဘိုး ၂ ယောက်၊ ဆရာဝန်တယောက် စုစုပေါင်း ၃ ယောက် သေဆုံးတာဗျ။ ထိခိုက်သူတွေလည်း များတယ်။ လုံခြုံရေးအရ ချက်ချင်း နေရာပြောင်းရွှေ့ရလို့ ဒဏ်ရာရသူဦးရေကိုတော့ အတိအကျမပြောနိုင်ဘူး” လို့ ပြောပါတယ်။
မတောင်းတတိုက်နယ်ဆေးရုံကို စစ်ကောင်စီတပ်က ၂၀၂၅ ခုနှစ် ဇွန် ၃ ရက် ည ၆ နာရီလောက်ကလည်း စက်တပ် လေထီးနဲ့ ဗုံးကြဲတိုက်ခိုက်ခဲ့တယ်လို့ ဆိုပါတယ်။
ဆားလင်းကြီးမြို့နယ် ပြည်သူ့ကာကွယ်ရေးတပ်ခေါင်းဆောင်တယောက်က “ဆေးရုံကို အနီးဝန်းကျင်ရွာက ပြည်သူတွေကို ကျန်းမာရေးအတွက် လောက်သာ ကုသပေးနေတာပါ။ စစ် ရေးပစ်မှတ်မရှိပါဘူး။ အကြောင်းမဲ့လာပစ်သွားတာ” လို့ ပြောပါတယ်။
ဆားလင်းကြီးမြို့နယ် လက်ပံတောင်းတောင်မှာရှိတဲ့ ဝမ်ပေါင်တရုတ်စီမံကိန်းအတွင်းမှာ စစ်တပ်က စခန်းချတပ်စွဲပြီး မကြာခဏဆိုသလို ကျေးရွာတွေကို ဗုံးကြဲပစ်ခတ်နေတာလို့ ဆိုပါတယ်။
