မန္တလေးတိုင်းမှာ ဇန်နဝါရီ ၁ ရက်ညပိုင်းက အင်အားအတော်အသင့်ရှိ မြေငလျင်တွေ လှုပ်ခတ်သွားခဲ့တယ်လို့ အမျိုးသားညီညွတ်ရေးအစိုးရ (NUG) လူမှုကူညီရေး၊ အလုပ်သမားနှင့် လူသားချင်းစာနာထောက်ထားရေးဝန်ကြီးဌာနက ထုတ်ပြန်ပါတယ်။
မနေ့ညက မြန်မာစံတော်ချိန် ည ၇ နာရီ ၄၉ မိနစ်လောက်မှာ မန္တလေးမြို့ရဲ့ မြောက်-အနောက်မြောက်ဘက် ၈၂ ကီလိုမီတာအကွာ၊ စဥ့်ကူးမြို့အနီး၊ မြေအောက်အနက် ၁၀ ကီလိုမီတာကို ဗဟိုပြုပြီး ရစ်ခ်တာစကေး ၄ ဒသမ ၉ အဆင့်နဲ့ အင်အားအတော်အသင့်ရှိတဲ့ မြေငလျင်တခု လှုပ်ခတ်ခဲ့တယ်လို့ဆိုပါတယ်။
ဒါ့အပြင် မနေ့ည ၈ နာရီ ၃၃ မိနစ်လောက်မှာလည်း မန္တလေးတိုင်း၊ မိုးကုတ်မြို့ တောင်-အနောက်တောင်ဘက် ၅၂ ကီလိုမီတာအကွာ၊ မြေအောက်အနက် ၁၀ ကီလိုမီတာကိုဗဟိုပြုပြီး ရစ်ခ်တာစကေး ၄ ဒသမ ၄ ရှိ အင်အားအနည်းငယ်ရှိ မြေငလျင်တခု ထပ်မံ လှုပ်ခတ်ခဲ့ပါတယ်။
ငလျင်အန္တရာယ်ကြောင့်ထိခိုက်ဆုံးရှုံးမှုတွေ လျော့နည်းစေဖို့ ဆောင်ရန်၊ ရှောင်ရန်၊ သတိပြုရန် အချက်တွေနဲ့အညီ နေထိုင်ကြဖို့လည်း NUG က အသိပေးထားပါတယ်။
မြေငလျင်တိုင်းတာစက်တွေက အသုံးပြုတဲ့ စကေးနဲ့ တိုင်းတာတဲ့ နည်း လမ်းတို့ အပေါ်မူတည်ပြီး ငလျင်အင်အားပမာဏ အနည်းငယ်ကွာခြားနိုင်တယ်လို့လည်းဆိုပါတယ်။
စစ်ကောင်စီရဲ့ မိုးဇလဌာနကတော့ ဒီဇင်ဘာ ၁ ရက် ည ၇ နာရီ ၃၈ မိနစ် ၅၈ စက္ကန့်မှာ လှုပ်ခတ်ခဲ့တဲ့ အင်အားပမာဏ ၄ ဒသမ ၉ ရှိတဲ့ သပိတ်ကျင်းမြို့ရဲ့ တောင်ဘက် ၉ မိုင်လောက်အကွာ အနက် ၁၃ ကီလိုမီတာကို ဗဟိုပြုလုပ်ခတ်သွားတာလို့ ထုတ်ပြန်ထားပါတယ်။
အဆိုပါငလျင်လှုပ်ခတ်မှုနဲ့ ပတ်သက်ပြီး လူနဲ့ အိုးအိမ်အဆောက်အအုံတွေ ထိခိုက်ပျက်စီးမှု သတင်းတွေကတော့ မရရှိပါဘူး။
