ရန်ကုန်တိုင်းအတွင်း အာဏာသိမ်းစစ်တပ်လက်အောက်ခံ ရပ်ကွက်အုပ်ချုပ်ရေးက နေအိမ်တွေကို အတင်းအကျပ် နိုင်ငံတော် အလံထောင်ခိုင်းနေသလို ငြင်းဆန်သူတွေကို ဖမ်းဆီးတာတွေ လုပ်နေတယ်လို့ ဒေသခံတွေဆီက သိရပါတယ်။
ဇန်နဝါရီ ၃ ရက် ညနေပိုင်းက ရွှေပြည်သာမြို့နယ်၊ အမှတ် ၇ ရပ်ကွက်မှာ အလံထောင်ဖို့ လာပြောတဲ့ ရပ်ကွက်ရာအိမ်မှူးကို ‘မထောင်ရင် ဘာလုပ်မှာလဲ’ လို့ ပြန်မေးခဲ့တဲ့ အမျိုးသားတယောက်ကို ရဲနဲ့ စစ်တပ်က လာရောက်ဖမ်းဆီး ရိုက်နှက်ခေါ်ဆောင်သွားတယ်လို့ မျက်မြင်တွေ့ရှိသူကပြောပါတယ်။
“ညနေ ၃ နာရီ လောက်ပေါ့။ အလံထောင်ရမယ်၊ ဝယ်ထားတာ မရှိရင် သူတို့ဆီက ဝယ်ရမယ်ဆိုပြီး လာပြောတာ။ အဲဒါကို မထောင်ရင် ဘာလုပ်မှာလဲလို့ ပြန်မေးလို့။ ဘာလုပ်မလဲ သိရမယ်ဆိုပြီး တအောင့်နေတော့ လာဖမ်းသွားတာ”
ဇန်နဝါရီ ၄ ရက် ၇၈ ကြိမ်မြောက် လွတ်လပ်ရေးနေ့မှာ နေအိမ်တွေ၊ ဆိုင်ခန်းတွေ၊ ဘေးတွဲဆိုင်ကယ်တွေ၊ ဆိုက်ကားတွေ၊ YBS ဘတ်စ်ကားတွေမှာ နိုင်ငံတော် အလံထောင်ကြဖို့ စစ်ကောင်စီက ဖိအားပေးခိုင်းစေနေတာ ဖြစ်ပါတယ်။
ရပ်ကွက်အုပ်ချုပ်ရေးပိုင်းက တာဝန်ရှိသူတွေအနေနဲ့ အလံရောင်းပေးမယ်ဆိုပြီး တအိမ်ကို ကျပ် ၁၀,၀၀၀ တောင်းခံနေပြီး ပြင်ပမှာ မိမိအစီအစဉ်နဲ့ ဝယ်ယူပြီးထောင်တဲ့သူတွေလည်း ရှိနေပါတယ်။
တောင်ဒဂုံ၊ မြောက်ဒဂုံ၊ ရွှေပြည်သာ၊ လှိုင်သာယာ၊ မင်္ဂလာဒုံတို့လို မြို့နယ်တွေ အပါအဝင် အင်းစိန်၊ မရမ်းကုန်၊ လှိုင်၊ ကမာရွတ်၊ စမ်းချောင်း၊ ကြည့်မြင်တိုင်၊ အလုံ၊ သင်္ဃန်းကျွန်း ၊ မြောက်ဥက္ကလာ၊ တောင်ဥက္ကလာ စတဲ့မြို့နယ်တွေအပြင် မြို့တွင်းက မြို့နယ်တွေမှာလည်း နေအိမ်တိုင်း၊ ဆိုင်တိုင်း အလံထောင်ထားကြတာ တွေ့ရပြီး အရင်နှစ်တွေက အခုလို ဖိအားပေးစေခိုင်းတာမျိုး မရှိဘူးလို့ သိရပါတယ်။
