စွမ်းအင်စက်ရုံတွေကို တိုက်ခိုက်ခဲ့တယ်လို့ ရုရှားနဲ့ ယူကရိန်းတို့ဟာ လက်ရှိဖြစ်နေတဲ့ ပြင်းထန်တဲ့ ပဋိပက္ခရဲ့ နောက်ဆုံးအစီရင်ခံစာတွေထဲမှာ အပြန်အလှန် ပြောဆိုခဲ့ကြပါတယ်။ 

ရုရှားနယ်မြေထဲက အရပ်ဘက်အဆောက်အအုံတွေပေါ် ယူကရိန်းစစ်တပ်ရဲ့ တိုက်ခိုက်မှုတွေကို တုံ့ပြန်တဲ့အနေနဲ့ ရုရှားတပ်ဖွဲ့တွေက သောကြာညကစပြီး ယူကရိန်းစစ်ဘက် စက်မှုလုပ်ငန်းတွေနဲ့ သူတို့ကို အထောက်အပံ့ပေးတဲ့ စွမ်းအင်စက်ရုံတွေကို အတိအကျ ချိန်ရွယ်ပစ်ခတ်နိုင်တဲ့ လက်နက်တွေနဲ့ ဒရုန်းတွေကိုသုံးပြီး အကြီးအကျယ် စတင်တိုက်ခိုက်ခဲ့တယ်လို့ ရုရှားကာကွယ်ရေးဝန်ကြီးဌာနက စနေနေ့မှာ ကြေညာခဲ့ပါတယ်။ 

ဒါ့အပြင် ပြီးခဲ့တဲ့ ၂၄ နာရီအတွင်း ရုရှားတပ်ဖွဲ့တွေက တည်နေရာတွေကို စုစည်းနေချိန် ရှေ့တန်းစစ်မျက်နှာတွေ အများကြီးမှာ ယူကရိန်းရဲ့ တိုက်ခိုက်မှုတွေကို တွန်းလှန်ခဲ့ပါတယ်။ 

စစ်ဘက်လေယာဉ်ကွင်း အခြေခံအဆောက်အအုံတွေ၊ အဝေးပစ်ဒရုန်းသိုလှောင်ရုံနဲ့ ပစ်လွှတ်တဲ့ နေရာတွေအပြင် ယူကရိန်းတပ်ဖွဲ့တွေနဲ့ နိုင်ငံခြားကြေးစားစစ်သားတွေအတွက် ယာယီတပ်ချထားတဲ့ နေရာတွေကိုလည်း ပစ်မှတ်ထားခဲ့တယ်လို့ ရုရှားက ပြောပါတယ်။ 

ရုရှား လေကြောင်းကာကွယ်ရေးတပ်ဖွဲ့တွေက ယူကရိန်းရဲ့ နက်ပ်ကျွန်း အဝေးပစ်ပဲ့ထိန်း ဒုံးကျည်နှစ်စင်းနဲ့ တောင်ပံအသေတပ် ဒရုန်း ၁၅၈ စင်းကို ကြားဖြတ်ဟန့်တားနိုင်ခဲ့တယ်လို့ ရုရှကာကွယ်ရေးဝန်ကြီးဌာနက ပြောပါတယ်။

အဲဒီနေ့မှာပဲ ယူကရိန်းလက်နက်ကိုင်တပ်ဖွဲ့တွေရဲ့ အထွေထွေစစ်ဦးစီးချုပ်က ယူကရိန်းတပ်ဖွဲ့တွေဟာ ရုရှားနိုင်ငံ ခရက်စ်နိုဒါစကီ ခရိုင်ဒေသမှာရှိတဲ့ ရေနံချက်စက်ရုံနဲ့ ရို့စ်တော့ဗ်ဒေသ၊ တာဂံရို့ဂ်မြို့က လေယာဉ်ပြုပြင်ရေးစက်ရုံ အပါအဝင် ပစ်မှတ်တွေကို တိုက်ခိုက်ဖို့ ဒရုန်းတွေကို သုံးခဲ့တယ်လို့ ပြောပါတယ်။

ဒါ့အပြင် သောကြာနေ့ညကနေ စနေနေ့မနက်အထိ ရုရှားတပ်ဖွဲ့တွေဟာ ယူကရိန်းပိုင်နက်ထဲကို ဒုံးကျည် ၃၆ စင်းနဲ့ ဒရုန်း ၆၀၀ ကျော် ပစ်ခတ်ခဲ့ပြီး အဓိကအားဖြင့် နိုင်ငံရဲ့စွမ်းအင် အခြေခံအဆောက်အအုံကို ပစ်မှတ်ထားခဲ့တယ်လို့ ယူကရိန်းသမ္မတ ဗိုလိုဒီမာ ဇလန်းစကီးက နိုဝင်ဘာ ၂၉ ရက်မှာ လူမှုမီဒီယာပေါ်ကနေ ပြောခဲ့ပါတယ်။ 

Source: Reuters