ကရင်ပြည်နယ်၊ မြဝတီမြို့အနီးရှိ ကော်သူးလေတပ်မတော် (Kaw ThooLei Army- KTLA) ရဲ့ စခန်းငယ်တခုကို ဒီဇင်ဘာ ၅ ရက် နေ့လယ်ပိုင်းက ကာမီကာဇီဒရုန်းနဲ့တိုက်ခိုက်ခံရတယ်လို့ KTLA တပ်ဖွဲ့ဝင်တွေဆီက သိရပါတယ်။

ဒရုန်း ၄ စီးနဲ့ နာရီဝက်ခြား ၄ ကြိမ်တိုက်ခိုက်ခဲ့တာဖြစ်ပြီး KTLA တပ်ဖွဲ့ဝင်တွေတော့ ထိခိုက်တာမရှိဘဲ ဒေသခံတွေရဲ့ ပြောင်းခင်းတချို့တော့ ပျက်စီးခဲ့တယ်လို့ ဆိုပါတယ်။

KTLA တပ်ဖွဲ့ ပြန်ကြားရေးတာဝန်ရှိသူက "စစ်ကောင်စီက ကာမီကာဇီ ဒရုန်း ၄ စီးနဲ့ အချိန်ခြားပြီး လာပစ်တာ တစုံတရာထိခိုက်မှုမရှိဘူး။ ပြည်သူပိုင် ပြောင်းခင်တွေတော့ ပျက်စီးသွားတယ်။ ကျနော်တို့ရဲ့ ရန်သူက စစ်ကောင်စီပဲရှိတာလေ၊ ပထမဦးဆုံးလာတိုက်ခိုက်တာ ၁ နာရီထိုး လောက်က တပ်ဖွဲ့ဝင်တွေတော့ တယောက်မှ ထိခိုက်မှု မရှိပါဘူး”လို့ ပြောပါတယ်။

KTLA နယ်မြေအတွင်းမှာ နိုဝင်ဘာလကုန်ပိုင်းက စက်တပ်လေထီးနဲ့ တိုက်ပွဲဝင်နိုင်ဖို့ အပျော်တန်းစီး စက်တပ်လေထီး ပျံသန်းလေ့ကျင့်တာတွေရှိနေပြီး KTLA ရဲ့ စစ်ဦးစီးချုပ် ဗိုလ်ချုပ်နယ်ဒါးမြကိုယ်တိုင် စက်တပ်လေထီးပျံသန်းစီးပြခဲ့ပါတယ်။