အမေရိကန် Powerball jackpot ဟာ ဒီဇင်ဘာ ၂၄ ရက်ညက ထီဖွင့်ပွဲမတိုင်ခင်မှာ ဒေါ်လာ ၁ ဒသမ ၇ ဘီလီယံအထိ မြင့်တက်လာခဲ့ပြီး အမေရိကန်သမိုင်းမှာ အကြီးမားဆုံး ထီဆုတွေထဲက တခုဟာ ခရစ္စမတ်အတွက် အချိန်မီ ဖြစ်ခဲ့ပါတယ်။
တနင်္လာနေ့က ထီဖွင့်ပွဲမှာ အနိုင်ရသူ မရှိခဲ့လို့ jackpot ထီဆုတန်ဖိုးက မြင့်တက်လာခဲ့ပြီး ငွေပေးချေမှုကို တိုးမြှင့်နိုင်ခဲ့ပါတယ်။
နောက်ထပ် ထီဖွင့်ပွဲကို ဒေသစံတော်ချိန် ဗုဒ္ဓဟူးနေ့ည ၁၀ နာရီ ၅၉ မိနစ်မှာ သတ်မှတ်ထားပြီး jackpot အနိုင်ရဖို့ အခွင့်အလမ်းက ၂၉၂ ဒသမ ၂ သန်းမှာ တကြိမ်သာ ရှိပါတယ်။
ထီထိုးသူတွေဟာ ၂၉ နှစ်အတွင်း နှစ်စဉ် ဒေါ်လာ ၁ ဒသမ ၇ ဘီလီယံ ပေးချေမှု ဒါမှမဟုတ် အခွန်မဆောင်ခင် ဒေါ်လာ ၇၈၁ ဒသမ ၃ သန်းလောက် ငွေသားတလုံးတခဲတည်း ပေးချေမှုဆိုပြီး ရွေးချယ်မှု နှစ်ခုထဲက တခုကို ရွေးချယ်နိုင်တယ်လို့ ထီဝက်ဘ်ဆိုက်က ဆိုပါတယ်။
ဒီ jackpot ဟာ Powerball သမိုင်းမှာရော အမေရိကန်ထီတွေထဲမှာပါ စတုတ္ထအကြီးဆုံး ဖြစ်ပါတယ်။
သမိုင်းကြောင်းအရ Powerball jackpot ကို ၂၀၁၁ ခုနှစ် ခရစ္စမတ်အကြိုနေ့မှာ တကြိမ်နဲ့ ခရစ္စမတ်နေ့မှာ ၄ ကြိမ် ရရှိခဲ့ဖူးပါတယ်။
တနိုင်ငံလုံးအတိုင်းအတာနဲ့ အမေရိကန်ဒေါ်လာ ၁ သန်းတန် ဒုတိယဆု ၉ ခုကို တနင်္လာနေ့က နောက်ဆုံးထီဖွင့်ပွဲမှာ ထုတ်ယူနိုင်ခဲ့ပါတယ်။
အကြီးဆုံး Powerball jackpot က ၂၀၂၂ ခုနှစ်မှာ ကယ်လီဖိုးနီးယားပြည်နယ်မှာ ရခဲ့တဲ့ အမေရိကန်ဒေါ်လာ ၂ ဒသမ ၀၄ ဘီလီယံဖြစ်ပြီး မှတ်တမ်းတင်ထားတဲ့ အမေရိကန်ထီဆုကြေးတွေ ထဲမှာ အများဆုံးဖြစ်ပါတယ်။
ကြီးမားတဲ့ jackpot ထီဆုတွေဟာ လက်မှတ်ရောင်းအားကို မြှင့်တင်ပေးပြီး ပညာရေးနဲ့ တခြား ပြည်သူ့အသုံးစရိတ်တွေကို ပံ့ပိုးပေးတဲ့ ပြည်နယ်ထီရန်ပုံငွေတွေအတွက် ဝင်ငွေကို မြှင့်တင်ပေးလေ့ ရှိပါတယ်။
Source: Reuters
