အမေရိကန်အစိုးရရဲ့ ငြိမ်းချမ်းရေးကြိုးပမ်းမှုကို ဟန့်တားနေတဲ့ ဥရောပနဲ့ စစ်ခင်းဖို့ အသင့်ရှိတယ်လို့ ရုရှားသမ္မတ ဗလာဒီမာပူတင်က ဒီဇင်ဘာ ၂ ရက်နေ့မှာ ကြုံးဝါးလိုက်ပါတယ်။
သမ္မတ ဒေါ်နယ်ထရမ့်ပ်ရဲ့ ကိုယ်စားလှယ်တွေဖြစ်တဲ့ စတိဗ်ဝစ်ကော့ဖ်နဲ့ ဂျရက်ကုရှ်နာ တို့ဟာ မော်စကိုမှာ ၅ နာရီကြာ ဆွေးနွေးခဲ့ကြပေမဲ့ တိုးတက်မှု မရှိခဲ့ပါဘူး။
ဆွေးနွေးပွဲဟာ အပြုသဘောဆောင်ပေမဲ့ ယူကရိန်းအကျပ်အတည်း ပြေလည်ဖို့ နီးစပ်မလာသေးသလို လုပ်စရာတွေ အများကြီး ကျန်နေသေးတယ်လို့ ကရင်မလင် အကြံပေး ယူရီအူရှာကော့ဗ်က ပြောပါတယ်။
အထူးသဖြင့် နယ်မြေထိန်းချုပ်မှုမျဉ်း သတ်မှတ်ရေးလို အဓိကအချက်တွေမှာ နှစ်ဖက် သဘောတူညီမှု မရနိုင်ခဲ့ကြပါဘူး။
ဆွေးနွေးပွဲမတိုင်ခင်မှာ ပူတင်က ဥရောပဟာ အမေရိကန်အစိုးရရဲ့ ငြိမ်းချမ်းရေးအစီအစဉ်ကို ကာဆီးနေပြီး “စစ်ဖြစ်ချင်တဲ့ဘက်” မှာ ရပ်တည်နေတယ်လို့ စွပ်စွဲခဲ့ပါတယ်။
“ရုရှားက ဥရောပနဲ့ မတိုက်ချင်ပေမဲ့ ဥရောပက စမယ်ဆိုရင်တော့ ရုရှားက အခုပဲ အသင့်ရှိနေပါတယ်” လို့ ပူတင်က သတိပေး ပြောကြားခဲ့တာပါ။
ရုရှားအနေနဲ့ ဥရောပဘက်က တောင်းဆိုချက်တွေကို လက်ခံနိုင်မှာ မဟုတ်ဘူးလို့လည်း ပူတင်က ပြတ်ပြတ်သားသား ငြင်းဆိုထားပါတယ်။
လက်ရှိအနေအထားအရ ထရမ့်ပ်နဲ့ ပူတင်အကြား နောက်ထပ် ထိပ်သီးဆွေးနွေးပွဲတခု လုပ်ဖြစ်ဖို့ မရှိသေးကြောင်း ရုရှားဘက်က အတည်ပြုထားပါတယ်။
