ရှမ်းပြည်နယ်တောင်ပိုင်း၊ ရွာငံမြို့နယ်က ကျေးရွာတွေကို မီးရှို့ဖျက်ဆီးတာတွေ၊ လူသတ်တာတွေ၊ မုဒိမ်းမှုတွေ ကျူးလွန်ခဲ့တဲ့ စစ်တပ်လက်အောက်ခံ ပျူစောထီးခေါင်းဆောင်နဲ့ အပေါင်းအပါကို ပစ်ခတ်ရှင်းလင်းခဲ့တယ်လို့ ဓနုပြည်နယ်အမျိုးသားကာကွယ်ရေးတပ် DSNDA ပြန်ကြားရေး တာဝန်ရှိသူက ပြောပါတယ်။
နိုဝင်ဘာ ၂၉ ရက် မနက် ၉ နာရီဝန်းကျင်က လမ်းခုလတ်တနေရာမှာ ပျူစောထီးခေါင်းဆောင် ဝင်းမြင့်နဲ့ သူ့လက်အောက်ကလူကို ပစ်ခတ်ရှင်းလင်းတာဖြစ်တယ်လို့ ဆိုပါတယ်။
ပျူခေါင်းဆောင် ဝင်းမြင့်နဲ့ အနီးကပ်နေထိုင်သူရဲ့ သတင်းပေးမှုကြောင့် အိမ်စီးကားနဲ့ ထွက်လာတာကို ကြိုသိပြီး ပစ်ခတ်ရှင်းလင်းချိန်မှာ ပျူခေါင်းဆောင် ဝင်းမြင့်ဆီကနေ ပစ္စတို သေနတ်၊ ၉ မမ ကျည် ၁၆ တောင့်၊ မှတ်ပုံတင်၊ စာရွက်စာတမ်းနဲ့ သက်သေခံပစ္စည်းတွေ သိမ်းဆည်းရမိခဲ့ပြီး သတင်းပေးသူက DSNDA အဖွဲ့ဆီ ဘက်ပြောင်းခိုလှုံလာတယ်လို့ ပြောပါတယ်။
DSNDA ပြန်ကြားရေး တာဝန်ရှိသူက “တော်လှန်ရေးကာလတလျှောက်မှာ သူ ရွာတွေကို မီးရှို့တယ်။ သူကိုယ်တိုင်ပါဝင်သလို သူ့လက်အောက်ငယ်သားတွေ အဲဒီလိုလုပ်တာ။ ဝင်းမြင့်အဖွဲ့ဆို နာမည်တအားကြီးတာ။ ဝင်းမြင့်အဖွဲ့ဆို ပြည်သူတွေ ဖိမ်ဖိမ့်တုန်အောင် ကြောက်နေရတာ။ ကျောက်ပချုပ်ရွာမှာဆို ၁၅ နှစ်သမီးကို မုဒိမ်းကျင့်တာ၊ အဲဒါလည်း သူ့လက်အောက်ငယ်သားတွေပဲ။ ပဲရင်းတောင်မှာ မီးရှို့ခံရပြီး လူ ၇ ဦး အပုံလိုက် ရက်ရက်စက်စက် သတ်ဖြတ်ခံရတဲ့ ကိစ္စတွေ။ တခြားရွာက အိမ်မီးရှို့တဲ့ကိစ္စတွေလည်း သူကိုယ်တိုင် ပါဝင်ခဲ့တာပေါ့နော်” လို့ ပြောပါတယ်။
ပျူခေါင်းဆောင် ဝင်းမြင့်ဟာ ရွာငံက ပျူစောထီးအကြီးဆုံးဖြစ်ပြီး ၂၀၂၁ ခုနှစ်၊ ၇ လပိုင်းမှာ ပဲရင်းတောင်ရွာကို မီးရှို့ပြီး ပြည်သူ ၇ ဦးကို သတ်ဖြတ်တာ၊ ၂၀၂၂ ခုနှစ် ၆ လပိုင်းမှာ လွှစင်ကျေးရွာက နေအိမ် ၄ လုံးမီးရှို့တာ၊ ၂၀၂၃ ခုနှစ် ၅ လပိုင်းကနေ ၇ လပိုင်းကြား မြက်ခါးအင်းရွာက နေအိမ် ၃၇ လုံး မီးရှို့တာ၊ ကျောက်ပချုပ်ရွာက နေအိမ် ၅ လုံးမီးရှို့တာ၊ ၁၅ နှစ်အရွယ် မိန်းကလေးကို မုဒိမ်းကျင့်တာ၊ မင်းပလောင်ကျေးရွာကို မီးရှို့တာတွေကို တပ်မ ၅၅ လက်အောက်ခံတပ်တွေနဲ့ ပူးပေါင်းပြီး ဦးဆောင်ကျူးလွန်ခဲ့တာလို့ ပြောပါတယ်။
ရွာငံမြို့နယ်မှာလည်း စစ်တပ်နဲ့ပေါင်းပြီး သစ်တွေကို ထုတ်ယူနေသလို သာရေးနာရေးပွဲတွေမှာ အခွန်တွေ ပိုကောက်တာ၊ ပြည်သူတချို့ကိုလည်း PDF နဲ့ ဆက်စပ်တယ်ဆိုပြီး ဖမ်းဆီးခဲ့တဲ့သူ ဖြစ်တယ်လို့ သိရပါတယ်။
